Salsaludsod Dagiti Agbasbasa
Makalikaguman kadi ti naan-anay a pannakaitaneb iti danum no kayat nga agpabautisar ti maysa a tao ngem adda nakaro nga an-annayen wenno sakitna, a mamagbalin a narigat ti panangitaneb?
Ti sao a “bautisaran” ket naggapu iti Griego a sao a baʹpto, a ti kayatna a sawen ket itaneb. Iti Biblia, ti “bautisaran” ket kapada ti “itaneb.” No maipapan iti panangbautisar ni Felipe iti Etiope a eunuko, kuna ti The Emphasised Bible ni Rotherham: “Napanda a dua iti danum, ni Felipe ken ti eunuko,—ket intanebna.” (Aramid 8:38) No kasta, ti tao a mabautisaran ket kinapudnona aktual a maitaneb iti danum.—Mateo 3:16; Marcos 1:10.
Imbilin ni Jesus kadagiti adalanna: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida.” (Mateo 28:19, 20) Maitunos iti dayta, mangyurnos dagiti Saksi ni Jehova kadagiti panagpabautisar kadagiti pool, dan-aw, karayan, wenno dadduma a lugar nga adda umdas a danum para iti naan-anay a panangitaneb. Yantangay kalikaguman ti Kasuratan ti naan-anay a pannakaitaneb, awan ti autoridad ti tao a mangipuera iti maysa nga agpabautisar. Gapuna, nasken a mabautisaran ti maysa a tao uray makalikaguman ti di gagangay a pamay-an gapu iti kasasaadna. Kas pagarigan, kombiniente ti panagpabautisar iti dakkel a bathtub para kadagiti lallakay ken babbaket wenno nakapuy unay ti salun-atda. Mabalin nga agusar iti apaganem-em a danum iti bathtub, kalmado ken in-inayaden nga ikabil ti kandidato ti bautismo, ket inton maibturannan ti danum, mabalin nga aramiden ti aktual a panangbautisar.
Nabautisaran uray dagidiay addaan iti nakaro nga an-anayen. Kas pagarigan, naitaneb dagidiay addaan iti permanente nga abut iti karabukobda gapu iti pannakaopera ti ang-anguyob, wenno dagidiay masapul nga agusar iti makina tapno makaangesda. Siempre, kalikaguman dagiti kasta a bautismo ti naannad a panagsagana. Nainsiriban no presente dagiti nasanay a nars wenno doktor. Ngem no naisagana a naimbag ti amin a kasapulan, iti nganngani amin a kasasaad, maaramid ti bautismo. Gapuna, nasken a siaannad nga ikagumaan a bautisaran ti maysa a tao no daytoy ti napasnek a tarigagayna ken no situtulok nga awatenna dagiti risgo a nairaman.