Report Dagiti Manangiwaragawag Iti Pagarian
Medalia a Pammadayaw iti Kingdom Hall
TI Ministry of Environment idiay Finland intudingna ti tawen 2000 kas ti “Tawen ti Panangpapintas iti Aglawlaw” (“Year of Landscaping”). Kinuna ti maysa kadagiti organisador a ‘dayta ti nausar a tema tapno palagipannatayo amin maipapan iti epekto ti berde nga aglawlaw iti inaldaw a panagbiag ken salun-attayo.’
Idi Enero 12, 2001, nakaawat ti sanga nga opisina dagiti Saksi ni Jehova idiay Finland iti surat a naggapu iti Finnish Association of Landscape Industries. Inlawlawag ti surat a ti Kingdom Hall dagiti Saksi ni Jehova idiay Tikkurila ti nakaipaayan ti maysa kadagiti medalia para iti landscaping theme year gapu iti naisangsangayan a disenio ti aglawlawna ken ti nakaay-ayat a hardinna. Kuna pay ti surat a “makaay-ayo, nakapimpintas, ken nangato ti kalidad ti paraanganna, agpadpada iti kalgaw ken iti panawen ti lam-ek.”
Naipaay ti medalia kadagiti Saksi ni Jehova iti Rosendahl Hotel idiay Tampere, Finland, iti maysa nga okasion a dinar-ayan dagiti 400 a propesional ken negosiante. Ti Finnish Association of Landscape Industries ket nangipaay met iti pablaak iti media, a kunana: “Iti nadumaduma a paset ti pagilian, nagpintas ti pannakadisenio ti gistay amin a Kingdom Hall dagiti Saksi ni Jehova. Mapataliaw ti amin nga aglabas gapu iti pannakaaywan dagiti mulmula. Ti Kingdom Hall idiay Tikkurila ti maysa nga ehemplo ti nangayed a hardin. Ti patakder ken ti nalawa a paraanganna iyanninawda ti kinalinak ken kinatimbeng.”
Adda 233 a Kingdom Hall idiay Finland. Adu kadagita ti napalikmutan iti agkakapintas a hardin. Nupay kasta, pudpudno a napintas dagitoy a lugar agsipud ta dagita ket sentro ti pudno a panagdayaw ken panagadal iti Biblia. Para iti nasurok nga innem a milion a Saksi ni Jehova iti intero a lubong, makaay-ayo unay a lugar ti Kingdom Hall, napintas man wenno nanumo. Dayta ti gapuna a maragsakanda a mangaywan a naimbag ken mangipateg iti dayta. Nakalukat dagiti ruangan dagiti Kingdom Hall para kadagiti amin iti komunidadyo!