Report Dagiti Manangiwaragawag iti Pagarian
Silulukat Dagiti Kingdom Hall iti Isuamin
BAYAT a sansanayenna dagiti adalanna iti ministerio iti publiko, imparegta ni Jesu-Kristo a ‘mangasabada kadagiti tuktok ti balbalay.’ (Mateo 10:27) Wen, aramidenda ti Nakristianuan a ministerioda iti imatang ti publiko. Maitunos iti prinsipio dayta a balakad, saan a nalimed ti aktibidad dagiti Saksi ni Jehova. Gapu iti daytoy, napagballigian dagiti Saksi ti ibubusor ken naaddaanda iti paborable a pakasaritaan.
Nupay silulukat iti publiko ti gimong dagiti Saksi ni Jehova, ti pammadakes ti makagapu nga agalikaka ti dadduma a sumrek iti Kingdom Hall. Pudno daytoy idiay Finland. Adda dagiti tattao a bumdeng a mapan kadagiti baro a lugar. No adda Kingdom Hall a kaibangbangon wenno napabaro, kaaduanna nga adda maangay nga open house (adda mayawis iti publiko a panagpasiar iti intero a pasdek ken panagmerienda). Nalabit maaramid ti naisangsangayan a panangikagumaan a mangawis kadagiti kaarruba a bumisita iti Kingdom Hall tapno maammuanda ti aktibidad dagiti Saksi ni Jehova.
Iti maysa a lugar, nangyurnos dagiti Saksi iti kampania a panagiwaras iti magasin iti aldaw a naangay ti open house iti kaibangbangonda a Kingdom Hall. Nakasao ti dua a Saksi ti maysa a lakay a nagkuna a naragsakan a nangbasa iti magasin a Pagwanawanan ken Agriingkayo! Dinakamat dagiti kakabsat ti maipapan iti open house ken inawisda iti Kingdom Hall. Kinuna ti lakay a pakaragsakanna ti umay. Nangngeg ti asawana dayta a saritaan, isu a kiniddawna, “Kayatko met ti umay!”
Apaman a nakastrekda iti Kingdom Hall, kinita ti lakay ti aglikmut ket kinunana: “Saan met gayam a nasipnget. Nagpintas ken naraniag met gayam. Kinunada kaniak a nasipnget ti Kingdom Hall!” Saan a dagus a pimmanaw ti agassawa ken nagkiddawda iti sumagmamano a literatura a nakaparang.
Maysa a kongregasion ti nagtarigagay a mayanunsio iti lokal a periodiko ti maysa nga open house bayat ti dedikasion ti Kingdom Hall-da. Apaman a napakaammuan maipapan iti okasion, ti mangidadaulo nga editor insingasingna kadagiti Saksi ti pannakaputar ti maysa nga artikulo maipapan iti dedikasion. Immanamong dagiti kakabsat, ket di nagbayag, nagparang iti periodiko ti paborable a kagudua panid nga artikulo, a mangipakpakaammo iti okasion ken dagiti aktibidad ti lokal a kongregasion dagiti Saksi ni Jehova.
Kalpasan a naipablaak ti artikulo, nakasao ti maysa a nataengan a Saksi ti maysa a kaarrubana a nagkuna kenkuana: “Adda nagsayaat nga artikulo maipapan kadagiti Saksi ni Jehova iti periodiko ita nga aldaw!” Nangasaba ti kabsat ket kalpasanna pinaimaanna ti kaarrubana iti broshur a Jehovah’s Witnesses in the Twentieth Century.
Malaksid a nalawlawagan dagiti di umiso a kapanunotan maipapan kadagiti Saksi ni Jehova, dagiti kasta nga urnos mainaig kadagiti open house ken programa ti dedikasion dagiti baro a Kingdom Hall pinaregtada dagiti agibumbunannag a mangawis iti ad-adu pay a tattao a tumabuno kadagiti gimong. Wen, kadagiti adu a pagilian, agraman ti Finland, naammuan dagiti tattao a silulukat iti isuamin dagiti Kingdom Hall dagiti Saksi ni Jehova.