“Umadanikayo iti Dios, ket Isu Umadaninto Kadakayo”
Sakbay ken Kalpasan—Agtigtignay ti Sao ti Dios
NO NAAM-AMMOYO ni Tony bayat ti kinatin-edyerna, makitayo ti maysa a nagubsang ken naranggas a barito a masansan nga agpasiar kadagiti dakes ti pakasarsaritaanda a lugar iti Sydney, Australia. Kabarkadana dagiti miembro ti gang. Masansan a karamanda kadagiti panagtakaw, rinnisiris dagiti gang, ken pinnaltogan iti lansangan.
Nangrugi nga agsigarilio ni Tony idi agtawen iti siam. Idi agedad iti 14, regular nga agmarihuana ken imoral ti biagna. Idi agtawen iti 16, adikton iti heroin, ket daytoy ti nangituggod kenkuana nga agusar iti cocaine, LSD—“kinapudnona, iti aniaman a mangted kaniak iti agkalkallautang a rikna,” kinuna ni Tony. Nagbalin ngarud a suplayer ti droga iti nagbaetan ti dua nga agdindinamag a sindikato ti krimen. Di nagbayag, nagbalin ni Tony kas maysa kadagiti mapagpannurayan a suplayer ti droga iti makindaya a kosta ti Australia.
Inaldaw nga aggasto ni Tony iti $160 (U.S.) agingga $320 (U.S.) tapno mapennekna ti pannakaadiktona iti heroin ken marihuana. Ngem nakarkaro pay ngem iti dayta ti epektona iti pamiliana. Kunana: “Adu a gundaway nga adda paltog wenno kutsilio a maipaturong kadakami ken ni baketko babaen dagiti kriminal a mangsapsapul kadagiti droga ken kuarta nga adda iti pagtaenganmi.” Kalpasan ti namitlo a pannakaibalud, natignay ni Tony a mangusig iti turong ti biagna.
Nupay makimismisa idi, marikna ti Tony a kasla nayadayo iti Dios a maipagarup nga agnanayon a mangtutuok kadagiti managbasol iti umap-apuy nga impierno kas pannusa. Ngem idi nakasarita ti dua a Saksi ni Jehova, nasdaaw ni Tony a makaammo a saan a kasta ti Dios. Ken maragsakan ni Tony ta mabalinna gayam nga ilinteg ti biagna ken matagiragsakna dagiti bendision ti Dios. Natignay ni Tony kadagiti sasao ni Jesu-Kristo: “Amin a bambanag mabalin iti Dios.” (Marcos 10:27) Nangnangruna a natukay ni Tony kadagiti makaliwliwa a sasao: “Umadanikayo iti Dios, ket isu umadaninto kadakayo.”—Santiago 4:8.
Masapul a sanguen itan ni Tony ti karit a panangitunos iti biagna kadagiti pagalagadan ti Biblia. Kunana: “Immuna nga insardengko ti panagsigarilio, banag a diak pulos maaramidan idi, nupay adu a daras a pinadasko. Babaen ti bileg a naggapu ken Jehova, nabaelak nga insardeng ti agusar iti heroin ken marihuana, ti pannakaadikto iti droga a nakaisagmakak iti naglabas a 15 a tawen. Diak pulos pinanunot a posible gayam ti lumapsut kadagitoy a bisio.”
Imbes nga agbuteng iti maysa a Dios nga agnanayon kano a mangtuok kadagiti tattao idiay impierno—ti doktrina a di pulos masarakan iti Biblia—nasursuro da Tony ken ni baketna ti namnama a biag nga agnanayon iti paraiso a daga. (Salmo 37:10, 11; Proverbio 2:21) “Kinalikagumanna ti adu a panawen ken napasnek a panagregget tapno maitunosko ti panagbiagko kadagiti pagalagadan ti Dios,” inadmitir ni Tony, “ngem nagballigiak gapu iti tulong ni Jehova.”
Wen, nagbalin a Kristiano daytoy dati nga adikto iti droga. Inusarda nga agassawa ti tiempo ken material nga ik-ikutanda iti panagboluntario. Nangbusbosda iti rinibu nga oras a nangisuro iti Biblia. Okupadoda met a mangpadpadakkel iti dua a managbuteng iti Dios nga annakda. Daytoy a dakkel a panagbalbaliw ket maigapu iti di malapdan a pannakabalin ti Sao ti Dios, ti Biblia. Kinapudnona, kas kinuna ni apostol Pablo, “ti sao ti Dios nabiag ken adda bilegna.”—Hebreo 4:12.
Iti laksid dagita a positibo a pagarigan, di nainkalintegan a kunaen ti dadduma a makadadael kadagiti pamilia ken kadagiti naimbag nga ugali dagiti agtutubo ti naibatay-Biblia a panangisuro dagiti Saksi Jehova. Sigurado a paneknekan ti napasamak ken ni Tony nga ulbod dayta a pammabasol.
Kas ken Tony, naadal ti adu a tattao a mabalin a maisardeng ti makapapatay a pannakaadikto. Kasano? Babaen ti pammati iti Dios ken panagtalek kenkuana ken iti Saona, agraman ti suporta dagiti maseknan ken naayat a Kristiano a kakabsat. Siraragsak nga inngudo ni Tony: “Nakitak no kasano a nasalakniban dagiti annakko babaen dagiti prinsipio ti Biblia. Insalbar ti Biblia ti panagasawak. Ken nalaklaka ita a makaturog dagiti kaarrubak gapu ta saanakon a pangta kadakuada.”
[Blurb iti panid 9]
‘Babaen ti bileg a naggapu ken Jehova, nabaelak nga inwaksi ti bisiok a droga a nakaisagmakak iti 15 a tawen’
[Kahon iti panid 9]
Dagiti Epektibo a Prinsipio ti Biblia
Ti nadumaduma a prinsipio iti Biblia ti timmulong iti adu nga adikto iti droga tapno maisardengda daytoy makadadael a bisio. Karaman kadagitoy a prinsipio dagiti sumaganad:
“Dalusantayo koma ti bagbagitayo iti tunggal pakatulawan iti lasag ken iti espiritu, nga an-anayentayo ti kinasanto iti panagbuteng iti Dios.” (2 Corinto 7:1) Iparit ti linteg ti Dios ti panagdroga.
“Ti panagbuteng ken Jehova isu ti rugi ti sirib, ket ti pannakaammo iti Daydiay Kasasantuan isu ti pannakaawat.” (Proverbio 9:10) Ti panagamanga ken ni Jehova a naibatay iti umiso a pannakaammo kenkuana ken kadagiti dalanna ket nakatulong iti adu a tattao a lumapsut manipud iti impluensia ti droga.
“Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” (Proverbio 3:5, 6) Mabalin a maisardeng dagiti mangdadael a bisio babaen ti napasnek a panagtalek iti Dios ken naan-anay a panagpannuray kenkuana.