“Uminum iti Maminsan Pay”

NANGRUGI nga agbartek ni Allen idi agtawen iti 11.a Nagay-ayam iti kakaykaywan a kadua dagiti gagayyemna, a tultuladenda dagiti mabuybuyada iti sine. Saan nga agpayso dagiti karakter a tultuladenda, ngem agpayso ti arak nga ininum ni Allen ken dagiti gagayyemna.

Agtawen ni Tony iti 40 idi in-inut nga immadu ti in-inumenna iti rinabii manipud maysa wenno dua agingga a nagbalin a lima wenno innem a bote ti serbesa wenno kopita ti naingel nga arak. Idi agangay, dina ammon ti kaadu ti main-inumna iti kada aldaw.

Nagpatulong ni Allen tapno maisardengna ti kinamangnginumna. Linaksid ni Tony ti tulong dagiti maseknan a kapamilia ken gagayyemna. Sibibiag pay ni Allen a mangestoria iti kapadasanna; natay ni Tony sumagmamano a tawen ti napalabas idi naaksidente iti motor gapu iti nalabes a panaginumna.

Uray no bukbukod ti maysa ti aginum iti nalabes, sigurado a maapektaranna ti biag ti sabsabali, a masansan a nakalkaldaang ti resultana.b Ti nalabes a panaginum ti masansan a pakaigapuan ti kinagubsang, kinaranggas, panagabuso, panangpapatay, aksidente iti lugan ken iti trabaho, agraman ti adu a parikut iti salun-at. Kada tawen, binilbilion a doliar ti magasgastos gapu iti nalabes a panaginum, malaksid laeng iti personal ken emosional nga epektona kadagiti indibidual, pamilia, ken annak.

Nupay kasta, kuna ti U.S. National Institutes of Health a “saan nga amin a regular nga umin-inum ket addaan iti parikut iti panaginum, ken saan nga amin nga addaan parikut iti panaginum ket saanda nga inaldaw nga umin-inum.” Adu ti saan a dati nga alkoholiko ngem in-inut a nayugalida ti nalabes a panaginum. Dadduma ti sagpaminsan nga uminum ngem nasursurok ngem lima a tagay ti inumenda iti maysa la a gundaway.

No uminumka iti arak, kasano kaadu ti makuna a nalabes? Kasanom nga ammo no kaano a dikan “uminum iti maminsan pay”? (Proverbio 23:29, 30, Contemporary English Version) Mausig kadagiti sumaganad nga artikulo dagiti makatulong nga impormasion maipanggep iti daytoy a topiko.

[Footnotes]