No Kasano a Maaddaan iti Natimbeng a Panangmatmat iti Trabaho
ITI panawentayo a nakaro ti pakarigatan iti sangalubongan a merkado, agresibo a kompetision, ken nawadwad a panagpataud iti produkto, adu ti matartaramnay nga agtrabaho iti inaldaw. Ngem rumbeng a tagiragsakentayo ti trabahotayo. Apay? Agsipud ta naparsuatayo iti ladawan ti Dios—ket ti Dios maragsakan iti trabahona. Kas pagarigan, iti panangusigna iti naaramidanna iti ngudo ti innem nga “aldaw,” wenno naunday a tiempo a panamarsua, “nakita ti Dios ti isuamin nga inaramidna ket, adtoy! nasayaat unay dayta,” kuna ti Genesis 1:31.
Awan duadua a ti panangipateg ni Jehova iti trabaho ti maysa a rason a naawagan iti “naragsak a Dios.” (1 Timoteo 1:11) No kasta, saan kadi a rasonable a no ad-adda a tuladentayo ti Dios, ad-adda met nga agbalintayo a naragsak? Mainaig iti daytoy, insurat ni Ari Solomon ti nagkauna nga Israel, maysa a naisangsangayan a managibangon ken organisador: “Tunggal tao mangan ken pudno nga uminum ken makakita iti imbag iti isuamin a napinget a panagtrabahona. Dayta ti sagut ti Dios.”—Eclesiastes 3:13.
Mabalin a narigat ti maaddaan iti natimbeng, nasayaat a panangmatmat iti trabaho iti kaaldawantayo a napartak ti panagbalbaliw iti pagtrabahuan. Ngem bendisionan ni Jehova dagidiay mangipangag iti naayat a panangiwanwanna. (Salmo 119:99, 100) Agbalinda a napateg ken mapagtalkan nga empleado isu a saanda a kaskarina a mapukawan iti panggedan. Masursuroda met ti maaddaan saan laeng nga iti namaterialan no di ket naespirituan a panangmatmat iti biag ken trabahoda. Daytoy ti tumulong kadakuada a mangaramid kadagiti umiso a desision iti biagda ken mangmatmat a ti kinaragsak ken kinatalgedda ket saan nga agpannuray iti trabahoda wenno iti masansan a di natalged a trabaho. (Mateo 6:31-33; 1 Corinto 2:14, 15) Tumulong dayta kadakuada a maaddaan iti pudno a natimbeng a kababalin iti panagtrabaho.
Maaddaan iti Nadiosan a Kababalin iti Panagtrabaho
Adda dagiti tao a nakaro ti kinagagetda, nga ipangpangrunada ti trabaho. Adda met dagidiay aggagar a malpas koman ti trabahoda tapno makaawiddan. Ania ti natimbeng a panangmatmat? Sumungbat ti Biblia: “Nasaysayaat ti sangarakem nga inana ngem iti dua a rakem a napinget a panagtrabaho ken panangkamkamat iti angin.” (Eclesiastes 4:6) Kinapudnona, mangyeg iti parikut ti nalabes ken napaut unay a panagtrabaho—awan mamaayna a “panangkamkamat iti angin.” Apay? Agsipud ta mabalin a madadael dagiti mismo a banag a kangrunaan a mangparagsak kadatayo: ti relasiontayo iti kapamilia ken gagayyemtayo, ti espiritualidad, salun-at, ken ti mismo a biagtayo. (1 Timoteo 6:9, 10) Ti natimbeng a panangmatmat isu ti pannakakontento kadagiti kalkalainganna a sanikua bayat a tagiragsaken ti rasonable a kinatalna, imbes a madagsenan iti ad-adu a trabaho a napakuyogan iti riribuk ken ladingit.
Nupay iparparegtana ti natimbeng a panangmatmat iti trabaho, saan nga anamongan ti Biblia ti kinasadut. (Proverbio 20:4) Ti kinasadut dadaelenna ti panagraem iti bagi ken ti panagraem kadatayo ti sabsabali. Nakarkaro pay, dadaelenna ti relasiontayo iti Dios. Sipaprangka nga ibaga ti Biblia a ti tao nga agkedked nga agtrabaho saan a maikari a mangan iti saanna a nagbannogan. (2 Tesalonica 3:10) Imbes a kasta, nasken a baliwanna ti kababalinna ket igaedna ti agtrabaho, iti kasta sidadayaw a masustentuanna ti bagina ken dagiti supsuportaranna. Babaen ti naanep a panagtrabaho, mabalin a matulonganna pay dagidiay talaga nga agkasapulan—aramid nga iparparegta ti Sao ti Dios.—Proverbio 21:25, 26; Efeso 4:28.
Nasanay Manipud Kinaubing a Mangipateg iti Trabaho
Saan nga automatiko ti maaddaan kadagiti nasayaat nga ugali iti panagtrabaho; masursuro dayta manipud kinaubing. Gapuna, bagbagaan ti Biblia dagiti nagannak: “Sanayem ti ubing sigun iti dalan nga agpaay kenkuana; uray no lumakay saanto a sumiasi iti dayta.” (Proverbio 22:6) Malaksid a mangipakitada iti nasayaat nga ulidan kas mangmangged a mismo, rugian dagiti masirib a nagannak a sanayen dagiti annakda babaen ti panangted kadakuada iti trabaho iti pagtaengan a maitutop iti edadda. Nupay adda dagiti trabaho a karurod nga aramiden dagiti annak, matmatandanto ti bagbagida kas napateg a kameng ti pamilia—nangruna no padayawan ida dagiti dadakkelda gapu iti nasayaat a trabahoda. Ngem makapaladingit ta adda dagiti nagannak a mangaramid iti nganngani amin a banag para kadagiti annakda, nalabit gapu iti di umiso a kinamanangngaasi. Nasayaat nga utoben koma dagita a nagannak ti Proverbio 29:21, nga agkuna iti kastoy: “No ti maysa pampanuynoyanna ti adipenna [wenno anakna] manipud pay kinaagtutubo, iti maud-udi a panagbiagna isu agbalinto pay nga awanan panagyaman.”
Dagiti responsable a nagannak maseknanda met iti panageskuela dagiti annakda, a paregtaenda ida a siaanep nga agadal ken agtrabaho bayat nga addada iti eskuelaan. Makatulong dayta kadagiti agtutubo no agtrabahodanton.
Agmasirib iti Panagpili iti Trabaho
Nupay saanna nga ibaga kadatayo no ania a kita ti trabaho ti serkan, ipaayannatayo ti Biblia kadagiti nasayaat a pagannurotan tapno saan a maikompromiso ti naespirituan nga irarang-aytayo, ti panagserbitayo iti Dios, ken dagiti dadduma pay a napapateg nga annongentayo. Kas pagarigan, insurat ni apostol Pablo: “Ti tiempo a nabati ket ababan. Manipud ita dagiti . . . mangus-usar iti lubong [agbalinda koma a] kas kadagidiay di mangus-usar a naan-anay iti dayta; ta ti buya daytoy a lubong agbaliwbaliw.” (1 Corinto 7:29-31) Awan ti permanente wenno naan-anay a natalged iti agdama a sistema ti bambanag. Ti panangipaay iti amin a tiempo ken pigsatayo iti dayta ket kasla panangipuonan iti amin nga urnongtayo iti balay a naibangon iti malaylayus a lugar. Anian a minamaag a panagpuonan!
Iti dadduma a bersion ti Biblia, naipatarus ti sasao a “di mangus-usar a naan-anay iti dayta” kas “saan a naigamer iti dayta” ken “saan a naan-anay a naipamaysa kadagita.” (The Jerusalem Bible; Today’s English Version) Dagiti masirib a tattao saanda a malipatan ti kinapudno a ti tiempo “ket ababa” para iti agdama a sistema ket ti ‘pannakaigamer,’ wenno ‘naan-anay a pannakaipamaysa,’ iti dayta sigurado nga agtungpalto iti pannakapaay ken panagbabawi.—1 Juan 2:15-17.
‘Ti Dios Saannakanto Pulos Baybay-an’
Ad-adda nga ammo ni Jehova dagiti kasapulantayo ngem kadatayo. Ammona met no sadinon ti ayantayo iti ayus ti panawen iti kaitungpalan ti panggepna. Gapuna, ipalagipna kadatayo: “Ti wagas ti panagbiagyo siwayawaya koma iti panagayat iti kuarta, bayat a mapnekkayo iti agdama a bambanag. Ta [ti Dios] kinunana: ‘Saankanto a pulos panawan ket saankanto a pulos baybay-an.’” (Hebreo 13:5) Anian a makaliwliwa dagita a sasao! Tinulad ni Jesus ti naayat a pannakaseknan ti Dios iti ilina. Iti adu a paset ti natan-ok a Sermonna iti Bantay, insurona kadagiti adalanna ti umiso a panangmatmat iti trabaho ken iti material a bambanag.—Mateo 6:19-33.
Ikagkagumaan dagiti Saksi ni Jehova nga ipangag dagita a sursuro. Kas pagarigan, nagkedked ti maysa nga elektrisian a Saksi idi kiddawen ti amona a regular nga agtrabaho iti ad-adu nga oras. Apay? Agsipud ta saanna a kayat ti mangged iti tiempo a busbusbosenna para iti pamiliana ken kadagiti naespirituan a banag. Agsipud ta nalaing ken mapagpiaran nga empleado, rinaem ti amo ti pagayatanna. Siempre, saan a kanayon a kasta ti resulta. Mabalin a ti maysa kasapulan nga agsapul iti sabali a trabaho tapno mataginayonna ti natimbeng a panagbiag. Nupay kasta, dagidiay naan-anay nga agtalek ken Jehova ket masansan a paboran dagiti amoda gapu iti nasayaat nga ugali ken kababalinda iti trabaho.—Proverbio 3:5, 6.
Inton Agbalin a Makagunggona ti Amin a Trabaho
Iti agdama ken adda pagkuranganna a sistema ti bambanag, adda latta dagiti parikut ken saan a sigurado dagiti bambanag no maipapan iti trabaho ken kaadda ti panggedan. Kinapudnona, mabalin a dumakes ti bambanag bayat nga agbalin nga ad-adda a di natalged ti lubong ken rumigrigat ti ekonomia wenno mapaay pay ketdi. Ngem temporario daytoy a kasasaad. Din agbayag, addanto trabaho ti amin. Malaksid iti dayta, nakaay-ayat ken makagunggonanto ti amin a trabaho. Kasano a posible dayta? Ania ti mangyeg iti kasta a panagbalbaliw?
Babaen ti propetana a ni Isaias, impakaammo ni Jehova ti iyaay dayta a tiempo. “Mangparsuaak iti baro a langlangit ken baro a daga,” kinuna ni Jehova, “ket dagiti immun-una a banag saandanto a maipalagip, saandanto met a tumpuar iti puso.” (Isaias 65:17) Tuktukoyenna ti maysa a baro a gobiernona, nga iti sidong dayta pumaysonto ti maysa a naan-anay a baro ken naiduma a kagimongan.—Daniel 2:44.
No maipapan iti panagbiag ken panagtrabahonto dagiti tattao, kuna pay ti padto: “Pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan. Ta kas iti al-aldaw ti maysa a kayo kastanto ti al-aldaw ti ilik; ket ti aramid dagiti bukodda nga ima usarento a naan-anay dagidiay pinilik. Saandanto nga agbannog iti awan kapapay-anna, saandanto met a mangyanak maipaay iti riribuk; agsipud ta isuda ti putot a buklen dagidiay bendito ni Jehova, ken dagiti kaputotanda a maikuyog kadakuada.”—Isaias 65:21-23.
Anian a nagdakkel a panagbalbaliw ti aramidento ti baro a lubong a dinisenio ti Dios! Saan kadi a kayatyo ti agbiag iti kasta a lubong, a dikayto “agbannog iti awan kapapay-anna” no di ket naan-anay a tagiragsakenyonto ti “bunga” ti bannogyo? Ngem imutektekanyo no siasino dagiti mangtagiragsak kadagita a bendision: “Isuda ti putot a buklen dagidiay bendito ni Jehova.” Mabalinyo ti agbalin a maysa kadagita a “bendito” babaen ti panangadalyo iti maipapan ken ni Jehova ken panangtungpal kadagiti bilinna. Kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Maragsakan dagiti Saksi ni Jehova a tumulong kadakayo a gumun-od iti dayta mangted-biag a pannakaammo babaen ti sistematiko a panagadal iti Sao ti Dios, ti Biblia.
[Kahon iti panid 6]
“Kankanayon A Matarigagayanda”
“Aniaman ti ar-aramidenyo, aramidenyo dayta nga amin-kararua a kas maipaay ken Jehova, ket saan a maipaay iti tattao,” kuna ti Biblia. (Colosas 3:23) Nalawag nga agbalin a matarigagayan nga empleado ti maysa a ti kababalinna nga agtrabaho ket iturturong ti kastoy a nasayaat a prinsipio. Gapu iti dayta a rason, iti librona a How to Be Invisible, binalakadan ni J. J. Luna dagiti agsapsapul iti trabahador a sapulenda dagiti aktibo a miembro dagiti narelihiosuan a grupo, ngem innayonna: “Iti kinapudnona, masansan a dagiti Saksi [ni Jehova] ti mapilitayo.” Ti maysa kadagiti imbagana a rason, agdindinamag ti kinamapagpiaranda, isu a “kankanayon a matarigagayanda” iti nagduduma a kita ti trabaho.
[Dagiti Ladawan iti panid 5]
Mangyeg iti pannakapnek ti panangtimbeng iti trabaho babaen dagiti nateokratikuan nga aktibidad ken panaglinglingay