Malagipyo Pay Kadi?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaentayo no masungbatanyo dagiti sumaganad a saludsod:

• Kasano a magunggonaantayo iti naadaltayo maipapan iti pamilia ni Safan?

Nagserbi ni Safan kas taga kopia ken sekretario ni Ari Josias ti Juda. Ni Safan ket maysa a naimpluensia a tao iti pagarian. Sinuportaranna ti kampania ti ari a mangisubli iti pudno a panagdayaw. Dagiti dua nga annak a lallaki ni Safan nagtalinaedda a nasungdo ken ni propeta Jeremias. Ken maysa pay nga anakna ken dua nga appokona a lallaki ti nangusar met iti impluensiada maipaay iti pudno a panagdayaw. Kasta met, rumbeng nga usarentayo dagiti kapasidad ken impluensiatayo a mangitandudo iti pudno a panagdayaw.​—12/15, panid 19-22.

• Kasano a napagballigian ni Irene Hochstenbach ti dakkel a pisikal a pakalappedan ket nakapagserbi ken ni Jehova?

Nagbalin a tuleng ni Irene idi agtawen iti pito. Nupay kasta, nasursurona ti makisarita iti sabsabali ken kadkaduaanna ita ti asawana (maysa nga agdaldaliasat a manangaywan) bayat ti panagbisitana kadagiti kongregasion idiay Netherlands.​—1/1, panid 23-6.

• Ania dagiti dua a baro a katulongan iti panagadal a nairuar kadagiti “Dagiti Naregta a Manangiwaragawag iti Pagarian” a Kombension Distrito?

Dagiti Kristiano iti sangalubongan naragsakanda a nangawat iti libro nga Agdayawkayo iti Maymaysa a Pudno a Dios, a nairanta a maiyadal kadagiti kabbaro kalpasan a napagadalanda ti libro a Pannakaammo a Mangiturong iti Biag nga Agnanayon; ti Umadanika ken Jehova ti sabali pay a baro a libro, a naipamaysa kadagiti galad ken pannakilangen ni Jehova. Ipakitana met no kasano a matuladtayo ti panangiparangarang ni Jehova kadagiti galadna.​—1/15, panid 23-4.

• Ania ti anag ti Proverbio 12:5: “Ti pampanunot dagidiay nalinteg ket hustisia”?

Uray ti pampanunot dagiti naimbag a tattao nasalun-atda iti moral ken naiturongda iti umiso ken nalinteg. Yantangay natignay dagiti nalinteg gapu iti panagayatda iti Dios ken kadagiti padada a tattao, nasayaat dagiti panggepda.​—1/15, panid 30.

• Ania ti makatulong iti maysa a tao a mangsukay iti natimbeng a panangmatmat iti trabaho?

Makatulong ti pannakasanay manipud kinaubing tapno maipateg ti trabaho. Idagdagadag ti Biblia a maaddaantayo iti nasayaat a disiplina iti panagtrabaho, a liklikan ti kinasadut. (Proverbio 20:4) Parparegtaenna met dagiti Kristiano a dida koma agbalin nga okupado unay iti panggedan. Nasken a bigbigentayo a maikari nga ipangpangruna iti biagtayo ti panagserbi iti Dios. (1 Corinto 7:29-31) Kanayonanna, agtalek dagiti pudno a Kristiano a saan ida a baybay-an ti Dios.​—2/1, panid 4-6.

• Kaano a damo a nadakamat ti altar iti Biblia?

Damo a nadakamat iti Genesis 8:20, a tumuktukoy iti altar nga imbangon ni Noe idi panawanna ti daong kalpasan ti Delubio. Ngem mabalin a nangusar da Cain ken Abel iti altar idi nangidatagda iti daton. (Genesis 4:3, 4)​—2/15, panid 28.

• Kasano a nainsiriban a magundawayan dagiti Kristiano dagiti agbalbaliw a kasasaad?

Adda dagiti nanggundaway​—wenno nangyussuat​—kadagiti panagbalbaliw iti panggedanda tapno ad-adu a tiempo ti mausarda iti ministerio. Dagiti dadduma ninayonanda ti tiempo ken ti pribilehioda iti panagserbi iti Dios no maksayan dagiti annongenda iti pamilia, kas no nataenganen wenno nakiasawan dagiti annakda.​—3/1, panid 19-22.

• Kasano a dagiti ulidan da Jonas ken apostol Pedro tumulong kadatayo a mangmatmat kadagiti sabsabali a kas iti panangmatmat ni Jehova kadakuada?

Da Jonas ken Pedro agpada nga addaanda iti nabatad a pagkapuyan iti panagpampanunot ken iti panagtignayda kadagiti pannubok iti pammati ken panagtulnog. Ngem sibabatad a nakita ni Jehova dagiti naimbag a galadda ken intultuloyna nga inusar ida nga agserbi kenkuana. No adda dagiti mangupay wenno mangpaay kadatayo, mabalin a panunotentayo dagiti nakitatayo a naimbag a galadda ken ti naimbag a makitkita ti Dios kadakuada.​—3/15, panid 16-19.

• Apay nga agsasabali ti pannakanumero ti libro dagiti Salmo iti nadumaduma a patarus ti Biblia?

Adda nagdumaan ti pannakanumero ti libro iti orihinal a Hebreo a lenguahe ken iti pannakaipatarus dayta iti Griego iti Septuagint. Mabalin nga agduma ti adu a nabiit pay a patarus, depende no naibatayda iti Hebreo a teksto wenno iti Septuagint.​—4/1, panid 31.