Ipatpateg ni Jehova Dagiti Gagangay a Tattao

MASAPUL kadi a naidumduma wenno naisangsangayantayo tapno asikasuennatayo ti Dios? Naadaw ti kinuna ti maika-16 a presidente ti Estados Unidos a ni Abraham Lincoln: “Kaykayat ti Apo dagiti gagangay a tattao. Isu nga adu ti inaramidna a kakasta a tattao.” Adu ti mangipagarup a gagangayda laeng a tattao nga awanan iti maipagpannakkel. Ti panagbalin a gagangay mabalin nga ipasimudaagna ti panagbalin a “nakurapay, nanumo.” Kasta met, ti sao a “gagangay” mabalin nga ipamatmatna ti “kinaawan iti pribilehio wenno naisangsangayan a saad,” “panagbalin a kadawyan,” wenno “segunda klase” pay ketdi. Ania a kita ti tattao ti kaykayatmo a kalangen? Napangas, naturay, napasindayag a tattao? Saan kadi a kaykayatmo a kalangen dagiti mannakigayyem, napakumbaba, nanumo a tattao nga addaan iti napasnek ken naimpusuan a pannakaseknan kadagiti dadduma?

Yantangay kadawyan ditoy lubong ita ti panangirurumen ken pananglais, narigat a patien dagiti dadduma a maseknan ti Dios kadakuada. “Nagtaudak iti pamilia a di unay mangipakpakita iti ayat. Tinagibassit, rinabrabak, ken pinagang-angawandak. Isu a manipud kinaubingko, mariknak nga awan serserbik,” insurat ti maysa a managbasa iti daytoy a magasin. “Adda pay laeng dagiti nasaem a riknak iti napalabas a mangupay kaniak no adda problemak.” Nupay kasta, adda pamatiantayo a maseknan ti Dios kadagiti gagangay a tattao.

Pannakaseknan ti Dios Kadagiti Gagangay a Tattao

“Ni Jehova naindaklan ken maidaydayaw iti kasta unay, ket ti kinanaindaklanna di masukimat,” insurat ni Ari David. (Salmo 145:3) Nupay kasta, saan a daytoy ti manglapped ken Jehova tapno siaayat ken siaasi a maseknan kadatayo. (1 Pedro 5:7) Kas pagarigan, kinuna ti salmista: “Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.”​—Salmo 34:18.

Saan a napateg iti Dios dagiti banag a pakaawisan dagiti tattao ditoy lubong, kas iti pisikal a kinapintas, dayaw, wenno kinabaknang. Ti Linteg ti Dios iti Israel ipakitana ti panangngaasi ti Dios kadagiti napanglaw, ulila, balo, ken ganggannaet. Kinuna ti Dios kadagiti Israelita, a nairurumen idi idiay Egipto: “Dika ikuspil ti maysa a ganggannaet nga agnanaed wenno irurumen . . . Dikay parigaten ti asinoman a balo a babai wenno awan amana nga ubing. No parigatem latta, ngarud no umkis latta kaniak, di bumurong a denggek ti ikkisna.” (Exodo 22:21-24) Maysa pay, inyebkas ni propeta Isaias ti panagtalekna iti panangaywan ti Dios kadagiti nanumo: “Nagbalinka a salindeg iti daydiay nanumo, salindeg iti daydiay napanglaw iti pannakaparigatna, kamang manipud natutudo a bagyo, linong manipud iti pudot, inton ti pug-aw dagidiay manangikuspil ket kas iti natutudo a bagyo a bumusor iti pader.”​—Isaias 25:4.

Iti intero a ministeriona, ni Jesu-Kristo, “ti apag-isu a ladawan” ti Dios, ket nagbalin nga ulidan kadagiti adalanna iti panangipakita iti napaypayso a pannakaseknan kadagiti gagangay a tattao. (Hebreo 1:3) Idi makita ni Jesus dagiti tattao a ‘nalalatan ken naiwarawara a kasla karkarnero nga awanan pastor,’ “simnek ti asina kadakuada.”​—Mateo 9:36.

Imutektekam met no ania a kita ti tattao ti pinili ni Jesus kas apostolna​—tattao a nadeskribir kas “awan adalna ken gagangay.” (Aramid 4:13) Kalpasan ti ipapatay ni Jesus, rinugian dagiti pasurotna nga awisen dagiti amin a kita ti tattao a dumngeg iti Sao ti Dios. Insurat ni apostol Pablo a mabalin “ti asinoman a di manamati wenno kadawyan a tao” ti makitimpuyog iti kongregasion Kristiano ken agbalin a manamati. (1 Corinto 14:24, 25) Imbes a dagidiay laeng madaydayaw sigun kadagiti nailubongan a pagrukodan ti pilien ti Dios, adu a gagangay a tattao ti pinili ti Dios nga agserbi kenkuana. Kinuna ni apostol Pablo: “Makitayo ti panangayabna kadakayo, kakabsat, a saan nga adu a mamasirib iti nainlasagan a pamay-an ti naayaban, saan nga adu a mannakabalin, saan nga adu a natan-ok pannakayanakna; no di ket ti Dios pinilina ti minamaag a bambanag ti lubong, tapno maibabainna dagiti masirib a tattao; ket ti Dios pinilina ti nakapuy a bambanag ti lubong, tapno maibabainna ti napigsa a bambanag; ket ti Dios pinilina ti awan mamaayna a bambanag ti lubong ken ti bambanag a maum-umsi, ti bambanag nga awan, tapno pukawenna ti bambanag nga adda, tapno iti kasta awan ti lasag a makapagpasindayag iti imatang ti Dios.”​—1 Corinto 1:26-29.

Sipapasnek met a maseknan ti Dios kadatayo ita. Pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:4) No kasta unay ti panagayat ti Dios iti sangatauan nga imbaonna ti Anakna ditoy daga tapno matay gapu kadatayo, awan rasontayo a makarikna a saantayo a maipatpateg wenno awan serserbitayo. (Juan 3:16) Impakita ni Jesu-Kristo kadagiti pasurotna ti kinapateg ti panangtrato uray ti kanunumuan kadagiti naespirituan a kakabsatna iti wagas a kas man la ni Jesus a mismo ti pakilanglangenanda. Kinunana: “No kasano nga inaramidyo dayta iti maysa kadagiti kanunumuan kadagitoy kakabsatko, inaramidyo dayta kaniak.” (Mateo 25:40) Uray kasano ti panangmatmat ti lubong kadatayo, no ipatpategtayo ti kinapudno, napategtayo iti imatang ti Dios.

Kasta ti narikna ni Francisco,a maysa nga awanan ama nga ubing a lalaki a taga Brazil, idi napatanorna ti personal a relasionna iti Dios. Kinunana: “Idi naam-ammok ni Jehova ken ti organisasionna, natalgeden ti riknak ken saanakon a managbabain. Naadalko a maseknan ni Jehova iti tunggal maysa kadatayo.” Para ken ni Francisco, ni Jehova nagbalin a pudpudno nga Ama.

Maseknan Kadagiti Agtutubo

Pudpudno a maseknan ni Jehova kadagiti agtutubo saan laeng a kas grupo no di ket kas indibidual. Siempre, ubingtayo man wenno nataengan, saan koma a nangato ti panagkitatayo iti bagbagitayo. Nupay kasta, mabalin nga addaantayo kadagiti saguday ken galad a mausar ti Dios iti masanguanan. Ammo ni Jehova no ania a pananggugor ken panagsanay ti kasapulantayo tapno naan-anay a mausar dagiti abilidadtayo. Kas pagarigan, imutektekam ti salaysay iti 1 Samuel kapitulo 16. Yantangay kasla ad-adda a kualipikado iti imatang ni propeta Samuel dagiti dadduma a pagpilian nga agbalin nga ari ti Israel, inlawlawag ni Jehova ti makagapu iti panangpilina ken ni David, ti inaudi nga anak a lalaki ni Jesse, kas masanguanan nga ari ti Israel: “Dika kitaen ti langana ken ti kangato ti taktakderna, ta isu [ti manong ni David] linaksidko. Ta saan nga iti wagas nga ikikita ti tao ti wagas nga ikikita ti Dios, agsipud ta ti maysa laeng a tao kitaenna no ania ti agparang kadagiti mata; ngem no maipapan ken Jehova, kitaenna no ania ti puso.”​—1 Samuel 16:7.

Makapagtalek kadi dagiti agtutubo ita a pudpudno a maseknan ni Jehova kadakuada? Alaentay a pagarigan ni Ana, maysa nga agtutubo a babai a taga Brazil. Kas kadagiti adu a dadduma pay nga agtutubo, mariribukan a makakita iti kinadakes ken kinaawan hustisia. Dimteng ti tiempo nga isu agraman dagiti kakabsatna a babbai ket inkuyog ni tatangda a tumabuno kadagiti Nakristianuan a gimong. Idi agangay, naayatan kadagiti maad-adalna maipapan iti Sao ti Dios. Rinugian ni Ana a basaen ti Biblia agraman dagiti Nakristianuan a publikasion ken agkararag ken ni Jehova a Dios. In-inut a napatanorna ti nasinged a relasion iti Dios. Kinunana: “Kaay-ayok idi ti agbisikleta a mapan iti turod nga asideg iti balaymi a pangbuyaak iti nagpintas nga ilelennek ti init. Nagkararagak ken ni Jehova ken nagyamanak kenkuana gapu iti kinaimbag ken kinamanagparaburna, nga inyebkasko no kasano kadakkel ti panagayatko kenkuana. Timmalingenngen ti panunotko ken timmalged ti riknak idi naammuak ti maipapan ken ni Jehova a Dios ken dagiti panggepna.” Iwaywayaam met kadi nga utoben ti naayat a pannakaseknan ni Jehova?

Pudno, mabalin a marigatantayo a mangtagiragsak iti nasinged a relasion ken ni Jehova gapu iti nalikudantayo. Alaentay a pagarigan ni Lidia. Idi inyebkasna ken tatangna ti maysa a banag a pakaseknanna unay, di inkankano ni tatangna. “Minamaag,” kinunana. Nupay maawatan ni Lidia a kayat ni tatangna a lipatenna ti parikut, kunana: “Gapu iti panagad-adalko iti Biblia, napatgan ti amin a kalikagumko ken adu pay. Nagbalin a kasingedan a gayyemko ni Jehova gapu iti makaay-ayo a personalidadna. Addaanak itan iti naayat ken mannakaawat nga Ama a mabalinko a pangipeksaan iti rikriknak ken dagiti pakadanagak. Mabalinko ti makisao iti adu nga oras iti katan-okan a Persona iti uniberso, a masiguradok nga imdengannak.” Dagiti teksto ti Biblia kas iti Filipos 4:6, 7 ket nakatulong kenkuana a makarikna iti naayat a pannakaseknan ni Jehova. Kuna dayta a teksto: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.”

Itedna Dagiti Kasapulam

Maseknan ni Jehova kadagiti adipenna kas indibidual ken iti sangalubongan a kongregasionna. Maipakitatayo ti panagayattayo iti nailangitan nga Amatayo babaen ti panangiwayatayo a makisao kenkuana. Ditay koma pulos tagtagilag-anen ti relasiontayo kenkuana. Kanayon idi a sipapanunot ni David iti relasionna ken ni Jehova. Kinunana: “Ipakaammom kaniak dagiti bukodmo a dalan, O Jehova; isurom kaniak dagiti bukodmo a dana. Papagnaennak iti kinapudnom ket isuronak, ta sika ti Dios ti pannakaisalakanko. Kenka nanginanamaak iti intero nga agmalem.”​—Salmo 25:4, 5.

Mabalin a kabarbaro kenka ti maipapan iti panangpatanor iti nasinged a relasion iti Dios. Aniaman dagiti parikutmo, kanayon a makapagtalekka a matulongannaka ti Kangatuan, maitunos iti pagayatanna. (1 Juan 5:14, 15) Gapuna, sursuruem a pagbalinen nga espesipiko dagiti kararagmo, a panunotem dagiti kasasaad ken dagiti kasapulam.

Ti kinapateg ti panangbigbig kadagiti kasapulantayo ket naitampok iti kararag ni Ari Solomon idi inagurasion ti templo: “No kas pagarigan ti nakaro a bisin dumteng iti daga, no kas pagarigan dumteng ti angol, no kas pagarigan dumteng ti pannakakset ken buot, dagiti dudon ken dagiti ipes; no kas pagarigan lakuben ida dagiti kabusorda iti daga dagiti ruanganda​—aniaman a kita ti saplit ken aniaman a kita ti sakit​—uray ania a kararag, uray ania a panagkiddaw iti parabur ti maaramid iti biang ti asinoman a tao wenno iti intero nga ilim nga Israel, agsipud ta ammoda tunggal maysa ti bukodna a saplit ken ti bukodna a rigat . . . No kasta sika denggem koma manipud langlangit, . . . ket mamakawankanto ket itdem iti tunggal maysa ti maitunos iti amin a daldalanna.” (2 Cronicas 6:28-30) Wen, sika laeng a mismo ti ‘makaammo iti bukodmo a saplit ken bukodmo a rigat.’ Anian a nagpateg ngarud nga ipakaammom dagiti agpayso a kasapulam ken tarigagaymo. No aramidem dayta, ‘itedto ni Jehova dagiti kiddaw ta pusom.’​—Salmo 37:4.

Pabilgem ti Relasionmo ken ni Jehova

Maragsakan ni Jehova a mangpalubos kadagiti gagangay a tattao a mangtagiragsak iti nasinged a relasion kenkuana. Ipanamnama kadatayo ti Saona: “‘Agbalinakto nga ama kadakayo, ket dakayonto ti annak a lallaki ken babbai kaniak,’ kuna ni Jehova a Mannakabalin-amin.” (2 Corinto 6:18) Kinapudnona, kayat ni Jehova ken ti Anakna nga agballigitayo ken magun-odtayo ti biag nga agnanayon. Anian a makaparegta a maammuan a tulongannatayo ni Jehova a mangtungpal kadagiti rebbengentayo iti pamilia, iti panggedan, ken iti kongregasion Kristiano!

Nupay kasta, maipasangotayo amin kadagiti narikut a tiempo. Mabalin a marigatantayo gapu iti nakapuy a salun-at, parikut iti pamilia, nababa a sapul, wenno dadduma pay. Mabalin a ditay ammo no kasano a sanguen ti pannubok wenno suot. Ni Satanas a Diablo, a makigubgubat iti naespirituan a pamay-an iti ili ti Dios, ti mangpatpataud, direkta man wenno indirekta, kadagiti kumarkaro a pakarigatan. Nupay kasta, adda maysa a makatarus ken makatulong kadatayo a mangsalimetmet iti nasayaat a relasion ken ni Jehova. Awan sabali no di ni Jesu-Kristo iti natan-ok a saadna idiay langit. Mabasatayo: “Addaantayo kas nangato a padi, saan a ti maysa a saanna a mabalin ti makipagrikna kadagiti kinakapuytayo, no di ket ti maysa a nasuboken iti amin a bambanag kas kadatayo, ngem awanan basol. Ngarud, buyogen ti wayawaya nga agsao umadanitay koma iti trono ti di kaikarian a kinamanangngaasi, tapno makagun-odtayo iti asi ken makasaraktayo iti di kaikarian a kinamanangngaasi kas tulong iti umiso a tiempo.”​—Hebreo 4:15, 16.

Anian a makaliwliwa a maammuan a saan a kasapulan nga agbalintayo a nalatak wenno nabaknang tapno magun-odtayo ti pabor ti Dios! Uray no narigat ti sasaadem, tuladem ti salmista a nangikararag iti kastoy: “Naparigatanak ken napanglawak. Ni met laeng Jehova sipapanunot kaniak. Sika ti tulongko ken ti Manangilisi kaniak.” (Salmo 31:9-14; 40:17) Agtalekka nga ay-ayaten ni Jehova dagiti napakumbaba, gagangay a tattao. Wen, ‘mabalintay nga iyallatiw kenkuana ti isuamin a pakaringgorantayo, agsipud ta isu maseknan kadatayo.’​—1 Pedro 5:7.

[Footnote]

[Dagiti Ladawan iti panid 29]

Adu kadagiti pasurot ni Jesus ti awan adalna ken gagangay

[Ladawan iti panid 30]

Ikagumaan dagiti Kristiano ti maaddaan iti nabileg a pammati

[Dagiti Ladawan iti panid 31]

Saan a kasapulan nga agbalintayo a nalatak tapno magun-odtayo ti pabor ti Dios