“Umadanikayo iti Dios, ket Isu Umadaninto Kadakayo”
Sakbay ken Kalpasanna—Nalidem a Napalabas, Naraniag a Masakbayan
“TI SAO ti Dios nabiag ken adda bilegna ken natartarumamis ngem iti aniaman a kampilan a dua ti tademna . . . ket kabaelanna a lasinen dagiti panunot ken dagiti panagem ti puso.” (Hebreo 4:12) Dayta ti kinuna ni apostol Pablo maipapan iti umukuok a bileg ti mensahe ti Dios. Ti abilidad dayta a mangdanon iti puso ket nangruna a nabatad idi umuna a siglo K.P. Iti laksid ti dakes nga impluensia idi, dagidiay nagbalin a Kristiano inkawesda ti baro a personalidad.—Roma 1:28, 29; Colosas 3:8-10.
Ti bileg ti sao ti Dios a mangbalbaliw, kas nairekord iti Biblia, ket nabatad met ita. Kas pagarigan, imutektekanyo ti kaso ti natayag, napigsa a lalaki nga agnagan Richard. Gapu ta managpudpudot, kumabil ni Richard uray bassit laeng ti makagapu. Nadadael ti biagna gapu iti kinaranggas. Nakimiembro pay ketdi ni Richard iti timpuyog dagiti boksingero. Siaanep a nagsanay ket nagbalin a kampeon iti heavyweight division ti boksing idiay Westphalia, Alemania. Nalabes met ti panaginum ni Richard iti arak ken masansan a makilaban. Iti naminsan nga ilalabanna, adda maysa a napapatay, ket nganngani naibalud ni Richard.
Komusta met ti biag ni Richard kas naasawaan? “Sakbay a nagadalkami ken ni Heike iti Biblia,” malagip ni Richard, “nagduma ti estilo ti panagbiagmi. Mangbusbos ni Heike iti adu a tiempo kadagiti gagayyemna a babbai, bayat a tagtagiragsakek dagiti pagesmak—nangruna ti boksing, surfing, ken diving.”
Idi rinugian da Richard ken Heike ti makipagadal iti Biblia kadagiti Saksi ni Jehova, napakapsutan ni Richard idi makitana a masapul a mangaramid kadagiti kasla imposible a panagbalbaliw tapno maitunosna ti biagna kadagiti nangato a pagalagadan ti Sao ti Dios. Ngem bayat nga immuneg ti pannakaammona ken ni Jehova a Dios, naaddaan ni Richard iti nasged a tarigagay a mangay-ayo kenkuana. Naammuan ni Richard a saan nga anamongan ti Dios dagiti managayat iti kinaranggas wenno dagidiay aglinglingay babaen dayta. Naammuan ni Richard nga “asinoman a mangay-ayat iti kinaranggas pudno unay a guraen ti kararua [ni Jehova].”—Salmo 11:5.
Kanayonanna, nagustuan da Richard ken Heike ti namnama a biag nga agnanayon iti paraiso a daga. Kayatda ti agbiag sadiay! (Isaias 65:21-23) Kasta unay ti pannakatukay ni Richard iti awis nga “umadanikayo iti Dios, ket isu umadaninto kadakayo.” (Santiago 4:8) Nakitana ti pateg ti panangipangag iti daytoy naipaltiing a balakad: “Dika agbalin a naapal iti tao ti kinaranggas, wenno uray pilien ti aniaman kadagiti dalanna. Ta ti nasikap a tao nakarimrimon a banag ken Jehova, ngem ti kinasingedna adda kadagidiay napalungdo.”—Proverbio 3:31, 32.
Iti laksid ti nabileg a tarigagayna a mangbalbaliw iti kababalinna, nautob ni Richard a saanna a maaramid dayta iti bukodna a pigsa. Nabigbigna a kasapulanna ti agpatulong iti Dios babaen ti kararag. Gapuna, nagtignay maitunos iti kinuna ni Jesus kadagiti apostolna: “Agkararagkayo nga agpatpatuloy, tapno saankayo a sumrek iti pannakasulisog. Ti espiritu, siempre, sigagagar, ngem ti lasag nakapuy.”—Mateo 26:41.
Kalpasan a maammuanna no ania ti panangmatmat ti Dios iti kinaranggas ken irarasuk ti unget, nasigurado ni Richard a saan a makaay-ayo ti isport a boksing. Babaen ti tulong ni Jehova ken pammaregta dagiti nangyadal kenkuana iti Biblia, insardeng ni Richard ti kinaranggas. Insardengna ti boksing ken panaglalaban ken inkeddengna a pasayaaten ti biagna kas pamiliado. “Ti panangammo iti kinapudno iti Biblia ti timmulong kaniak nga agpanunot nga umuna sakbay nga agtignayak,” kuna ni Richard, a maysa itan a naalumamay a manangaywan iti maysa kadagiti kongregasion dagiti Saksi ni Jehova. Innayonna: “Dagiti prinsipio ti ayat ken panagraem ti mangiwanwanwan ita iti relasionko iti asawak ken annakko. Kas resultana, nasinged ti pamiliami.”
Gapu iti di umiso a damag, adda dagiti tattao a no dadduma pabasolenda dagiti Saksi ni Jehova kas pakaigapuan ti pannakadadael dagiti pamilia. Ngem maibatay kadagiti kapadasan dagiti indibidual a kas ken ni Richard, napaneknekan a biddut ti pammabasolda. Iti kinaagpaysuanna, ti kinapudno iti Biblia mabalin nga agresulta iti kinatalged iti pagtaengan ken naraniag a masakbayan para kadagidiay nalidem ti napalabasda.—Jeremias 29:11.
[Blurb iti panid 9]
“Ti namnama a paraiso a daga tinignaynak nga agbalbaliw”
[Kahon iti panid 9]
Epektibo Dagiti Prinsipio ti Biblia
Sibibileg a maimpluensiaan ti Biblia ti biag dagiti tattao. Adtoy ti sumagmamano kadagiti Nainkasuratan a prinsipio a nakatulong kadagiti naranggas a tattao tapno makapagbalbaliwda:
“Daydiay nabannayat nga agunget nasaysayaat ngem iti nabileg a lalaki, ken daydiay mangmedmed iti espirituna ngem iti daydiay mangkautibo iti maysa a siudad.” (Proverbio 16:32) Ti di namedmedan nga unget ket pagilasinan ti kinakapuy, saan a kinabileg.
“Ti pannakatarus ti maysa a tao pudno unay a pabannayatenna ti ungetna.” (Proverbio 19:11) No ti maysa ket addaan iti nauneg a pannakatarus ken pannakaawat iti maysa a kasasaad, saan laeng a dagiti narabaw a rason ti pannakisubang ti makitana, iti kasta, mamedmedanna ti ungetna.
‘Dika makikadua iti asinoman a managunget tapno saanmo a maammuan unay dagiti danana.’ (Proverbio 22:24, 25) Dagiti Kristiano sisisirib a liklikanda ti makitimpuyog kadagiti managpungpungtot.