Nasursurok a Guraen ti Inayatko
Ti pannakilaban ti biagko. Maragsakanak idi a mangdanog iti kalabanko buyogen ti isuamin a pigsak sa makitak a matumba iti sakaanak. Maragsakanak idi nga agtakder iti tengnga ti pagboboksingan ken mangngeg ti anounser a mangipukkaw iti naganko kas ti nangabak iti laban. Pagay-ayatko idi ti boksing! Ngem ita, kasimronkon ti panangpanunot laeng iti kinaranggas. Nasursurokon a guraen ti awagak itan a ti kriminal nga ay-ayam a boksing.
IDI 1944, idi agtawenak iti pito, agnanaedak idiay Lares, Puerto Rico, a sadiay ti nakaipasngayak. Idi a tiempo a napadasak ti nakaro a pannakaklaat idi napukawko ni nanang gapu ken patay. Natay iti kanser idi ag-32 ti tawenna. Diakon maibturan ti saem idi saan a nagbayag, nagawidak manipud eskuelaan ket nakitak ti maysa a babai a saksakloten ni tatangko. Isut’ nagbalin nga agsioman kaniak.
Gapu ta madlawna a kasimronko isuna, nakas-ang ti panangtrato ti agsioman kaniak. Isu a nagtalawak idiay balaymi. Naglibasak a simrek iti trak a nagkarga iti uging ken sua saak naturog. Anian a siddaawko idi nariingak ket nasarakak ti bagik iti siudad ti San Juan, iti bangir a deppaar ti isla!
Ti Mannakiapa iti Kalsada
Iti unos ti walo a bulan nagbalinak a walang kadagiti kalsada ti San Juan. Dagiti dadduma nga agtutubo kanayondak a loklokuen. Gapuna naamirisko a masapul a makilabanak tapno agbiagak. Kalpasan ti walo a bulan nasarakandak dagiti polis ket pinagawiddak. Pulos a diak maaklon ti agsioman kaniak isu a masansan nga awanak idiay balay. Gistay inaldaw a mairamramanak iti panagaapa. Idi ag-sangapulon ti tawenko, timmakiasak manen.
Kalpasan ti sumagmamano a lawas, tiniliwdak manen dagiti polis. Iti daytoy a tiempo diak imbaga ti naganko kadakuada ken no sadino ti naggapuak. Idi dida mabirukan ti pamiliak, imbaondak iti iwanwanwan-gobierno a pagtaraknan kadagiti ulila idiay siudad ti Guaynabo. Sadiay nga insuotko ti umuna a paris ti guantesko a pakiboksing. Sadiay met ti damo unay iti biagko a nakakitaak iti nagan a Jehova iti maysa a karatula. Dinamagko ti maipapan iti dayta, ket naibaga kaniak a Jehova ti nagan ti Dios dagiti Judio. Diak pulos nalipatan dayta a nagan.
Idi ag-15 ti tawenko, pimmanawak iti pagtaraknan dagiti ulila, ket diak nagsublin. Tapno masuportarak ti bagik rinugiak ti naglako iti periodiko. Nupay kasta, tunggal kalsada ket naitudingen iti maysa nga aglaklako iti periodiko. Maymaysa laeng ti pamay-an a makaipasdekak iti bukodko a paglakuan: pannakilaban! Ket talaga a nakilabanak.
Dua a tawen kamaudiananna nakikaduaak iti Armada ti E.U. ket immawatak iti pagdadamuan a pannakasanay idiay Arkansas, E.U.A. Di nagbayag nagbalinak a miembro ti grupo dagiti boksingero. Kalpasanna naiyakarak iti grupo ti Special Service. Agtartrabahoak idiay gymnasium, ket ti sarhentok ket manangsanay iti boksing.
Naranggas nga Ay-ayam
Nasanayak no kasano nga usarek dagiti gemgemko a mangdangran kadagiti kalabanko. Nasanayak a di mangikankano iti pannakigayyem idiay pagboboksingan. No mabatingtingen ti kampanilia a mangipamatmat iti panangrugi ti boksing, ti maysa a gayyem ket agbalinen a kabusor a masapul a tumbaen ken nasaysayaat pay no matumba a din makabangon.
Kayatko ti agtalinaed iti armada, ngem kinuna kaniak ti sarhentok: “Nasaysayaat no agretirokan iti armada. Agbalinka a propesional a boksingero, ket iti sumagmamano la a tawen, mabuyakanton iti telebision a makibokboksing idiay Madison Square Garden sadi Siudad ti Nueva York.” Kasla nagrigat a patien! Siak—ti nakurapay ken awanan-balay nga ubing—agbalinto a mabigbigbig a boksingero?
Kalpasan ti dua a tawen, pimmanawak iti armada ket nagsubliak idiay Puerto Rico. Maysa nga aldaw idi 1956, nakitak ti maysa a pakaammo agpaay iti boksing dagiti agdadamo, ti Golden Gloves. Nakisalipak ket nagbalinak a kampeon ti Puerto Rico iti welterweight. Kalpasanna impandak idiay Siudad ti Nueva York a makisalisal iti pannakisalip ti Golden Gloves iti nasion. Inkagumaak unay ti makastrek iti semifinals, ngem diak nangabak iti kinakampeon. Nupay kasta, addan tukon manipud kadagiti mainanama a manedyer ken manangsanay. Isu nga inawatko ti tukon nga agnaed idiay Siudad ti Nueva York ken agsanay tapno agbalin a propesional.
Idi 1958, nagbalinak a propesional a boksingero. Ket umiso ti sarhentok. Idi 1961, lima a tawen kalpasan ti ipapanawko iti armada, nagparangakon iti telebision ti nasion, a makibokboksing idiay Madison Square Garden. Adu kadagiti pannakilabanko ti naangay iti dayta nalatak a paglalabanan iti ay-ayam.
Dagiti danogko ti namagpatingga iti karera ti sumagmamano a boksingero. Maysa a boksingero manipud Mexico ti naan-anay a nabulsek gapu kadagiti nadangkok a danogko. Ti sabali pay a laban a nangburibor unay iti konsiensiak isu ti pannakilabanko iti kampeon ti middleweight ti Dominican Republic. Sakbay ti laban inaramidna a dakkel nga isyu ti kinapudno a nadagdagsenak iti kaguduat’ kilo ngem isu. Ti kababalinna ti namagpungtot kaniak. Pulos a diak nagreklamo no bilang nadagdagsen bassit ngem siak ti kalabanko. Imbagak kenkuana: “Bueno, agsaganaka ta inton rabii papatayenka!” Idi simrekakon iti pagboboksingan, kinuna ti maysa a periodiko a ti “langak kasla satanas.” Iti nakurang a dua a minuto, ti lalaki ket naawananen iti puot iti nakutsonan a suelo. Nakaro ti pannakadadael ti makin-uneg a paset ti lapayagna a dina pulos nakiboksinganen.
No Kasano a Nasursurok a Ginura ti Boksing
Ti kinalatakko inawisna ti atension ken pannakipagayam dagiti artista ken musiko. Naminsan, intandudo pay ketdi ti dati a kampeon ti lubong iti heavyweight a ni Joe Louis ti maysa kadagiti pannakilabanko. Adut’ nagpaspasiarak, naaddaanak kadagiti napintas a kotse, ken tinagiragsakko dagiti dadduma pay a material a bambanag. Nupay kasta, kas kadagiti kaaduan a boksingero, di nagbayag ti balligik. Idi 1963, nakaro ti pannakadangranko iti sumagmamano a pannakilabanko ket diak kabaelanen ti makilaban.
Agarup iti daytoy a tiempo nabasak iti maysa nga artikulo ti periodiko a nagbalin a maysa a Saksi ni Jehova ti maysa a nalatak a boksingero. Gapu iti sumagmamano a rason, kalpasan a nabasak ti artikulo, pampanunotek a ti relihion dagiti Saksi ni Jehova ket agpaay laeng kadagiti baknang a tattao.
Iti sumaganad a sumagmamano a tawen, adut’ sinakitko. Nagsagabaak met iti nakaro a panagliday. Bayat ti kasta a panaglidayko, impuntiriak ti paltog iti pusok ket pinaltogak ti bagik. Naisiasi ti bala babaen iti paragpag, isu a nangispal iti biagko. Sibibiagak, ngem malmaldaangak ken masaksakit unay. Awanen ti kuartak, awanen ti kinalatakko, awanen ti pannakiboksingko!
Maysa nga aldaw idi, imbaga ti asawak a ni Doris nga isut’ makipagad-adal kadagiti Saksi ni Jehova ket kayatna ti tumabuno kadagiti gimong idiay Kingdom Hall. “Diak ammo, Doris,” kinunak. “Napanglawtayo, ket dagiti Saksi ni Jehova nabaknangda ken napateg a tattao.” Imbagana kaniak a saan a pudno daytoy ken ti Saksi a mangyad-adal kenkuana ti agnanaed iti sangakaarrubaanmi. Isu nga inanamongak ti pangngeddengna a tumabuno kadagiti gimong. Naminsan idi ur-urayek iti ruar ti Kingdom Hall, inawisnak ti maysa a Saksi a sumrek. Nakarugrugit dagiti kawesko idi, ngem impapilitna. Naabrasaak nupay kasta ti langak. Ti nainggayyeman a kasasaad pinagpanunotnak.
Di nagbayag rinugiakon ti nakipagadal iti Biblia kadagiti Saksi. Naammuak a ni Jehova ket saan laeng a Dios dagiti Judio, kas naibaga kaniak idi, no di ket isu ti kakaisuna a pudno a Dios, ti Mannakabalin-amin, ti Namarsua kadagiti amin a bambanag. Naammuak met a ni Jehova a Dios guraenna ti kinaranggas. Idiay Salmo 11:5 kunaen ti Biblia: ‘Ni Jehova a mismo suotenna ti nalinteg agraman ti nadangkes, ket siasinoman nga agayat iti kinaranggas guraen ti kararuana.’ Isu a simminaak manipud iti amin a mainaig iti boksing. Napadasak a mismo no kasano karanggas dayta nga ay-ayam. Kalpasan ti pannakaammok no kasano ti panangmatmat ti Dios iti dayta, diak pagduaduaanen a ti boksing ket dakes, kriminal nga ay-ayam. Wen, nasursurok a guraen ti ay-ayam nga inayatko idi.
Ti Kadakkelan a Pribilehio
Idi 1970, inkeddengkon nga idedikar ti biagko ken ni Jehova. Nagbautisarkami ken Doris idi Oktubre daydi a tawen. Nanipud idin tinagiragsakko ti pribilehio a mangasaba kadagiti dadduma. Kas maysa nga amin-tiempo nga ebanghelisador, naaddaanak iti paset a timmulong iti ag-40 a tattao a nagbalin a managdaydayaw ni Jehova.
Agbabbabawiak, ta agsagsagabaak itan gapu kadagiti pannakadangranko bayat dagiti naranggas a tawtawen [ti panagbiagko]. Ginasgasut ti pannakadanog ti ulok, a nangpataud iti permanenten a pannakadangran ti utekko. Problemak ti nalakak a pannakalipat ken ti sakit ti makin-uneg a lapayagko, a mangapektar ti kinatimbengko. No napartak ti pananggarawko iti ulok, maulawak. Kasta met, masapul a kanayon nga agtomarak ti agas maipaay iti parikutko iti panagliday. Nupay kasta, maawatandak dagiti padak a Kristiano, ket tultulongandak nga agballigi. Agyamanak iti kasta unay ken Jehova iti panangipaayna kaniak iti bileg a makiraman a kanayon iti panangiwaragawag iti nagan ken pangpanggepna kadagiti sabsabali.
Tagtagiragsakek ti kadadakkelan kadagiti amin a pribilehio—a dayta ti maaddaan iti personal a relasion iti Mannakabalin-amin a Dios, ni Jehova. Idi boksingeroak, pinaladingitko ti puso ni Jehova iti tunggal pannakilabanko. Ita maparparagsakkon ti pusona. Mariknak a kasla makisasao a personal kaniak no kunaenna: “Anakko, agsiribka, ket paragsakem toy pusok, tapno masungbatak ti mangumsi kaniak.”—Proverbio 27:11.
Din agbayag ipatingganton ni Jehova dagiti ar-aramid ni Satanas, agraman amin a kinaranggas ken dagidiay a mangitantandudo iti dayta. Anian a panagyamanko ken Jehova iti panangisurona kaniak a saan laeng a mangayat iti naimbag no di ket manggura met iti dakes! Dayta iramanna ti pananggura iti kriminal nga ay-ayam a boksing. (Salmo 97:10)—Kas insalaysay ni Obdulio Nuñez.
[Ladawan iti panid 13]
Ni Obdulio Nunez