Pagay-ayatko Idi ti Kinaranggas

Kas Insalaysay ni Salvador Garza

IDI ubingak, pagay-ayatko ti kinaranggas ken apaek ti asinoman a mamagpungtot kaniak. Nadlaw dayta ti maysa a kalugarak a kampeon iti boksing isu a sinuruannak a makiboksing. Idi agangay, maysaakon a propesional a boksingero a makilablaban iti nadumaduma a lugar iti United States. Idi agangay, nagtrabahuak kas bodyguard ti maysa a miembro ti sindikato.

Pagay-ayatko latta ti kinaranggas uray idi kasadoakon ken innemen ti annakko. Adda idin bukodko a nightclub. Nupay namin-adu nga adda nanggandat iti biagko, magusgustuak ti kasta. Bayat ti naminsan a pannakiapak, dua a lallaki ti pinaltogak ket nakaro ti pannakadangranda. Implanomi pay ketdi iti dadduma a gagayyemko a kidnapenmi ti maysa a nalatak a politiko. Ngem naduktalan dayta dagiti polis ket naarestoak. Idi nasarakan dagiti polis ti dadduma pay a kakaduak, adda napasamak a pinnaltogan ket napapatay amin a gagayyemko. Imbag laengen ta nakabaludak idi!

Kalpasan ti sumagmamano a tawen, nawayawayaanak ken nakasarakak iti trabaho. Maysa nga aldaw, bayat nga agaw-awidak manipud trabaho, kellaat a simmakit unay ti ulok. Napalalo ti danagko isu a nagkararagak. Ti asawak a ni Dolores ket makipagad-adal idin iti Biblia kadagiti Saksi ni Jehova. Imbagana kaniak a Jehova ti nagan ti Dios. (Salmo 83:18) Isu a nagkararagak Kenkuana.

Idi immimbagak, inawisnak ni Dolores a tumabuno kadagiti gimong dagiti Saksi ni Jehova iti Kingdom Hall. Nakaluaak gapu iti kinaimbag ken nabara a panangpasangbay kaniak dagiti Saksi ni Jehova. Isu a nakipagadalak metten iti Biblia ken in-inut a nagbalbaliw ti panangmatmatko iti biag. Nagustuak ti maad-adalko.

Ngem medio nabaybayag sakbay a nasursurok a kontrolen ti panagpungtotko. Kas pagarigan, bayat a mangaskasabakami iti binalaybalay iti gayyemko a ni Antonio, pinagsasaoannakami ketdin ti kasarsaritami a lalaki. Bimmara ti piditpiditko isu a darupek koman. Naimbag laengen ta inggawidnak ni Antonio. Kalpasanna, siaanus nga impalagipna ti panagibtur ni Jesus nupay naumsi ken namaltrato iti kasta unay. Ni apostol Pedro, a nasinged a nakatrabaho ni Jesus, insuratna: “Idi narabrabngis, saanna a sinubadan iti panangrabngis.” (1 Pedro 2:23) Impapusok dagita a sasao.

No malagipko dagiti inaramidko a panagbalbaliw, kanayon nga agyamanak ken Jehova gapu iti nasantuan nga espirituna a tumultulong kadatayo nga agteppel ken agbalin a pudpudno a mannakikappia. (Galacia 5:22, 23) Agkaykaysa ken naragsak ti pamiliak, ken natalna ti biagmi. Pribilehiok met ti agserbi kas amin-tiempo a ministro a tumultulong iti sabsabali a maaddaan iti talna nga ipaay ti Dios.

[Ladawan iti panid 9]

Ti panagadal iti Biblia ti nakatulong ken Salvador a maaddaan iti talna