Ti Panangted a Makaay-ayo iti Dios

MANGMANGAN idi ni Jesus ken dagiti adalanna iti naimas a taraon idiay Betania a kaduada ti sumagmamano a nasinged a gagayyem, a pakaibilangan da Maria, Marta, ken ti nabiit pay a napagungar a ni Lazaro. Idi nangala ni Maria iti maysa a libra ti nangina a lana ket sinapsapuanna dagiti saka ni Jesus, narurod ken nagunget ni Judas Iscariote. “Apay a saan a nailako daytoy a bangbanglo a lana iti tallo gasut a denario [a katupagna ti makatawen a sueldo] ket naited iti napanglaw a tattao?” inreklamona. Kasta met ti dagus a kinuna ti dadduma.​—Juan 12:1-6; Marcos 14:3-5.

Ngem insungbat ni Jesus: “Baybay-anyo. . . . Ta kankanayon nga adda kadakayo dagiti napanglaw, ket kaanoman a kayatyo mabalinyo nga aramiden a kankanayon kadakuada ti naimbag, ngem saanak a kankanayon nga adda kadakayo.” (Marcos 14:6-9) Insuro dagiti Judio a panguluen ti relihion a ti panangted iti tulong ket saan laeng a kinaimbag no di ket abbonganna pay dagiti basol. Iti sabali a bangir, inlawlawag ni Jesus a saan laeng a ti panangted iti naayat a tulong kadagiti napanglaw ti kita ti panangted a makaay-ayo iti Dios.

Ti ababa a panangusig iti panangted nga impakita ti nagkauna a kongregasion Kristiano itampokna ti dadduma a praktikal a pamay-an a maipakitatayo ti pannakaseknantayo ket iti kasta, maay-ayotayo ti Dios iti panangtedtayo. Ipabigbigna met ti natantan-ok a panangted a kasayaatan ti magapuananna.

“Mangted Kadagiti Sagut ti Asi”

Iti nagduduma nga okasion, imparegta ni Jesus kadagiti adalanna a ‘mangtedda kadagiti sagut ti asi,’ wenno, iti dadduma a patarus, “mangtedkayo ti limos.” (Lucas 12:33, Philippine Bible Society) Ngem namakdaar ni Jesus maibusor iti kinaparammag a nairanta laeng a mangpadayaw iti nangted imbes nga iti Dios. “Inton mapanka a mangted kadagiti sagut ti asi,” kinunana, “dika puyoten ti maysa a trumpeta iti sanguanam, a kas iti ar-aramiden dagiti managinsisingpet kadagiti sinagoga ken kadagiti kalsada, tapno idaydayaw ida dagiti tattao.” (Mateo 6:1-4) Gapu ta iyap-aplikarda daytoy a balakad, saan a tinulad dagiti nagkauna a Kristiano ti kinaparammag dagiti aginsasanto a lider ti relihion idi kaaldawanda ken pinilida a tulongan dagidiay agkasapulan babaen ti panangipaay iti personal a serbisio wenno pribado a panangted iti sagsagut.

Iti Lucas 8:1-3, kas pagarigan, naibaga kadatayo a da Maria Magdalena, Juana, Susana, ken dagiti dadduma inusarda ‘dagiti sanikuada’ iti naimpusuan a panagserbida ken ni Jesus ken kadagiti apostolna. Nupay saan a marigrigat dagitoy a lallaki, pinanawanda dagiti pagsapulanda tapno ipamaysada ti biagda iti ministerio. (Mateo 4:18-22; Lucas 5:27, 28) No ar-arigen, dagitoy a babbai impadayagda ti Dios babaen ti panangtulongda kadagitoy a lallaki a mangtungpal iti inted-Dios nga annongenda. Ket impakita ti Dios ti apresasionna babaen ti panangitalimeng iti rekord iti Biblia maipapan iti naasi a kinamanagparaburda tapno mabasa ti amin a sumaganad a kaputotan.​—Proverbio 19:17; Hebreo 6:10.

Ni Dorcas ti sabali pay a naasi a babai nga “aduan iti naimbag nga ar-aramid ken sagsagut ti asi.” Nagaramid kadagiti kawes para kadagiti balo a babbai iti ilina a Joppe nga adda iti asideg ti baybay. Ditay ammo no isuna ti naggasto kadagiti inusarna a material wenno ti laeng serbisiona a nagdait ti libre. Kaskasdi, gapu iti naimbag nga aramidna, isu ket ad-adda nga impateg dagiti natulonganna, kasta met ti Dios, a siaasi a nangbendision iti kinaimbagna.​—Aramid 9:36-41.

Napateg ti Umiso a Motibo

Ania ti nangtignay kadagitoy nga indibidual a mangted? Natignayda saan laeng a gapu ta naasianda kadagiti agpatpatulong. Nariknada ti personal a moral nga obligasion a mangaramid iti kabaelanda iti kada aldaw a tumulong kadagiti agpaspasar iti kinapanglaw, rigat, sakit, wenno dadduma pay a pakarigatan. (Proverbio 3:27, 28; Santiago 2:15, 16) Daytoy ti kita ti panangted a pakaay-aywan ti Dios, a tinignay kangrunaanna ti nauneg a panagayat iti Dios ken tarigagay a mangtulad iti naasi ken naparabur a personalidadna.​—Mateo 5:44, 45; Santiago 1:17.

Intampok ni apostol Juan daytoy nagpateg nga aspeto ti panangted idi inyimtuodna: “Siasinoman nga addaan kadagiti sanikua daytoy a lubong a pangtaginayon iti biag ket makitana ti kabsatna nga agkasapulan ket kaskasdi a punitanna ti ruangan dagiti nadungngo a panangngaasi kenkuana, iti ania a pamay-an nga agtalinaed kenkuana ti ayat ti Dios?” (1 Juan 3:17) Nabatad ti sungbat. Ti panagayat iti Dios tignayenna dagiti tattao nga agbalin a manangtulong. Apresiaren ken gunggonaan ti Dios dagidiay naparabur a kas kenkuana. (Proverbio 22:9; 2 Corinto 9:6-11) Makitatayo kadi daytoy a kinaparabur ita? Imutektekanyo ti napasamak iti nabiit pay iti maysa a kongregasion dagiti Saksi ni Jehova.

Masapul a matarimaan ti pagtaengan ti maysa a baket a Kristiano. Agmaymaysa iti pagtaenganna ken awanan iti pamilia a tumulong kenkuana. Iti adu a tawen, kanayon a mausar ti pagtaenganna a pakaangayan dagiti Nakristianuan a gimong, ken masansan a mangiranud iti taraon iti asinoman nga umawat iti awisna. (Aramid 16:14, 15, 40) Gapu iti kasasaadna, sangsangkamaysa a timmulong dagiti kakongregasionna. Adda dagiti nangted iti kuarta, serbisio ti inted ti dadduma. Iti uneg ti sumagmamano a lawas, sinukatan dagiti boluntario ti atep, nagaramidda iti baro a banio, pinalitadaan ken pinintaanda ti intero nga umuna a kadsaaran, ken nangikabilda kadagiti baro a kabinet iti kosina. Gapu iti panangtedda, saan laeng a naipaay ti kasapulan ti baket no di ket ad-adda a simminged dagiti kakabsat iti kongregasion ken nakita dagiti kaarruba ti nasayaat nga ulidan ti pudno a Nakristianuan a panangted.

Nagadu dagiti pamay-an tapno personal a matulongantayo ti sabsabali. Mabalintayo kadi ti mangipaay iti tiempo iti maysa nga ubing nga ulila iti ama? Mabalintayo kadi nga itiendaan wenno idaitan ti maysa a baket a balo nga am-ammotayo? Mabalintayo kadi nga ilutuan wenno igastosan ti maysa a napanglaw? Saan a kasapulan a nabaknangtayo tapno makatulong. Insurat ni apostol Pablo: “No ti kinamanagsagana umun-una nga adda, nangnangruna a maawat dayta sigun iti adda iti maysa a tao, saan a sigun iti awan iti maysa a tao.” (2 Corinto 8:12) Ngem ti kasta laeng kadi a personal, direkta a panangted ti kakaisuna a kita ti panangted a bendisionan ti Dios? Saan.

Ti Ngay Organisado a Panangsaranay?

No dadduma, saan nga umdas dagiti personal a panagregget. Kinapudnona, ni Jesus ken dagiti apostolna nangsalimetmetda iti pondo para kadagiti napanglaw, ken immawatda kadagiti kontribusion manipud kadagiti maseknan a tattao a makasabaanda. (Juan 12:6; 13:29) Umasping iti dayta, dagiti kongregasion idi umuna a siglo nangipatungpalda iti panagkolekta no adda pakasapulan ken nangorganisarda iti dakdakkel a panangsaranay.​—Aramid 2:44, 45; 6:1-3; 1 Timoteo 5:9, 10.

Adda kasta a napasamak idi agarup 55 K.P. Pimmanglaw dagiti kongregasion iti Judea, nalabit kas resulta ti nabiit pay a nakaro a bisin. (Aramid 11:27-30) Gapu ta kanayon a maseknan kadagiti napanglaw, nagpatulong ni apostol Pablo kadagiti kongregasion uray dagiti adda idiay Macedonia. Personal a nangorganisar iti panagur-or ken inusarna dagiti kualipikado a lallaki a mangitulod iti tulong. (1 Corinto 16:1-4; Galacia 2:10) Awan ti asinoman kadakuada a nagpabayad iti serbisioda.​—2 Corinto 8:20, 21.

Alisto met ita a tumulong dagiti Saksi ni Jehova no dumteng ti didigra. Kas pagarigan, bayat ti kalgaw idi 2001, dagiti napigsa a bagyo nangyegda iti nakaro a panaglayus idiay Houston, Texas, E.U.A. Iti pakabuklan, 723 a pagtaengan dagiti Saksi ti nadadael, adu kadagitoy ti nakaro a naapektaran. Iti panangsaranay kadagiti nadidigra, maysa a komite a buklen dagiti kualipikado a Kristiano a panglakayen ti nabuangay a mangkita iti kasapulan dagiti indibidual ken tapno mangpataud kadagiti pangsaranay a pondo tapno matulongan dagiti lumugar a Saksi a makalung-aw iti kasasaad ken matarimaan dagiti balayda. Amin a trabaho ket inaramid dagiti situtulok a boluntario manipud kadagiti kabangibang a kongregasion. Maysa a Saksi ti kasta unay ti panagyamanna iti tulong. Isu nga idi nagbayad kenkuana ti kompania ti seguro para iti pannakatarimaan ti pagtaenganna, dagus nga indonarna ti kuarta iti pangsaranay a pondo tapno maitulong kadagiti dadduma nga agkasapulan.

Ngem no maipapan iti organisado a charity, kasapulan a naannadtayo a mangusig kadagiti adu a panagkiddaw iti tulong. Adda dagiti charity a dakkel ti paggastosanda kadagiti empleado wenno kadagiti aktibidadda mainaig iti panagpataud iti pondo, ket bassitto laengen ti mabati iti naur-or a kuarta para iti nakairantaanna. Kuna ti Proverbio 14:15: “Ti asinoman nga awanan kapadasan maaddaan pammati iti tunggal sao, ngem daydiay nasaldet utobenna dagiti addangna.” Gapuna, nainsiriban a siaannad a sukimaten dagiti bambanag.

Panangted a Kasayaatan ti Magapuananna

Adda maysa a kita ti panangted a napatpateg nga amang ngem iti charity. Impatuldo daytoy ni Jesus idi inimtuod ti maysa a nabaknang, agkabannuag nga agturay no ania ti aramidenna tapno agbiag nga agnanayon. Kinuna ni Jesus kenkuana: “Inka ilako dagiti sanikuam ket itedmo kadagiti napanglaw ket maaddaankanto iti gameng idiay langit, ket umayka agbalinka a pasurotko.” (Mateo 19:16-22) Imutektekanyo ta saan a basta kinuna ni Jesus, ‘Mangtedka kadagiti napanglaw ket agbiagka.’ Imbes ketdi, innayonna, “Umayka agbalinka a pasurotko.” Iti sabali a pannao, nupay makomendaran ken makagunggona dagiti aktibidad ti charity, adu pay ti ramanen ti panagbalin a Kristiano nga adalan.

Ti kangrunaan a pakaseknan ni Jesus isu ti panangtulong kadagiti sabsabali iti naespirituan. Sakbay unay ti ipapatayna, kinunana ken ni Pilato: “Maigapu itoy a nayanakak, ken maigapu itoy nga immayak iti lubong, tapno saksiak ti kinapudno.” (Juan 18:37) Nupay indauluanna ti panangtulong kadagiti napanglaw, panangpaimbag kadagiti masakit, ken panangtaraon kadagiti mabisin, kangrunaan a sinanay ni Jesus dagiti adalanna a mangasaba. (Mateo 10:7, 8) Kinapudnona, maysa kadagiti maudi nga instruksionna kadakuada isu ti bilin nga: “Inkayo ngarud ket mangaramidkayo iti ad-adalan kadagiti tattao iti amin a nasion.”​—Mateo 28:19, 20.

Siempre, ti panangasaba saanna a risuten dagiti amin a parikut iti lubong. Kaskasdi, pakaidayawan ti Dios ti panangiranud iti naimbag a damag ti Pagarian ti Dios iti amin a kita ti tattao agsipud ta ti panangasaba itungtungpalna ti pagayatan ti Dios ken mangyeg kadagiti agnanayon a gunggona para kadagiti mangawat iti mensahe ti Dios. (Juan 17:3; 1 Timoteo 2:3, 4) Apay a dikay umimdeng iti ibaga dagiti Saksi ni Jehova no sumarungkarda manen kadakayo? Adda iyegda a naespirituan a sagut. Ken ammoda a dayta ti kasayaatan a maitedda kadakayo.

[Dagiti Ladawan iti panid 6]

Adu dagiti pamay-an a mangipakita a maseknantayo

[Ladawan iti panid 7]

Ti panangikasabatayo iti naimbag a damag ket pakaay-aywan ti Dios ken mangyeg kadagiti agnanayon a gunggona