Sursuruen ti Agbalin a Naparabur

AWAN ti nayanak a naparabur. Ti maysa a maladaga ket kadawyan nga agannayas a mangpennek kadagiti kayat ken kasapulanna, a dina ikabilangan ti pagimbagan ti dadduma, uray ti mangtagtagibi kenkuana. Ngem inton agangay, masursuro ti ubing a saan la nga isuna ti addaan iti kasapulan. Masapul nga ikabilanganna dagiti dadduma, ken nasken a sursuruenna ti mangted ken mangiranud, saan laeng nga umawat. Masapul a sursuruen ti panagbalin a naparabur.

Saan nga amin a tao a mangted​—uray pay nabuslon​—ket makuna a naparabur. Dadduma ti mabalin nga agidonar iti maysa nga institusion ti saranay gapu ta kayatda nga itandudo ti bukodda nga interes. Adda met dagidiay mangted iti kontribusion tapno magun-odda ti pammadayaw dagiti tattao. Nupay kasta, naiduma ti panangted nga ar-aramiden dagiti pudno a Kristiano. Ania ngarud a kita ti panangted ti iparparegta ti Sao ti Dios? Masungbatan dayta a saludsod babaen ti ababa a panangusig iti panangted nga inaramid dagiti Kristiano idi umuna a siglo.

Dagiti Ulidan iti Nakristianuan a Panangted

Ti Nakristianuan a panangted, kas nadeskribir iti Biblia, ket “panangiranud iti bambanag kadagiti dadduma” a pudno nga agkasapulan. (Hebreo 13:16; Roma 15:26) Masapul a saan a mapilpilit dayta. Insurat ni apostol Pablo: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.” (2 Corinto 9:7) Nasken a saan met a pammarang laeng ti panangted. Kasta ti inaramid da Ananias ken Safira ket nakaay-ay-ay ti nagbanaganda.​—Aramid 5:1-10.

Adda dakkel a panagkasapulan iti panangted idi naguummong ti adu a Judio ken proselita manipud kadagiti adayo a lugar para iti piesta ti Pentecostes idi 33 K.P. Iti daydi a gundaway a dagiti pasurot ni Jesus “napnoda amin iti nasantuan nga espiritu ket nangrugida nga agsao iti nagduduma a pagsasao.” Pinalikmutan ida ti dakkel a bunggoy ket nagimdengda iti makatukay a palawag ni Pedro maipapan ken ni Jesu-Kristo. Kalpasanna, nakita dagiti tattao no kasano a pinaimbag da Pedro ken Juan ti maysa a pilay iti ruangan ti templo, ken nangngegda ni Pedro a nagsao manen maipapan ken ni Jesus ken kinapateg ti panagbabawi. Rinibu ti nagbabawi ken nabautisaran kas pasurot ni Kristo.​—Aramid, kapitulo 2 ken 3.

Dagidi kabbaro a nakomberte kayatda ti agtalinaed idiay Jerusalem tapno umawat iti kanayonan nga instruksion manipud kadagiti apostol ni Jesus. Ngem kasano a maipaay dagiti apostol ti kasapulan dagidi a bisita? Ibaga kadatayo ti salaysay ti Biblia: “Amin dagidiay agik-ikut kadagiti talon wenno balbalay ilakoda ida ket iyegda dagiti pateg ti bambanag a nailako ket ikabilda ida iti sakaanan dagiti apostol. Kalpasanna maibunong iti tunggal maysa, a kas iti pakasapulanna.” (Aramid 4:33-35) Talaga a naparabur ti kabbuangay a kongregasion idiay Jerusalem!

Idi agangay, imparangarang ti dadduma a kongregasion ti kasta a kinaparabur. Kas pagarigan, nupay napanglaw dagiti Kristiano a taga Macedonia, nalablabes pay ngem iti kabaelanda ti impaayda a tulong kadagiti agkasapulan a kakabsatda idiay Judea. (Roma 15:26; 2 Corinto 8:1-7) Ti kongregasion ti Filipos naisangsangayan ti panangsuportana iti ministerio ni Pablo. (Filipos 4:15, 16) Ti mismo a kongregasion ti Jerusalem inaldaw a nangiwaras iti taraon kadagiti agkasapulan a balo, ken nangdutok dagiti apostol iti pito a kualipikado a lallaki tapno siguraduenda nga awan ti maikapis a balo.​—Aramid 6:1-6.

Napartak nga agtignay dagiti nagkauna a kongregasion Kristiano ta insaganaanda uray dagiti posible a dumteng a narigat a panawen. Kas pagarigan, idi impakpakauna ni propeta Agabo ti iyaay ti dakkel a bisin, dagiti adalan iti kongregasion idiay Antioquia iti Siria “inkeddengda, tunggal maysa kadakuada sigun iti kabaelan ti asinoman, a mangipatulodda iti tulong a pagserbi kadagiti kakabsat nga agnanaed idiay Judea.” (Aramid 11:28, 29) Anian a nagsayaat a kababalin ti imparangarangda kas panagsagana iti posible a tumaud a panagkasapulan dagiti dadduma!

Ania ti nangtignay kadagiti nagkauna a Kristiano nga agbalin a naparabur ken naayat? Kinapudnona, kasano a masukay ti maysa ti kinaparabur? Dakkel ti masursurotayo iti ababa a panangusig iti ulidan ni Ari David.

Ti Di Nakedngan a Suporta ni David iti Pudno a Panagdayaw

Iti agarup 500 a tawen, awan ti permanente a nakaisaadan ti lakasa ti tulag​—ti sagrado a baul a mangirepresentar iti presensia ni Jehova. Naitalimeng dayta iti maysa a tolda, wenno tabernakulo, a mayakar-akar bayat ti panagalla-alla ti Israel iti let-ang agingga iti Naikari a Daga. Tarigagayan unay ni Ari David nga alaen ti lakasa manipud iti tolda a nakaitalimenganna ket mangbangon iti maitutop a balay para ken ni Jehova a pakaisaadan ti sagrado a lakasa. Iti pannakisaritana ken ni propeta Natan, kinuna ni David: “Adtoy agnanaedak iti balay a sedro, ngem ti lakasa ti tulag ni Jehova adda iti sirok dagiti lupot ti tolda.”​—1 Cronicas 17:1.

Ngem mannakigubat ni David. Gapuna, imbilin ni Jehova a ti anakna a ni Solomon ti mangbangon iti templo a pagsaadan ti lakasa ti tulag bayat ti natalna a panagturayna. (1 Cronicas 22:7-10) Ngem saan a dayta ti nangupay ken ni David nga agbalin a naparabur. Babaen ti panangorganisarna iti maysa a dakkel a grupo dagiti trabahador, impaayna dagiti materiales a mausar iti panangbangon iti templo. Kinunana idi agangay ken ni Solomon: “Nangisaganaak maipaay iti balay ni Jehova iti sangagasut a ribu a talento a balitok ken maysa a milion a talento a pirak, ket ti gambang ken ti landok awan ti mabalin a pannakatimbangda agsipud ta immabutda iti kasta a kaadu; ket nangisaganaak iti kaykayo ken batbato.” (1 Cronicas 22:14) Saan pay a napnek iti dayta. Manipud iti kinabaknangna, nangidonar iti balitok ken pirak nga aggatad ita iti nasurok a $1,200,000,000. Maysa pay, aglaplapusanan met ti donasion dagiti prinsipe. (1 Cronicas 29:3-9) Pudno nga imparangarang ni David ti naparabur a panangted!

Ania ti nangtignay ken ni David a mangted a sipaparabur? Binigbigna a pamendision ni Jehova ti amin a nagun-od ken nagapuananna. Binigbigna iti kararagna: “O Jehova a Diosmi, isuamin daytoy a kinaruay nga insaganami tapno ibangonandaka iti balay maipaay iti nasantuan a naganmo, naggapu dayta iti imam, ket kukuam amin dayta. Ket pagaammok unay, O Diosko, a maysaka a manangsukimat iti puso, ket pagragsakam ti kinalinteg. Siak, iti biangko, iti kinapalungdo ti pusok siboboluntario nga indatonko amin dagitoy a banag, ket ita ti ilim nga adda ditoy tinagiragsakko a makita a mangaramid kadagiti siboboluntario a panagidaton kenka.” (1 Cronicas 29:16, 17) Impateg ni David ti relasionna ken ni Jehova. Binigbigna a kasapulan ti agserbi iti Dios “buyogen ti naan-anay a puso ken buyogen ti naragsak a kararua,” ket naragsakan iti panangaramidna iti dayta. (1 Cronicas 28:9) Dagitoy met laeng a galad ti nangtignay kadagiti nagkauna a Kristiano a mangiparangarang iti kinaparabur.

Ni Jehova​—Ti Katan-okan a Manangted

Ni Jehova ti kasayaatan nga ulidantayo iti panangted. Gapu ta managayat ken manangipateg unay, “pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.” (Mateo 5:45) Impaayna iti sangatauan ti “biag ken anges ken amin a bambanag.” (Aramid 17:25) Kinapudnona, kas impatuldo ni adalan a Santiago, “tunggal naimbag a sagut ken tunggal naan-anay a rangkap aggapu iti ngato, ta bumaba dayta manipud iti Ama dagiti nailangitan a lawag.”​—Santiago 1:17.

Ti kangrunaan a sagut kadatayo ni Jehova isu ti panangibaonna iti “bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Awan ti makaikuna a maiparbeng laeng kadakuada ti kasta a sagut, “ta amin nagbasol ken agkurang iti dayag ti Dios.” (Roma 3:23, 24; 1 Juan 4:9, 10) Ti subbot ni Kristo ti pakaibatayan ken kalasugan ti “di mailadawan a sagut [ti Dios] nga awanan bayad,” kayatna a sawen, ti “mangringbaw a di kaikarian a kinamanangngaasi ti Dios.” (2 Corinto 9:14, 15) Gapu ta apresiarenna ti sagut ti Dios, impangpangruna ni Pablo iti biagna ti ‘naan-anay a panangsaksi iti naimbag a damag ti di kaikarian a kinamanangngaasi ti Dios.’ (Aramid 20:24) Bigbigenna a pagayatan ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.”​—1 Timoteo 2:4.

Ita, maitungtungpal daytoy babaen ti nasaknap a panangasaba ken panangisuro a trabaho a dimmanonen iti 234 a pagilian. Impakpakauna ni Jesus daytoy a panagsaknap idi kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) Wen, “kadagiti amin a nasion kasapulan a maikaskasaba nga umuna ti naimbag a damag.” (Marcos 13:10) Itay napan a tawen, ti nasurok nga innem a milion a manangiwaragawag iti naimbag a damag binusbosda ti 1,202,381,302 nga oras iti daytoy a trabaho ken nangikonduktada iti nasurok a 5,300,000 a panagadal iti Biblia. Gapu ta adda dagiti biag nga agpegpeggad, nagpateg daytoy a bilin.​—Roma 10:13-15; 1 Corinto 1:21.

Tapno matulongan dagidiay mawaw iti kinapudno iti Biblia, mayim-imprenta kada tawen ti minilion a publikasion​—a pakairamanan dagiti Biblia, libro, ken broshur. Kanayonanna, maipabpablaak ti nasurok a maysa a bilion a kopia ti Pagwanawanan ken Agriingkayo! a magasin. Gapu ta adda dagiti tattao a mangipangpangag iti naimbag a damag, umad-adu dagiti maibangbangon a Kingdom Hall ken Assembly Hall dagiti Saksi ni Jehova, nga agserbi a pagadalan iti Biblia. Iti kada tawen, mayurnos dagiti sirkito ken espesial nga asamblea, agraman dagiti kombension distrito. Agtultuloy met ti panangsanay kadagiti misionero, agdaldaliasat a manangaywan, panglakayen, ken ministerial nga adipen. Agyamantayo ken ni Jehova ta pinagbalinna a posible dagitoy a probision babaen “ti matalek ken masirib nga adipen.” (Mateo 24:45-47) Awan duadua a kayattayo nga iyebkas ti panagyamantayo Kenkuana!

Panangipakita iti Panagyaman ken ni Jehova

Nagtaud amin iti boluntario a kontribusion ti pondo a nausar iti panangbangon iti templo ken panangipaay kadagiti kasapulan ti nagkauna a kongregasion Kristiano. Nupay kasta, laglagipen nga awan ti asinoman a mangpabaknang ken ni Jehova, ti Makinkukua iti amin a banag. (1 Cronicas 29:14; Haggeo 2:8) No kasta, dagiti kontribusion ket pammaneknek nga ay-ayatentayo ni Jehova ken tarigagayantayo nga itandudo ti pudno a panagdayaw. Sigun ken Pablo, dagitoy a kinaparabur ket “ebkas ti panagyaman iti Dios.” (2 Corinto 9:8-13) Iparparegta ni Jehova ti kasta a panangted gapu ta ipakitana nga addaantayo iti umiso a kababalin ken maysa a puso nga agayat ken ni Jehova. Dagidiay naparabur ken agpannuray ken ni Jehova mabendisionan ken rumang-ayda iti naespirituan. (Deuteronomio 11:13-15; Proverbio 3:9, 10; 11:25) Impanamnama kadatayo ni Jesus a magun-odtayo ti ragsak idi kinunana: “Ad-adu ti kinaragsak iti panangted ngem iti panangawat.”​—Aramid 20:35.

Dagiti naparabur a Kristiano dida urayen nga adda ti panagkasapulan. Imbes ketdi, mangbirokda kadagiti gundaway nga ‘agaramid iti naimbag kadagiti amin, ngem nangnangruna kadagidiay nainaig kadakuada iti pammati.’ (Galacia 6:10) Iti panangiparegta iti nadiosan a kinaparabur, insurat ni Pablo: “Dikay lipatan ti panagaramid iti naimbag ken ti panangiranud iti bambanag iti sabsabali, ta babaen iti kakasta a sakripisio maay-ayo a naan-anay ti Dios.” (Hebreo 13:16) Makaay-ayo unay ken ni Jehova a Dios ti panangusartayo kadagiti ik-ikutantayo​—tiempo, pigsa, material a sanikua​—a mangtulong kadagiti dadduma ken mangitandudo iti nasin-aw a panagdayaw. Pudno nga ay-ayatenna ti naparabur.

[Kahon/Ladawan iti panid 28, 29]

Dagiti Pamay-an ti Dadduma a Mangted

DAGITI KONTRIBUSION ITI SANGALUBONGAN A TRABAHO

Adu ti mangilasin, wenno mangibadyet, iti kantidad nga itinnagda kadagiti kahon ti kontribusion a namarkaan iti “Contributions for the Worldwide Work​—Matthew 24:14.”

Dagiti kongregasion binulan nga ipatulodda dagitoy a kantidad kadagiti opisina dagiti Saksi ni Jehova nga agserserbi iti pagilianda. Mabalin met nga ipatulod a direkta dagiti boluntario a donasion a kuarta iti Watch Tower Bible and Tract Society of the Philippines, Inc., P.O. Box 2044, 1060 Manila, wenno iti sanga nga opisina nga agserserbi iti pagilianyo. Dagiti tseke ket nasken a naipanagan iti “Watch Tower.” Mabalin met nga idonar dagiti alahas wenno dadduma pay a napapateg a banag. Masapul a mapakuyogan dagitoy a kontribusion iti ababa a surat a mangibagbaga a dayta ket direkta a sagut.

KONDISIONAL A DONASION

Mabalin nga idonar ti kuarta babaen ti naisangsangayan nga urnos a, no kiddawen ti nagidonar, maisubli ti donasion kenkuana. Para iti kanayonan nga impormasion, pangngaasiyo ta agsuratkayo iti Treasurer’s Office iti nadakamat a direksion.

NAIPLANO A PANAGIDONAR

Malaksid kadagiti direkta a sagut ken kondisional a donasion a kuarta, adda dagiti sabali pay a pamay-an ti panagidonar nga agpaay iti panagserbi iti Pagarian iti intero a lubong. Karaman ditoy ti:

Insurance: Mabalin a ti Watch Tower Society ti agserbi a benepisario ti life insurance policy wenno ti retirement/pension plan.

Deposito iti Banko: Dagiti deposito iti banko, sertipiko ti deposito, wenno indibidual a deposito iti panagretiro ket mabalin nga italek wenno maibayad iti Watch Tower Society inton matay ti nagidonar, a mayannurot kadagiti paglintegan ti lokal a banko.

Stock Ken Bond: Mabalin nga idonar dagiti stock ken bond iti Watch Tower Society kas direkta a sagut.

Lote Ken Pasdek: Mabalin nga idonar ti lote wenno pasdek kas direkta a sagut wenno, iti kaso ti maysa a balay, babaen ti panangireserba iti pagtaengan ti nagidonar, a makapagtultuloy nga agnaed sadiay bayat a sibibiag. Makiumankayo iti sanga nga opisina iti pagilianyo sakbay a legal nga iyallatiwyo dagiti papeles ti aniaman a lote, balay, wenno pasdek.

Gift Annuity: Iti daytoy nga urnos, ti nagidonar iyallatiwna ti kuarta wenno dagiti security iti Watch Tower Society. Ti nagidonar, wenno daydiay tinudinganna, ket makaawat met iti espesipiko a kantidad kada tawen bayat a sibibiag. Makissayan ti income tax a bayadan ti nagidonar iti tawen a mapatalgedan ti gift annuity.

Testamento Ken Bambanag a Maitalek (Trusts): Mabalin nga ipatawid ti sanikua wenno kuarta iti Watch Tower Society babaen ti legal ti pannakapatalgedna a testamento, wenno ti Watch Tower Society ti agserbi a benepisario ti katulagan mainaig kadagiti bambanag a maitalek. Mabalin nga addada bentahana iti buis no relihioso nga organisasion ti benepisario ti trust.

Kas ipasimudaag ti termino a “naiplano a panagidonar,” kalikaguman dagitoy a kita ti donasion ti panagplano daydiay agidonar. Tapno matulongan dagiti indibidual nga agtarigagay a tumulong iti sangalubongan a trabaho dagiti Saksi ni Jehova babaen ti maysa a kita ti naiplano a panagidonar, naisagana ti Ingles ken Espaniol a broshur a napauluan iti Charitable Planning to Benefit Kingdom Service Worldwide. Naisurat daytoy a broshur a pangsungbat kadagiti adu a naawat a saludsod maipapan kadagiti sagut, testamento, ken trust. Naglaon met daytoy iti kanayonan a makatulong nga impormasion maipapan iti panagplano mainaig kadagiti sanikua, kuarta, ken buis. Ibagana kadagiti indibidual no ania dagiti nadumaduma a wagas a dagiti sagut ket mabalin nga ited ita wenno ipatawid inton pumusayda. Kalpasan a nabasada ti broshur ken nakiumanda kadagiti mammagbaga mainaig iti linteg wenno buis ken iti Charitable Planning Office, adu dagidiay nakatulong kadagiti Saksi ni Jehova iti sangalubongan ken naaprobetsarda pay dagiti benepisio mainaig iti panagbuis gapu iti panangaramidda iti kasta. Magun-od daytoy a broshur manipud iti Charitable Planning Office.

Para iti kanayonan nga impormasion, makiumankayo iti Charitable Planning Office, babaen ti surat wenno telepono, iti adres a nailista iti baba wenno iti opisina dagiti Saksi ni Jehova iti pagilianyo.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue San Francisco del Monte

1105 Quezon City

Telepono: 411-6090

[Ladawan iti panid 26]

Ania ti nangtignay kadagiti nagkauna a Kristiano nga agbalin a naparabur?