Malagipyo Pay?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

• Kadagiti ania a wagas a mapagulidanan ni Ruth?

Mapagulidanan iti panagayatna ken ni Jehova, iti nasungdo nga ayatna ken ni Noemi, ken iti panangiparangarangna kadagiti galad a kinagaget ken kinapakumbaba. Nainkalintegan unay a minatmatan dagiti tattao kas ‘nakasaysayaat a babai.’ (Ruth 3:11)​—4/15, panid 23-6.

• Kasanotayo nga ammo nga ipatpateg ni Jehova dagiti gagangay a tattao?

Kinunana kadagiti Israelita, a nairurumen idiay Egipto, a saanda nga ikuspil dagiti nanumo. (Exodo 22:21-24) Ni Jesus, a nangtulad ken ni Amana, nangipakita iti pudno nga interes kadagiti gagangay a tattao, ket pinilina kas apostolna dagiti lallaki nga “awan adalna ken gagangay.” (Aramid 4:13; Mateo 9:36) Matuladtayo ti Dios babaen ti panangipakita iti pannakaseknan kadagiti sabsabali, kas kadagiti agtutubo.​—4/15, panid 28-31.

• Kasanotayo a masigurado nga ammo ni Jehova ti ar-aramidentayo?

Ipakita dagiti salaysay ti Biblia nga ammo ni Jehova dagiti gapuanan dagiti tattao. Nakitana ti indaton ni Abel, ken ammona ‘dagiti sakripisiotayo a panagdaydayaw, ti bunga dagiti bibig.’ (Hebreo 13:15) Ammo ni Jehova nga inkagumaan ni Enoc nga ay-aywen ti Dios babaen ti nadalus ken nalinteg a panagbiagna. Ken napaliiw ti Dios no kasano a ti maysa a di Israelita a balo idiay Sarepta inranudna ti bassit nga adda kenkuana agpaay ken ni propeta Elias. Ammo met ni Jehova dagiti ar-aramidtayo a mangipakita iti pammati.​—5/1, panid 28-31.

• Apay a maikuna a kalpasan ti Pentecostes 33 K.P., dagiti Judio a nagbalin a Kristiano masapul a personal nga agdedikarda iti Dios?

Idi 1513 K.K.P., dagiti nagkauna nga Israelita nagbalinda a dedikado nga ili ni Jehova. (Exodo 19:3-8) Sipud idi, nayanak dagiti Judio iti dayta a dedikado a nasion iti sidong ti Linteg ti tulag. Ngem winaswas ni Jehova ti Linteg ti tulag babaen ti ipapatay ni Kristo idi 33 K.P. (Colosas 2:14) Kalpasanna, dagiti Judio nga agtarigagay nga agserbi iti Dios buyogen ti anamongna nasken nga agdedikarda kenkuana ken agpabautisarda iti nagan ni Jesu-Kristo.​—5/15, panid 30-1.

• Ti kadi panangpuor iti insienso adda lugarna iti pudno a panagdayaw ita?

Ti panagusar iti insienso ket paset ti pudno a panagdayaw iti nagkauna nga Israel. (Exodo 30:37, 38; Levitico 16:12, 13) Ngem idi natay ni Kristo, nagpatingga ti Linteg ti tulag, agraman ti panagusar iti insienso. Dagiti Kristiano mabalinda nga ikeddeng ti agusar iti insienso kadagiti di narelihiosuan a panggep, ngem saan a paset dayta ti pudno a panagdayaw ita. Ti karirikna dagiti sabsabali masapul met a maikabilangan tapno saanda a maitibkol.​—6/1, panid 28-30.

• Ania a baro a damag ti nangtignay iti adu tapno ad-adda a panunotenda ti kinapudno a nagbiag ni Jesus ditoy daga?

Nasaknap a naipadamag ti maysa a kahon, maysa nga ossuary, a nasarakan idiay Israel. Agparang dayta idi pay umuna a siglo, ken adda nayukrit iti dayta a mabasa: “Santiago, anak ni Jose, a kabsat ni Jesus.” Adda dagiti mangibaga a daytoy “ti kadaanan a saan a naggapu iti Biblia nga arkeolohikal a pammaneknek” a nagbiag ni Jesus.​—6/15, panid 3-4.

• Kasano a masursuro ti tao ti agayat?

Dagiti tattao damoda a masursuro ti agayat babaen ti ulidan ken panangsanay dagiti dadakkelda. No aginnayat ken agrinnaem ti agassawa, masursuro dagiti annak ti agayat. (Efeso 5:28; Tito 2:4) Uray dimmakkel ti maysa a tao iti pamilia nga awanan iti ayat, masursurona ti agayat babaen ti panangawat iti naamaan a panangiwanwan ni Jehova, babaen ti panagpatulong iti nasantuan nga espiritu, ken babaen ti naayat a tulong dagiti Kristiano a kakabsat.​—7/1, panid 4-7.

• Asino ni Eusebius, ken ania ti masursurotayo iti panagbiagna?

Ni Eusebius ket maysa a nagkauna a historiador. Idi 324 K.P., nakompletona ti sangapulo a tomo a libro a napauluan History of the Christian Church. Nupay patienna nga addan ti Ama sakbay a naadda ti Anak, inawat ni Eusebius ti naiduma a panangmatmat iti konsilio ti Nicaea. Nalawag a saanna nga inkabilangan ti kinuna ni Jesus a dagiti pasurotna masapul a “saan a paset ti lubong.” (Juan 17:16)​—7/15, panid 29-31.

• Binalbaliwan kadi ni Jehova ti panangmatmatna iti poligamia?

Saan a binaliwan ni Jehova ti panangmatmatna iti poligamia. (Malakias 3:6) Iti urnos ti Dios iti umuna a lalaki ket “makitipon iti asawana” ken agbalinda a maymaysa a lasag. (Genesis 2:24) Kinuna ni Jesus a maibilang a pannakikamalala no idiborsio ti maysa a tao ti saan met a nakiabig nga asawana, sa makiasawa manen. (Mateo 19:4-6, 9) Nagpatingga ti panangipalubos ni Jehova iti poligamia idi mabuangay ti kongregasion Kristiano.​—8/1, panid 28.