Salsaludsod Dagiti Agbasbasa
Iti adu a paset ti lubong, nakayugalianen ti panangted kadagiti regalo iti kasar. Ania dagiti Nainkasuratan a prinsipio a masapul nga usigentayo no mangted wenno umawat kadagiti kasta a regalo?
Anamongan ti Biblia ti panangted kadagiti regalo no maited dayta buyogen ti umiso a motibo ken iti maitutop nga okasion. No maipapan iti panangted, paregtaen ti Biblia dagiti pudno a Kristiano a tuladenda ti naparabur a Mangmangted kadagiti kasapulanda, ni Jehova. (Santiago 1:17) Indagadag ni apostol Pablo kadagiti padana a Kristiano: “Dikay lipatan ti panagaramid iti naimbag ken ti panangiranud iti bambanag iti sabsabali, ta babaen iti kakasta a sakripisio maay-ayo a naan-anay ti Dios.” Maparegta ngarud dagiti Kristiano nga agbalin a naparabur.—Hebreo 13:16; Lucas 6:38.
Iti Estados Unidos, gagangayen a mausar ti gift registry, wenno libro iti maysa a pagtagilakuan a pakailistaan dagiti bambanag a kayat dagiti agkasar a mairegalo kadakuada. Idiay Inglatera, maawagan dayta iti wedding list. Kadawyanen a dagiti ngannganin agkasar mapanda iti pagtagilakuan tapno kitaenda no ania dagiti tagilako sadiay ken ilistada dagiti kayatda a mairegalo kadakuada. Maawis dagiti kakabagian ken gagayyem ti agkasar a mapan iti maitutop a pagtagilakuan tapno pilienda iti listaan nga inaramid dagiti agkasar no ania ti gatangenda nga iregalo kadakuada. Ti pagsayaatan ti gift-registry list ket tapno saanen a marigatan daydiay agregalo a mangkita no ania ti iregalona, ken saan metten nga agbannog dagidiay naregaluan a mangisubli iti pagtagilakuan kadagiti regalo a dida magustuan.
Adda kadagiti ngannganin agkasar no kayatda ti agusar iti gift registry wenno saan. Nupay kasta, mabalin a kayat ti maysa a Kristiano ti agannad tapno maliklikan dagiti kaugalian a maisalungasing kadagiti prinsipio ti Biblia. Kas pagarigan, kasanon no agilista dagiti ngannganin agkasar iti agkakangina a bambanag? Iti kasta a kasasaad, mabalin a di makapagregalo dagiti awan makukuartana, wenno baka dida pay ketdin dumar-ay iti kasar tapno dida laeng maibabain gapu ta nalaka la ti regaloda. Insurat ti maysa a Kristiano a babai: “Agbalbalinen a makapadagsen ti panagregalo. Kayatko ti agbalin a naparabur, ngem mapukpukawen ti dati a ragsakko a mangted.” Anian a makapaladingit no ti kasar ket pagtaudan ti pannakaupay!
Wen, saan koma a panunoten dagiti agregalo a tapno maawat ti regaloda, masapul a magatang dayta iti nalatak a pagtagilakuan wenno nangina. Kinapudnona, impaganetget ni Jesu-Kristo a ti kapatgan iti Dios ket ti adda iti puso ti mangted, saan a ti material a pateg ti regalo. (Lucas 21:1-4) Umasping iti dayta, nagsurat ni apostol Pablo maipapan iti panangted iti sagut kadagiti agkasapulan: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.”—2 Corinto 9:7.
Iti Biblia, saan a dakes no ibagam a sika ti nangted iti regalo. Mabalinmo nga isurat dayta iti bassit a nota. Nupay kasta, iti dadduma a lugar, gagangayen nga iwaragawagda no siasino ti nangted iti regalo. Mabalin a mangpataud daytoy kadagiti parikut. Dagidiay nagregalo mabalin a kayatda nga ilimed nga isuda ti nagregalo tapno saan a maisentro ti atension kadakuada. Agtigtignay dagiti kasta a tattao maitunos iti prinsipio a masarakan iti Mateo 6:3, a nagkunaan ni Jesus: “Ngem sika, no mangmangtedka kadagiti sagut ti asi, dika palubosan a maammuan ti makannigid nga imam ti ar-aramiden ti makannawanmo.” Mabalin a marikna ti dadduma a personal a banag ti panagregalo a masapul nga agtalinaed a nalimed iti nagbaetan ti mangted ken ti umawat. Kanayonanna, ‘mangsulbog iti panagsisinnalisal’ ti panangibaga no siasino dagiti nangted iti regalo gapu ta mabalin a pagdidinniligenda dagiti inregaloda. (Galacia 5:26) Sigurado a saan a kayat dagiti Kristiano nga adda alusiisen wenno mabainan gapu iti publiko a pannakaiwaragawag dagiti nagan dagiti nagregalo.—1 Pedro 3:8.
Wen, agbalin a makaparagsak ti panagregalo no agtignaytayo a maitunos kadagiti prinsipio a masarakan iti Sao ti Dios.—Aramid 20:35.