Maparagsakyo ti Dios

TALAGA kadi a maapektarantayo ti rikna ti Dios? Ammo kadi ti Dios ti agragsak? Ipapan ti dadduma a ti Dios ket maysa laeng a puersa. Manamnamatayo kadi nga ammona ti agragsak ti maysa a puersa a saan a persona? Sigurado a saan. Usigenyo, nupay kasta, no ania ti ibaga ti Biblia maipapan iti Dios.

“Ti Dios maysa nga Espiritu,” kinuna ni Jesu-Kristo. (Juan 4:24) Ti espiritu ket maysa a porma ti biag a naiduma kadagiti tattao. Nupay di makita dagiti tattao, ti espiritu ket addaan iti bagi ​—“naespirituan.” (1 Corinto 15:44; Juan 1:18) Iti panangusarna iti piguratibo nga ebkas, ibaga pay ketdi ti Biblia a ti Dios ket addaan kadagiti mata, lapayag, im-ima, ken dadduma pay.a Adda met nagan ti Dios​—Jehova. (Salmo 83:18) Gapuna, ti dakdakamaten ti Biblia a Dios ket maysa nga espiritu a persona. (Hebreo 9:24) “Isu ti sibibiag a Dios ken ti Ari agingga iti tiempo a di nakedngan.”​—Jeremias 10:10.

Kas pudno a sibibiag a persona, adda panunot ken makapagtignay ni Jehova. Makaiparangarang kadagiti galad ken rikna, kayat ken di kayat. Iti kinapudnona, aglaplapusanan dagiti ebkas iti Biblia a mangipakaammo kadagiti banag a kaay-ayo ken kagurana. Dagiti aramid-tao a dios ken idolo iyanninawda laeng dagiti kababalin ken galad dagiti tattao a nangimbento kadakuada, idinto ta ti mannakabalin-amin a Dios, ni Jehova, isu ti mismo a Namunganay kadagiti emosion nga immulana kadagiti tao.​—Genesis 1:27; Isaias 44:7-11.

Awan duadua a ni Jehova ket “naragsak a Dios.” (1 Timoteo 1:11) Saan laeng a maragsakan kadagiti parsuana no di ket pagragsakanna met nga itungpal ti panggepna. Babaen ken ni propeta Isaias, impakaammo ni Jehova: “Isuamin a pakaragsakak aramidekto . . . Sinaok a mismo dayta; iyegkonto met. Binukelko dayta, aramidekto met.” (Isaias 46:9-11) Inkanta ti salmista: “Ni Jehova agrag-onto iti ar-aramidna.” (Salmo 104:31) Ngem adda pay sabali a gubuayan ti rag-o ti Dios. Kunana: “Agmasiribka, anakko, ket pagrag-oem ti pusok.” (Proverbio 27:11) Panunotenyo no ania ti kaipapananna dayta​—mabalintayo a paragsaken ti Dios!

No Kasanotayo a Maparagsak ti Puso ti Dios

Usigenyo no kasano a ti patriarka a ni Noe pinaragsakna ti puso ni Jehova. Ni Noe “nakasarak iti pabor kadagiti mata ni Jehova” agsipud ta “pinaneknekanna ti bagina nga awan pagkuranganna iti tengnga dagiti kapatadanna.” Naiduma unay kadagiti nadangkes a tattao idi, ti pammati ken kinatulnog ni Noe ket makaay-ayo unay iti Dios isu a naikuna a ni “Noe nakipagna iti pudno a Dios.” (Genesis 6:6, 8, 9, 22) “Babaen iti pammati, . . . nangipakita ni Noe iti nadiosan a buteng ket nangibangon iti daong a pakaisalakanan ti sangakabbalayanna.” (Hebreo 11:7) Ni Jehova naay-ayo ken ni Noe ket binendisionanna agraman ti pamiliana babaen ti pannakaispalda iti dayta a nariribuk a tiempo ti historia ti tao.

Ti patriarka a ni Abraham pagaammona met unay ti karirikna ni Jehova. Ti nauneg a pannakaammona maipapan iti pampanunot ti Dios ket nagminar idi impakaammo kenkuana ni Jehova a madadael ti Sodoma ken Gomorra gapu iti kinalulokda. Am-ammo unay ni Abraham ni Jehova isu a naibagana a narigat a panunoten a mairaman dagiti nalinteg kadagiti nadangkes a papatayen ti Dios. (Genesis 18:17-33) Tawtawen kalpasanna, kas panagtulnog iti pammilin ti Dios, “ni Abraham kaslanan indaton ni Isaac,” ta “pinanunotna nga isu kabaelan ti Dios nga ibangon uray pay manipud kadagiti natay.” (Hebreo 11:17-19; Genesis 22:1-18) Ammo ni Abraham ti karirikna ti Dios ket nangipakita iti kasta a nabileg a pammati ken panagtulnog isu a “naawagan ‘gayyem ni Jehova.’”​—Santiago 2:23.

Ti sabali pay a tao a nangikagumaan a mangparagsak iti puso ti Dios isu ni Ari David iti nagkauna nga Israel. Maipapan kenkuana, kinuna ni Jehova: “Nasarakak ni David nga anak ni Jesse, maysa a lalaki a naanamongan iti pusok, a mangaramidto iti amin a bambanag a tarigagayak.” (Aramid 13:22) Sakbay a nakiranget iti higante a ni Goliat, naan-anay a nagtalek ni David iti Dios ket kinunana ken ni Saul nga ari ti Israel: “Ni Jehova a nangispal kaniak iti gammat ti leon ken iti gammat ti oso, isu ti mangispalto kaniak iti ima daytoy a Filisteo.” Ni Jehova binendisionanna ti panagtalek ni David Kenkuana, ket napapatay ni David ni Goliat. (1 Samuel 17:37, 45-54) Tinarigagayan ni David a saan laeng a dagiti aramidna no di ket uray ‘dagiti sasao ti ngiwatna ken ti panagmennamenna ti pusona agbalinda a makaparagsak iti sango ni Jehova.’​—Salmo 19:14.

Datayo ngay? Kasanotay a maay-ayo ni Jehova? No paunegentayo ti pannakaammotayo iti karirikna ti Dios, ad-adda a maammuantayo dagiti pamay-an a mangparagsak iti puso ti Dios. Gapuna, bayat a basaentayo ti Biblia, napateg nga ikagumaantayo nga adalen ti maipapan iti karirikna ti Dios. Iti kasta, ‘mapnotayo iti umiso a pannakaammo iti pagayatanna iti isuamin a sirib ken naespirituan a pannakaawat, tapno magnatayo a maikari ken Jehova iti panggep a panangay-ayo a naan-anay kenkuana.’ (Colosas 1:9, 10) Pagangayanna, ti pannakaammo tulongannatayo a mangpabileg iti pammatitayo. Nasken daytoy agsipud ta ‘no awan ti pammati, di mabalin nga ay-aywen a naan-anay ti Dios.’ (Hebreo 11:6) Wen, maparagsaktayo ti puso ni Jehova babaen ti panangikagumaantayo a maaddaan iti nabileg a pammati ken babaen ti panangitunos iti biagtayo iti pagayatanna. Malaksid iti dayta, masapul nga agannadtayo a ditay mapagura ti puso ni Jehova.

Saanmo a Pagladingiten ti Puso ti Dios

Maysa a pagarigan a mabalin a masaktan ti rikna ni Jehova ket mabasa iti salaysay maipapan iti kaaldawan ni Noe. Iti dayta a tiempo, “ti daga napno iti kinaranggas. Gapuna ti Dios nakitana ti daga ket, adtoy! nadadael, agsipud ta isuamin a lasag dinadaelna ti dalanna iti daga.” Ania ti narikna ti Dios idi nakitana ti kinalulok ken ti kinaranggas? “Nagladingitan ni Jehova ti panangaramidna kadagiti tattao iti daga,” kuna ti Biblia, “ket nasaktan ti pusona.” (Genesis 6:5, 6, 11, 12) Naladingitan ti Dios ta nagbalin a nakadakdakes dagiti tattao isu a nagbaliw ti panangmatmatna iti daydi a nadangkes a kaputotan sakbay ti Layus. Gapu iti pannakarimonna iti kinadakesda, dinadaelna dagiti mismo a tattao a pinarsuana.

Nakapungtot met ni Jehova idi a ti mismo nga ilina, ti nagkauna a nasion ti Israel, maulit-ulit a dida inkankano ti rikna ken naayat a panangiwanwanna. Inyasug ti salmista: “Anian a namin-adu nga agrebeldeda kenkuana iti let-ang, sinaktanda ti riknana iti desierto! Ket maulit-ulit a subokenda ti Dios, ket pinasakitanda uray Daydiay Santo ti Israel.” Kaskasdi, “isu naasi; abbonganna ti biddut ket saan a mangdadael. Ket adu a daras nga insanudna ti ungetna, ket saanna a gutugoten ti isuamin a pungtotna.” (Salmo 78:38-41) Uray pay nainkalintegan a sinagaba dagiti rebelioso nga Israelita dagiti imbunga ti kinamanagbasolda, kuna kadatayo ti Biblia a “bayat ti isuamin a pannakaparigatda [ti Dios] naparigatan.”​—Isaias 63:9.

Iti laksid ti nawadwad a pammaneknek ti nadungngo a panagayat kadakuada ti Dios, ti ili ti Israel “nagtultuloy nga inang-angawda dagiti mensahero ti pudno a Dios ken inum-umsida ti sasaona ken rinabrabakda dagiti mammadtona, agingga a simged ti pungtot ni Jehova iti ilina, agingga nga awan ti pannakapaimbag.” (2 Cronicas 36:16) Nagangayanna, gapu iti nasubeg a kinarebeliosoda, “sinaktanda ti nasantuan nga espirituna” agingga a napukawda ti anamong ni Jehova. (Isaias 63:10) Ti resulta? Nainkalintegan nga inikkat ti Dios ti pannalaknibna kadakuada, ket nagsagabada iti didigra idi a dagiti taga Babilonia pinarmekda ti Juda ken dinadaelda ti Jerusalem. (2 Cronicas 36:17-21) Anian a nagladingit no dagiti tattao pilienda ti dakes a panagbiag a makasair ken mamagpungtot iti Namarsua kadakuada!

Ibatad kadatayo ti Biblia a makapasakit iti Dios ti nakillo nga aramid. (Salmo 78:41) Dagiti banag a karurod​—karimon pay ketdi​—ti Dios iramanna ti kinatangsit, panagulbod, pammapatay, mahiko, panagipadles, panagdayaw iti inapo, nalulok a moral, homoseksualidad, di kinasungdo iti asawa, insesto, ken panangirurumen kadagiti napanglaw.​—Levitico 18:9-29; 19:29; Deuteronomio 18:9-12; Proverbio 6:16-19; Jeremias 7:5-7; Malakias 2:14-16.

Ania ti panagrikna ni Jehova iti idolatria? Kuna ti Exodo 20:4, 5: “Dika mangaramid maipaay kenka iti maysa a kinitikitan a ladawan wenno maysa a porma a kaasping ti aniaman a banag nga adda iti langlangit sadi ngato wenno adda iti daga iti baba wenno adda iti dandanum iti uneg ti daga. Dika agruknoy kadakuada wenno mauyotan nga agserbi kadakuada.” Apay? Agsipud ta ti idolo ket “nakarimrimon a banag dayta ken Jehova.” (Deuteronomio 7:25, 26) Imballaag ni apostol Juan: “Babassit nga annak, igagayo ti bagbagiyo manipud kadagiti idolo.” (1 Juan 5:21) Ken insurat ni apostol Pablo: “Dungdungnguek, pagtalawanyo ti idolatria.”​—1 Corinto 10:14.

Gun-odenyo ti Anamong ti Dios

‘Ti kinasinged ti Dios adda kadagidiay napalungdo.’ Dagidiay “awan pakababalawanna iti dalanda makaparagsakda kenkuana.” (Proverbio 3:32; 11:20) Ngem agikaronto dagidiay agtultuloy a mangparurod iti Dios, dagidiay sisusubeg a di mangikankano wenno mangpasakit iti nalinteg a rikriknana. (2 Tesalonica 1:6-10) Kinapudnona, iti din agbayag, pagpatinggaennanto ti amin a kinadakes a nakasaksaknap ita.​—Salmo 37:9-11; Sofonias 2:2, 3.

Ngem nakabatbatad iti Biblia a ni Jehova “saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.” (2 Pedro 3:9) Kaykayatna la ketdi nga ipakita ti ayatna kadagiti nalinteg a tattao a mangay-ayat kenkuana ngem iti mangdadael kadagidiay di agbalbaliw. Maragsakan ni Jehova, “saan nga iti ipapatay ti nadangkes, no di ket iti daydiay itatallikud ti maysa a nadangkes manipud iti dalanna ket pudno nga agtultuloy nga agbiag.”​—Ezequiel 33:11.

Isu a saan a tarigagayan ni Jehova a makapungtot iti siasinoman. “Ni Jehova nadungngo unay iti panagayat ken naasi.” (Santiago 5:11) Buyogen ti naan-anay a panagtalek iti rikrikna ti Dios, mabalinyo nga “iyallatiw kenkuana ti isuamin a pakaringgoranyo, agsipud ta isu maseknan kadakayo.” (1 Pedro 5:7) Mangnamnamakayo a dagidiay mangparagsak iti puso ti Dios addaanda iti naisangsangayan a namnama a mangtagiragsak iti anamong ken pannakigayyemna. Gapuna, nagangganat itan nga “itultuloyyo a siguraduen no ania ti makaay-ayo iti Apo.”​—Efeso 5:10.

Anian a nakasaysayaat a ti Dios, buyogen ti di kaikarian a kinamanangngaasina, imparangarangna dagiti nadayag a galad ken rikriknana! Ken mabalinyo a pagrag-oen ti pusona. No tarigagayanyo nga aramiden dayta, idagadagmi a makisaritakayo kadagiti Saksi ni Jehova iti lugaryo. Maragsakanda a mangipakaammo kadakayo iti nasarakanda a praktikal ken posible a banag iti panangikagumaanda a mangay-ayo iti Dios.

[Footnote]

[Kahon iti panid 7]

Apay a ti Biblia Dineskribirna ti Dios iti Termino ti Tao?

Yantangay ti “Dios maysa nga Espiritu,” ditay makita isuna babaen dagiti literal a matatayo. (Juan 4:24) Nagusar ngarud ti Biblia kadagiti piguratibo nga ebkas, kas kadagiti simile, metapora, ken anthropomorphism tapno matulongantayo a mangtarus iti pannakabalin, kinatan-ok, ken ar-aramid ti Dios. Ti Anthropomorphism (iti Griego, “porma tao”) isu ti panangtukoy kadagiti banag a saan a tao kas addaan kadagiti pakabigbigan ti tao. Isu nga uray ditay ammo no ania ti itsura ti naespirituan a bagi ti Dios, dakamaten ti Biblia a ti Dios ket addaan kadagiti mata, lapayag, ima, takiag, ramay, saka, ken puso.​—Genesis 8:21; Exodo 3:20; 31:18; Job 40:9; Salmo 18:9; 34:15.

Ti kasta a panangiladawan saanna a kaipapanan a ti espiritu a bagi ti Dios ket addaan kadagiti paset a kas kadagiti bagi ti tao. Saan a literal ti kaipapanan dagiti Anthropomorphism. Tulonganda laeng dagiti tattao a maaddaan iti nasaysayaat a pannakaawat iti Dios. No awan dagiti kasta a piguratibo nga ebkas, narigat, no saan man nga imposible, a matarusan dagiti tattao ti aniaman a pannakailadawan ti Dios. Ngem saanna a kaipapanan dayta a ti personalidad ni Jehova a Dios ket pinarparbo laeng dagiti tattao. Inlawlawag ti Biblia a ti tao ket naparsua iti ladawan ti Dios​—saan ket a ti Dios iti ladawan ti tao. (Genesis 1:27) Gapu ta ‘pinaltiingan ti Dios’ dagiti mannurat ti Biblia, ti panangdeskribirda iti personalidad ti Dios ket mismo a deskripsion ti Dios kadagiti personal a galadna​—dagiti mismo a galad nga inkabilna kadagiti parsua a tattao iti nagduduma a rukod. (2 Timoteo 3:16, 17) Imbes a dagiti galad ti tao nga iparparangarang ti Dios, dagitoy ket kinapudnona dagiti galad ti Dios a naibugas iti tao.

[Ladawan iti panid 4]

Nagbalin a makaay-ayo ni Noe iti imatang ti Dios

[Ladawan iti panid 5]

Ammo ni Abraham ti karirikna ti Dios

[Ladawan iti panid 6]

Naan-anay a nagtalek ni David ken ni Jehova

[Ladawan iti panid 7]

Bayat a basaenyo ti Biblia, masursuroyo no kasano a paragsaken ti Dios

[Picture Credit Line iti panid 4]

Iti pammalubos ti Anglo-Australian Observatory, rinetrato ni David Malin