Masapul Kadi a Miembroka ti Maysa a Relihion?

‘SAAN a masapul a miembroak ti maysa a relihion wenno regular a makimisaak tapno makuna a mamatiak iti Dios!’ Kasta ti kapanunotan ti adu a tattao maipapan iti pannakimiembro iti maysa a relihion wenno aniaman a narelihiosuan nga organisasion. Iti kinapudnona, kuna ti dadduma a nasingsingedda iti Dios no pasiarenda ti nakaparsuaan ngem ti makimisa. Gagangay ita ti kapanunotan a ti pannakitimpuyog iti maysa a narelihiosuan a grupo wenno denominasion ket saan a kasapulan iti panamati iti Dios.

Ngem saan a kasta ti napasnek a panangmatmat ti dadduma. Ipettengda a nasken ti pannakimiembro ken pannakimisa, napateg pay ketdi, tapno magun-od ti maysa ti anamong ti Dios. Gapuna, ti saludsod no talaga a nasken ti pannakitimpuyog iti maysa a relihion ket saan laeng a basta panaginteres iti estadistika wenno impormasion maipapan iti relihion. Aniaman ti kapanunotan, yantangay nairaman ti relasiontayo iti Dios, saan kadi a lohikal nga ammuen ti panangmatmatna? Ania ngarud ti maadaltayo iti Saona, ti Biblia, mainaig iti daytoy topiko?

No Kasano a ti Dios Nakilangen Kadagiti Tattao Idi

Nganngani 4,400 a tawenen ti napalabas, maysa a layus ti nangdidigra iti intero a daga. Saan a nalaka a malipatan ti kasta a pasamak, ken dagiti tattao iti sangalubongan addaanda kadagiti salaysay maipapan iti dayta iti nagkauna a pakasaritaanda. Nupay addaanda iti nagduduma a detalye, adu ti pagpapadaan dagitoy a salaysay, agraman ti detalye a sumagmamano laeng ti nakalasat a tattao ken animal.

Dagiti kadi nakalasat iti Layus ket nagasat a tattao, a naiparparna laeng a nakalisi iti pannakadadael? Saan a kasta ti ipakita ti salaysay iti Biblia. Nakadkadlaw ta ti Dios saanna a pinakaammuan ti tunggal indibidual maipapan iti iyaay ti Layus. Imbes ketdi, impakaammona dayta ken ni Noe, ket ni Noe ti nangballaag kadagiti kasadaranna maipapan iti um-umay a Delubio.​—Genesis 6:13-16; 2 Pedro 2:5.

Ti pannakaispal ket nagpannuray iti panagbalin a paset daytoy a naurnos a grupo ken iti sitatallugod a panagtungpal iti bilin ti Dios a naipakaammo ken ni Noe. Ti pannakaispal dagiti animal iti daong ket maigapu met iti pannakitimpuyogda iti daytoy a grupo. Adda dagiti espesipiko a naibilin ken ni Noe tapno mangaramid kadagiti maitutop nga urnos para iti pannakaispal dagiti animal.​—Genesis 6:17–7:8.

Sinigsiglo kalpasanna, naadipen idiay Egipto dagiti kaputotan ni Noe iti anakna a ni Sem. Nupay kasta, panggep ti Dios a wayawayaan ken ipanna ida iti daga nga inkarina iti amada a ni Abraham. Dayta a panggep ket saan met a naibuksilan iti tunggal indibidual no di ket immuna a naipalgak kadagidiay napili a liderda​—da Moises ken ni Aaron a kabsatna. (Exodo 3:7-10; 4:27-31) Kalpasan a naipanaw dagiti dati nga adipen kas maysa a grupo manipud Egipto, naited kadakuada ti Linteg ti Dios iti Bantay Sinai ket nagbalinda a nasion ti Israel.​—Exodo 19:1-6.

Nagbalin a posible ti pannakaispal dagiti indibidual nga Israelita babaen laeng ti pannakitimpuyogda iti maysa a grupo a binuangay ti Dios ken panangsurotda iti panangiwanwan dagiti nadutokan a lider ti grupo. Napalubosan pay dagiti indibidual nga Egipcio a makitimpuyog iti daytoy a grupo a nabatad nga inanamongan ti Dios. Idi pimmanaw dagiti Israelita manipud Egipto, simmurot kadakuada dagitoy nga indibidual, isu a manamnamada met ti bendision ti Dios.​—Exodo 12:37, 38.

Kalpasanna, idi umuna a siglo, inrugi ni Jesus ti panangasabana, a pinagkaykaysana dagiti tattao kas ad-adalanna. Nakilangen kadakuada kas maysa a grupo, nupay nangipaay met iti naayat nga atension kadagiti indibidual sigun kadagiti kasapulanda. Kinuna ni Jesus kadagiti 11 a matalek nga apostolna: “Dakayo dagidiay nagtalinaed kaniak kadagiti pannakasusuotko; ket mangaramidak iti tulag kadakayo, kas iti panangaramid ni Amak iti maysa a tulag kaniak, maipaay iti maysa a pagarian.” (Lucas 22:28, 29) Kalpasanna, naiparukpok ti nasantuan nga espiritu kadagiti adalanna idi nagtitiponda kas maysa a grupo.​—Aramid 2:1-4.

Dagitoy a pagarigan nalawag nga ipakitana a ti Dios kanayon a nakilangen idi kadagiti tattaona kas maysa nga organisado a grupo. Dagiti sumagmamano nga indibidual a personal a nakilangenan ti Dios​—da Noe, Moises, Jesus ken dadduma pay​—ti, kinapudnona, inusarna a nakikomunikar iti maysa a nagkaykaysa a grupo. Awan ti makagapu a patien a naiduma ti pannakilangen ti Dios kadagiti adipenna ita. Siempre, mamataud daytoy iti sabali a saludsod: Umanay kadin ti pannakitimpuyog iti uray ania a narelihiosuan a grupo? Usigentayo daytoy a napateg a saludsod iti sumaganad nga artikulo.

[Ladawan iti panid 4]

Sipud un-unana, nakilangen ti Dios kadagiti tattaona kas maysa nga organisado a grupo