Salsaludsod Dagiti Agbasbasa
Apay a napalubosan dagiti Israelita a lallaki a mangasawa kadagiti nakautibo a ganggannaet a babbai idinto ta imbilin ti Mosaiko a Linteg a dida rumbeng a makiasawa kadagiti ganggannaet?—Deuteronomio 7:1-3; 21:10, 11.
Naipalubos dayta iti sidong ti naisangsangayan a kasasaad. Imbilin ni Jehova kadagiti Israelita a parmekenda ti pito a siudad iti daga ti Canaan, a papatayenda dagiti amin nga umili. (Deuteronomio 20:15-18) Iti dadduma a nasion, nalabit a dagiti laeng nakautibo a birhen a babbai ti adulto a nakalasat. (Numero 31:17, 18; Deuteronomio 20:14) Ngem adda ti masapul nga aramiden dagitoy a babbai tapno mabalin nga asawaen ida dagiti Israelita a lallaki.
No ania ti nasken nga aramiden dagita a babbai, kuna ti Biblia: “Masapul a kiskisanna ita ti ulona ket asikasuenna dagiti kukona, ket ikkatenna kenkuana ti kagay ti pannakakautibona ket agnaed iti balaymo ket sangitanna ni amana ken ni inana iti intero a lunar a bulan; ket kalpasan dayta rebbeng a makidennaka kenkuana, ket masapul a tagikuaem a kas nobia a kaikaskasarmo, ket agbalinto nga asawam.”—Deuteronomio 21:12, 13.
Ti maysa a nakautibo a birhen a kayat nga asawaen ti maysa nga Israelita masapul a kiskisanna ti ulona. Ti panangpukis iti buok ket ebkas ti panagleddaang wenno panagladingit. (Isaias 3:24) Kas pagarigan, idi napukaw ni Job ti amin nga annak ken sanikuana, pinukisanna ti buokna kas tanda ti panagleddaang. (Job 1:20) Masapul met a ti ganggannaet a babai asikasuenna ti kukona, nalabit ipungetna ti ‘agikuko’ tapno uray no makoloran dagita, saan a makaay-ayo ti buyada. (Deuteronomio 21:12, Philippine Bible Society) Ania ti “kagay ti pannakakautibona” a nasken nga uksuben ti nakautibo a babai? Dagiti babbai kadagiti siudad ti Canaan nga asidegen a maparmek kostumbreda nga ikawes ti kapipintasan a pagan-anayda. Aramidenda dayta tapno maguyugoyda dagiti mangkautibo kadakuada. Ti nakautibo a babai nga agledleddaang masapul nga uksubenna dagita a pagan-anay.
Ti maysa a nakautibo a babai nga agbalin nga asawa ti maysa nga Israelita nasken a dung-awanna ti ipupusay dagiti ing-ingungotenna iti uneg ti maysa a lunar a bulan. Naikisap dagiti siudad ti Canaan nga uray la awan ti pakakitaan kadagiti tanda ti pamilia wenno kagimonganna. Gapu ta dagiti Israelita a soldado dinadaelda dagiti ladawan dagiti didiosenna, awanen dagiti maidaydayaw a bambanagna. Ti bulan ti panagleddaang ket nagserbi met kas tiempo ti panagdalus ket tallikudan ti nakautibo a babai ti amin a paset ti sigud a relihionna.
Ngem naiduma ti kasasaad dagiti ganggannaet a babbai iti pangkaaduan. Maipapan iti dayta, imbilin ni Jehova: “Dika mangbukel iti pannakiasawa nga aliansa kadakuada. Ti anakmo a babai dika ited iti anakna a lalaki, ket ti anakna a babai dika alaen a maipaay iti anakmo a lalaki.” (Deuteronomio 7:3) Apay a naiparit dayta? Kuna ti Deuteronomio 7:4: “Ta pagbaw-ingennanto ti anakmo manipud isusurot kaniak, ket sigurado nga agserbidanto kadagiti sabali a didios.” Naiparit ngarud dayta tapno masalakniban dagiti Israelita manipud narelihiosuan a pannakatulaw. Ngem no maipapan iti ganggannaet a babai a nadeskribir iti Deuteronomio 21:10-13, awan ti kasta a peggad nga iyegda. Natayen amin a kabagianna, ken nadadaelen dagiti ladawan a mangirepresentar kadagiti didiosenna. Awanen ti pakainaiganna kadagiti mangan-annurot iti ulbod a relihion. Iti sidong dagiti kasta a kasasaad, mapalubosan ti maysa nga Israelita a makiasawa iti maysa a ganggannaet.