Napasaranyo Kadin ti Ragsak ti Panangted?
DANDANI 50 a tawennan nga aktibo nga agserserbi kas Kristiano. Nupay kimmapuy gapu iti kinabaket, determinado a mangsarungkar iti kaibangbangon a Kingdom Hall. Bayat a nakakapet iti takiag ti maysa a kabsat a lalaki, simrek iti paggigimongan ket nagin-inayad a nagturong iti rantana—ti kahon ti kontribusion. Impisokna sadiay ti kalkalainganna a gatad nga inurnongna agpaay iti dayta a panggep. Nupay saan a makatulong iti aktual a panagibangon, kayatna ti tumulong.
Mabalin nga ipalagip daytoy a Kristiano a babai ti sabali pay a matalek a babai—ti “napanglaw a balo” a napaliiw ni Jesus a nangipisok iti dua a babassit a sinsilio iti baul ti gameng ti templo. Saan a naibaga kadatayo ti kasasaadna, ngem no kadagidi a panawen, marigatan iti pinansial ti maysa a balo. Awan duadua a simnek ti asi ni Jesus kenkuana, agsipud ta naan-anay a matarusanna ti situasion ti balo. Idi inusarna ti babai kas maysa nga ulidan kadagiti adalanna, kinunana a ti bassit a sagutna ket mangbukel iti ‘isuamin nga adda kenkuana, ti intero a pagbiagna.’—Marcos 12:41-44.
Apay a nangaramid iti kasta a panagsakripisio ti maysa nga agkasapulan a kas iti balo? Nalawag a gapu iti nauneg a debosionna ken ni Jehova a Dios, nga iti templo idiay Jerusalem ti sentro a pagdayawan Kenkuana. Nupay limitado laeng ti mabalinna nga aramiden, kayatna nga itandudo ti sagrado a panagserbi. Ken awan duadua a nakarikna iti pudpudno a rag-o iti panangipaayna iti aniaman a maitedna.
Panangted kas Panangsuporta iti Trabaho ni Jehova
Ti panangipaay iti material ken pinansial a kontribusion ket kanayon a napateg a paset ti nasin-aw a panagdayaw ken gubuayan ti dakkel a rag-o. (1 Cronicas 29:9) Iti nagkauna nga Israel, nausar dagiti kontribusion saan laeng nga iti panangpapintas iti templo no di ket tapno masuportaran ti inaldaw a panagandar ti amin a paset ti panagdayaw ken ni Jehova. Espesipiko nga imbilin ti Linteg nga ited dagiti Israelita ti apagkapullo kadagiti apitda kas pangsuporta kadagiti Levita, a mangan-annong kadagiti trabaho iti templo. Ngem ited met dagiti Levita ken ni Jehova ti apagkapullo dagiti produkto a maawatda.—Numeros 18:21-29.
Nupay nawayawayaanen dagiti Kristiano kadagiti kalikagum ti Linteg ti tulag, saan a nabalbaliwan ti prinsipio a masapul a mangipaay iti material a kontribusion dagiti adipen ti Dios kas panangsuporta iti pudno a panagdayaw. (Galacia 5:1) Kanayonanna, pagragsakan dagiti Kristiano idi umuna a siglo ti mangipaay iti kontribusion a pakabang-aran dagiti kakabsatda nga agkasapulan. (Aramid 2:45, 46) Impalagip ni apostol Pablo kadagiti Kristiano a no kasano a sipaparabur nga impaayan ida ti Dios kadagiti agkakaimbag a banag, nasken met koma a naparaburda kadagiti sabsabali. Insuratna: “Ibilinmo kadagidiay babaknang itoy agdama a sistema ti bambanag a saanda koma a napalangguad, ken isadagda ti namnamada, saan nga iti pagduaduaan a kinabaknang, no di ket iti Dios, a sibabaknang a mangipaay kadatayo iti amin a bambanag a pagragsakantayo; nga agaramidda iti naimbag, nga agbalinda a nabaknang iti nasayaat nga ar-aramid, nga agbalinda a naparabur, sisasagana a mangiranud, a sitatalged nga agurnongda maipaay iti bagbagida iti nasayaat a pamuon maipaay iti masanguanan, tapno mapetpetanda a sititibker ti pudpudno a biag.” (1 Timoteo 6:17-19; 2 Corinto 9:11) Kinapudnona, gapu iti mismo a kapadasanna, patalgedan ni Pablo ti kinuna ni Jesus: “Ad-adu ti kinaragsak iti panangted ngem iti panangawat.”—Aramid 20:35.
Nakristianuan a Panangted Ita
Iti kaaldawantayo, itultuloy dagiti adipen ni Jehova nga usaren dagiti material nga ik-ikutanda a tumulong kadagiti kakabsatda ken pangsuporta iti trabaho ti Dios. Uray dagidiay nanumo ti panagbiagda mangipaayda iti kontribusion sigun iti kabaelanda. Ammo “ti matalek ken masirib nga adipen” a manungsungbatda ken ni Jehova no kasanoda nga usaren iti kasayaatan a pamay-an dagitoy a kontribusion. (Mateo 24:45) Mausar dagiti pondo agpaay iti panagandar dagiti sanga nga opisina, panangipatarus ken panangipablaak kadagiti Biblia ken literatura a naibatay iti Biblia, panangyurnos kadagiti dadakkel a Nakristianuan a panagtataripnong, panangsanay ken panangipatulod kadagiti agdaldaliasat a manangaywan ken misionero, panangipaay iti tulong kabayatan ti didigra, ken adu pay a napateg a panggep. Usigentayo ti maysa kadagita a panggep—ti panagibangon kadagiti lugar a pagdaydayawan.
Iti makalawas, sumagmamano a daras nga agtataripnong dagiti Saksi ni Jehova kadagiti Kingdom Hall tapno agsursuroda manipud iti naespirituan nga edukasion ken tagiragsakenda ti makagunggona a timpuyog. Ngem iti adu a pagilian, saan a kabaelan dagiti lumugar a Saksi ti mangibangon iti bukodda a Kingdom Hall gapu iti rigat ti biag. Gapuna, idi 1999, impasdek dagiti Saksi ni Jehova ti maysa a programa a panangusar kadagiti pondo manipud kadagiti nabakbaknang a pagilian agpaay iti pannakaibangon dagiti Kingdom Hall kadagiti napanglaw a pagilian. Kanayonanna, rinibu ti nagboluntario a nangusar iti panawen ken paglainganda, a masansan nga agtrabahoda kadagiti sulsulinek a lugar kadagita a pagilian. Kabayatan ti konstruksion, nasursuro dagiti lumugar a Saksi ti agibangon ken agmantener, ken nagatangda dagiti kasapulan nga alikamen ken materiales babaen ti Kingdom Hall Fund. Kasta unay ti panagyaman dagiti Saksi a mangar-aramat kadagitoy baro a patakder gapu iti panawen ken kuarta nga indonar dagiti kapammatianda. Binulan met nga agdonarda para iti pannakamantener ti baro a Kingdom Hall ken pannakaisubli dagiti nagastos iti panagibangon. Iti kasta, tumultulongda iti pannakaipatakder ti ad-adu pay a Kingdom Hall.
Nabangon dagiti Kingdom Hall babaen ti panangusar kadagiti metodo ken materiales a magun-odan iti dayta a lugar. Nupay saan a nagarbo dagita a patakder, napintas, praktikal, ken kombinienteda. Idi 1999, nangrugi ti programa a panagibangon iti agarup 40 a pagilian a limitado iti pinansial. Sipud idin, dimmanon ti programa a panagibangon iti 116 a pagilian, a nakiramanan ti nasurok a kagudua ti amin a kongregasion dagiti Saksi ni Jehova iti intero a lubong. Iti naglabas a lima a tawen, nasurok a 9,000 a Kingdom Hall ti nabangon babaen iti daytoy nga urnos, nga agpromedio iti 5 a baro a patakder iti kada aldaw! Kaskasdi, kadagita a 116 a pagilian, kasapulan pay ti 14,500 a baro a Kingdom Hall. Buyogen ti pamendision ni Jehova ken ti kinatulok ken kinaparabur dagiti Saksi iti intero a lubong, manamnama nga addanto pay umdas a pondo a mangsupusop iti dayta a panagkasapulan.—Salmo 127:1.
Dagiti Kingdom Hall Papartakenda ti Panagadu
Ania ti epekto dayta a nagdakkel a trabaho kadagiti lumugar a Saksi ken iti panangikasaba iti Pagarian? Iti adu a lugar, immadu ti bilang dagiti tumabtabuno kalpasan a mabangon ti maysa a baro a Kingdom Hall. Maysa a pagarigan ti nadakamat iti report manipud Burundi: “Apaman a nalpas ti Kingdom Hall, napunno dayta. Kas pagarigan, naipatakder ti Kingdom Hall agpaay iti maysa a kongregasion nga agpromedio iti 100 ti bilang dagiti makigimgimong. Ti baro a Kingdom Hall-da ket makaanay iti 150 a katao. Idi nalpas dayta, 250 ti bilang dagiti makigimgimong.”
Apay nga adda ti kasta a panagrang-ay? Masansan a mapagsuspetsaan dagiti grupo dagiti agibumbunannag nga awanan iti pormal a pagtataripnongan no saan nga iti sirok ti maysa a kayo wenno iti kataltalonan. Iti maysa a pagilian, adda dagiti etniko a panangranggas kadagiti kasta a babassit a narelihiosuan a grupo, ken kalikaguman ti linteg a maangay kadagiti pasdek a pagdaydayawan ti amin a narelihiosuan a panaggigimong.
Gapu ta adda bukodda a patakder, nakatulong met dayta kadagiti Saksi ni Jehova tapno maipakitada iti komunidad a saanda a pasurot ti uray asino la a pastor. Insurat ti sanga nga opisina dagiti Saksi ni Jehova idiay Zimbabwe: “Iti naglabas, agtataripnong dagiti kakabsat kadagiti pribado a pagtaengan, isu a ti komunidad matmatanda ti kongregasion a kas pasurot ti makinbalay iti pagtaengan a pagtataripnonganda. Ibilangda dagiti kakabsat kas pasurot ni kastoy a polano. Nagbalbaliwen amin dagita apaman a nabasa dagiti tattao ti nalawag a nakasurat iti tunggal patakder kas ‘Kingdom Hall of Jehovah’s Witnesses.’”
Dagiti Naragsak a Mangmangted
“Ti Dios ayatenna ti naragsak a manangited,” insurat ni apostol Pablo. (2 Corinto 9:7) Siempre, makatulong unay dagiti dadakkel a donasion. Ngem kadagiti kahon ti kontribusion kadagiti Kingdom Hall ti paggapuan ti dakdakkel a pondo para iti trabaho dagiti Saksi ni Jehova. Dakkel man wenno bassit, napateg amin a kontribusion ken saan a matagibassit dagita. Malagipyo a nagpuesto ni Jesus iti maysa a lugar a mabalinna a makita ti napanglaw a balo a nangipisok iti dua a babassit a sinsiliona. Nakita met dayta ni Jehova ken dagiti anghel. Ditay pay ketdi ammo ti nagan dayta a balo, ngem sinigurado ni Jehova a maisurat iti Biblia ti inaramidna a panagsakripisio agpaay iti amin a tiempo.
Malaksid iti pannakaibangon dagiti Kingdom Hall, suportaran dagiti kontribusiontayo ti amin a benneg ti napateg a trabaho agpaay iti Pagarian. Ti pannakidanggaytayo iti kasta a wagas ket mangted kadatayo iti rason nga agrag-o ken agbalin a ‘nabaknang iti adu nga ebkas ti panagyaman iti Dios.’ (2 Corinto 9:12) Impadamag dagiti kabsattayo idiay Benin: “Iti inaldaw, adu a kararag a panagyaman ti naiturong ken ni Jehova gapu kadagiti pinansial a tulong dagiti kakabsat iti sangalubongan.” Iti sabali a bangir, datayo amin a mangipapaay iti pinansial a tulong iti trabaho ti Pagarian mapaspasarantayo ti kinaragsak nga iyeg ti Nakristianuan a panangted!
[Kahon/Ladawan iti panid 22, 23]
Dagiti Pamay-an ti Dadduma a Mangted
DAGITI KONTRIBUSION ITI SANGALUBONGAN A TRABAHO
Adu ti mangilasin, wenno mangibadyet, iti kantidad nga itinnagda kadagiti kahon ti kontribusion a namarkaan iti “Contributions for the Worldwide Work—Matthew 24:14.”
Dagiti kongregasion binulan nga ipatulodda dagitoy a kantidad kadagiti opisina dagiti Saksi ni Jehova nga agserserbi iti pagilianda. Mabalin met nga ipatulod a direkta dagiti boluntario a donasion a kuarta iti Watch Tower Bible and Tract Society of the Philippines, Inc., P.O. Box 2044, 1060 Manila, wenno iti sanga nga opisina nga agserserbi iti pagilianyo. Dagiti tseke ket nasken a naipanagan iti “Watch Tower.” Mabalin met nga idonar dagiti alahas wenno dadduma pay a napapateg a banag. Masapul a mapakuyogan dagitoy a kontribusion iti ababa a surat a mangibagbaga a dayta ket direkta a sagut.
KONDISIONAL A DONASION
Mabalin a maitalek ti kuarta tapno usaren ti Watch Tower. Ngem maisubli dayta no kiddawen ti nangitalek. Para iti kanayonan nga impormasion, pangngaasiyo ta agsuratkayo iti Treasurer’s Office iti nadakamat a direksion.
NAIPLANO A PANAGIDONAR
Malaksid kadagiti direkta a sagut ken kondisional a donasion a kuarta, adda dagiti sabali pay a pamay-an ti panagidonar nga agpaay iti panagserbi iti Pagarian iti intero a lubong. Karaman ditoy ti:
Insurance: Mabalin a ti Watch Tower ti agserbi a benepisario ti life insurance policy wenno ti retirement/pension plan.
Deposito iti Banko: Dagiti deposito iti banko, sertipiko ti deposito, wenno indibidual a deposito iti panagretiro ket mabalin nga italek wenno maibayad iti Watch Tower Society inton matay ti nagidonar, a mayannurot kadagiti paglintegan ti lokal a banko.
Stock ken Bond: Mabalin nga idonar dagiti stock ken bond iti Watch Tower kas direkta a sagut.
Lote ken Pasdek: Mabalin nga idonar ti lote wenno pasdek kas direkta a sagut wenno, iti kaso ti maysa a balay, babaen ti panangireserba iti pagtaengan ti nagidonar, a makapagtultuloy nga agnaed sadiay bayat a sibibiag. Makiumankayo iti sanga nga opisina iti pagilianyo sakbay a legal nga iyallatiwyo dagiti papeles ti aniaman a lote, balay, wenno pasdek.
Gift Annuity: Iti daytoy nga urnos, ti nagidonar iyallatiwna ti kuarta wenno dagiti security iti maysa a korporasion ti Watchtower. Ti nagidonar, wenno daydiay tinudinganna, ket makaawat met iti espesipiko a kantidad kada tawen bayat a sibibiag. Makissayan ti income tax a bayadan ti nagidonar iti tawen a mapatalgedan ti gift annuity.
Testamento ken Bambanag a Maitalek (Trusts): Mabalin nga ipatawid ti sanikua wenno kuarta iti Watch Tower babaen ti legal ti pannakapatalgedna a testamento, wenno ti Watch Tower ti agserbi a benepisario ti katulagan mainaig kadagiti bambanag a maitalek. Mabalin nga addada bentahana iti buis no relihioso nga organisasion ti benepisario ti trust.
Kas ipasimudaag ti termino a “naiplano a panagidonar,” kalikaguman dagitoy a kita ti donasion ti panagplano daydiay agidonar. Tapno matulongan dagiti indibidual nga agtarigagay a tumulong iti sangalubongan a trabaho dagiti Saksi ni Jehova babaen ti maysa a kita ti naiplano a panagidonar, naisagana ti Ingles ken Espaniol a broshur a napauluan iti Charitable Planning to Benefit Kingdom Service Worldwide. Naisurat daytoy a broshur tapno maipakaammo no ania dagiti nadumaduma a wagas a dagiti sagut ket mabalin nga ited ita wenno ipatawid inton pumusayda. Kalpasan a nabasada ti broshur ken nakiumanda kadagiti bukodda a mammagbaga mainaig iti linteg wenno buis, adu dagidiay nakatulong iti trabaho dagiti Saksi ni Jehova iti sangalubongan ken naaprobetsarda dagiti benepisio mainaig iti panagbuis gapu iti panangaramidda iti kasta. Magun-od daytoy a broshur manipud iti Charitable Planning Office.
Para iti kanayonan nga impormasion, makiumankayo iti Charitable Planning Office, babaen ti surat wenno telepono, iti adres a nailista iti baba wenno iti opisina dagiti Saksi ni Jehova iti pagilianyo.
Charitable Planning Office
Watch Tower Bible and Tract Society of the Philippines, Inc.
186 Roosevelt Avenue, San Francisco del Monte
1105 Quezon City
Telepono: 411-6090
[Dagiti Ladawan iti panid 20, 21]
Dagiti daan ken baro a paggigimongan dagiti Saksi ni Jehova
Zambia
Republika ti Central Africa