Sangsangkamaysa a Panagbangon Tapno Maidaydayaw ti Dios

ITI maysa kadagiti isla ti Solomon Islands, makitkita dagiti umili ti baro a Kingdom Hall dagiti Saksi ni Jehova. Kinuna ti maysa a babai: “Iti relihionmi, nagadu ti kampaniami tapno makaur-orkami iti pondo. Kiddawenmi kadagiti kapammatianmi nga agdonasionda, ngem kaskasdi a kurang ti pondomi a pagbangon iti baro a simbaanmi. Dakayo ngay a Saksi ni Jehova, kasano ti panagur-oryo iti pondoyo?” Kastoy ti insungbat ti Saksi a kinasaritana: “Agdaydayawkami ken Jehova kas sangalubongan a pamilia. Naibangon ti baro a Kingdom Hall-mi babaen ti donasion ti kongregasionmi ken dagiti kakabsatmi iti intero a lubong. Sinursuruannakami ni Jehova nga agkaykaysakami iti amin a banag.”

Maim-imatanganyo ti panagkaykaysa dagiti Saksi ni Jehova iti amin nga aramidenda, agraman ti panangibangonda iti rinibu a Kingdom Hall. Saan a kabbaro ti kasta a panagkaykaysa tapno maibanag dagitoy a proyekto. Iti rinibun a tawen, adda ti kasta a panagkaykaysa iti ili ti Dios. Kasano a kasta?

Panangibangon iti Tabernakulo ken iti Templo

Maipapan iti nasion nga Israel, kastoy ti imbaga ni Jehova ken Moises nasurok a 3,500 a tawenen ti napalabas: “Masapul nga iyaramidandak iti santuario.” (Exodo 25:8) No maipapan iti disenio dayta a proyekto, kinuna pay ni Jehova: “Maitunos iti isuamin nga ipakpakitak kenka [tuktukoyenna ni Moises] kas pagtuladan ti tabernakulo ken pagtuladan dagiti amin nga alikamenna, kasta ti panangaramidyo [tuktukoyenna ti intero a nasion] iti dayta.” (Exodo 25:9) Kalpasanna, imbalabala ni Jehova dagiti detalyado a disenio para iti estruktura, alikamen, ken ramramit ti santuario. (Exodo 25:10–27:19) Dayta a “tabernakulo,” wenno tolda, ti nagbalin a sentro ti pudno a panagdayaw agpaay iti intero a nasion ti Israel.

Ditay ammo no mano ti nagaramid iti dayta a proyekto, ngem naawis ti amin nga Israelita a mangsuportar iti dayta. Kinuna ni Moises kadakuada: “Manipud kadakayo mangalakayo iti kontribusion ken Jehova. Tunggal maysa a situtulok ti pusona iyegna koma kas kontribusion ni Jehova.” (Exodo 35:4-9) Ania ngay ti reaksion dagiti Israelita? Kastoy ti nailanad iti Exodo 36:3: “Innalada manipud sanguanan ni Moises ti isuamin a kontribusion nga inyeg ti annak ti Israel maipaay iti trabaho ti nasantuan a panagserbi tapno aramidenda dayta, ket, no maipapan kadagiti naud-udi a nadakamat, nangyegda pay kenkuana iti boluntario a daton iti binigambigat.”

Di nagbayag, namuntuonen dagiti indonarda nga agduduma a banag, ken intultuloy dagiti umili ti mangyeg iti ad-adu pay. Kamaudiananna, dagiti trabahador nga agar-aramid iti dayta a proyekto kastoy ti imbagada ken Moises: “Dagiti umili agiyegda iti ad-adu ngem iti kasapulan ti panagserbi maipaay iti trabaho nga imbilin ni Jehova nga aramiden.” Isu a kastoy ti imbilin ni Moises: “Lallaki ken babbai, dikay mangpatauden iti aniaman a banag a maipaay iti nasantuan a kontribusion.” Ania ngay ti resultana? “Ti banag umanay idi maipaay iti isuamin a trabaho nga aramiden, ket aglaplapusanan.”​—Exodo 36:4-7.

Gapu iti kinamanagparabur dagiti Israelita, nairingpas ti tabernakulo iti las-ud ti makatawen. (Exodo 19:1; 40:1, 2) Babaen ti panangsuportar ti ili ti Dios iti pudno a panagdayaw, naidaydayawda ni Jehova. (Proverbio 3:9) Idi agangay, dakdakkelen ti ibangonda. Isu a naawis manen ti amin a makabael, adda man ammoda iti panagbangon wenno awan.

Dandani lima a siglo kalpasan ti pannakaibangon ti tabernakulo, rinugian ti Israel nga ibangon ti templo sadi Jerusalem. (1 Ar-ari 6:1) Nangayed ken permanente a pasdek dayta a nakausaran ti batbato ken kayo. (1 Ar-ari 5:17, 18) “Babaen ti paltiing,” ni Jehova intedna ken David ti disenio ti templo. (1 Cronicas 28:11-19) Ngem ni Solomon nga anak ni David ti pinilina a mangidaulo iti dayta a trabaho a panagbangon. (1 Cronicas 22:6-10) Naimpusuan a sinuportaran ni David dayta a proyekto. Nagurnong kadagiti bato, tangbaw, ken dadduma pay a materiales ken impaayna ti nagadu a sanikuana a balitok ken pirak. Pinaregtana met dagiti padana nga Israelita nga agbalinda a managparabur, nga inyimtuodna kadakuada: “Siasino ti agboluntario tapno punnuenna ti imana ita nga aldaw iti sagut a maipaay ken Jehova?” Ania ngay ti reaksion dagiti umili?​—1 Cronicas 29:1-5.

Idi rugianen ni Solomon nga ibangon ti templo, addan rinibu a tinontonelada a balitok ken pirak. Nagadu ti gambang ken landok isu nga awan idin ti mabalin a pangtimbang kadagidi a metal. (1 Cronicas 22:14-16) Babaen ti panangiwanwan ni Jehova ken panangsuportar ti intero nga Israel, nairingpas ti proyekto iti pito ket kagudua laeng a tawen.​—1 Ar-ari 6:1, 37, 38.

“Ti Balay ti Pudno a Dios”

Ti tabernakulo ken ti templo ket agpadpada a napanaganan iti “balay ti pudno a Dios.” (Uk-ukom 18:31; 2 Cronicas 24:7) Saan a pulos a kasapulan ni Jehova ti agnaed iti maysa a balay. (Isaias 66:1) Impaibangonna dagidiay a pasdek tapno makatulong kadagiti tattao. Kinapudnona, idi inagurasion ti templo, kastoy ti inyimtuod ni Solomon: “Pudpudno kadi nga agnaedto ti Dios iti rabaw ti daga? Adtoy! Ti langlangit, wen, ti langit ti langlangit, saandaka a malaon; anian nga ad-adda pay, ngarud, daytoy balay nga imbangonko!”​—1 Ar-ari 8:27.

Kastoy ti imbaga ni Jehova babaen ken mammadtona nga Isaias: “Ti bukodko a balay maawaganto a mismo iti balay a pagkararagan maipaay kadagiti amin nga ili.” (Isaias 56:7) Babaen kadagiti daton ken kararag a nayebkas iti templo, agraman dagiti seremonia a naangay sadiay, dagiti nadiosan a tattao​—dagiti Judio ken saan a Judio​—mabalinda ti umadani iti pudno a Dios. Nagun-odanda ti pannakigayyem ken pannalaknib ni Jehova babaen ti panagdayawda iti balayna. Ti kararag nga indauluan ni Solomon idi naidedikar ti templo ti mangipaganetget iti dayta a kinapudno. Mabasam ti makatukay a kararagna iti Dios iti 1 Ar-ari 8:22-53 ken 2 Cronicas 6:12-42.

Nabayagen a nadadael dayta a nagkauna a balay ti pudno a Dios. Nupay kasta, ti Sao ti Dios ipatuldona ti tiempo inton maummong dagiti tattao iti amin a nasion tapno agdayawda ken Jehova iti naespirituan a templo nga adayo a natantan-ok. (Isaias 2:2) Ti perpekto a daton ti bugbugtong nga Anak ti Dios, nga insimbolo dagiti daton nga animal a naidatag idiay templo, ti pamay-an tapno makaadanitayo ken Jehova. (Juan 14:6; Hebreo 7:27; 9:12) Dagiti Saksi ni Jehova agdaydayawda ita babaen dayta a natantan-ok a wagas, ket adu pay ti tultulonganda a mangaramid met iti kasta.

Dagiti Proyekto a Panagibangon iti Kaaldawantayo

Iti intero a lubong, dagiti Saksi ni Jehova agserserbida iti pudno a Dios. Buklenda ti “mannakabalin a nasion,” nga agtultuloy a dumakdakkel ti populasionna. (Isaias 60:22) Ti Kingdom Halla ti kangrunaan a paggigimongan dagiti Saksi ni Jehova. Rinibu kadagitoy a pasdek ti maus-usar, ken rinibu pay ti masapul a maibangon.

Dagiti Saksi ni Jehova ‘situtulok nga idatdatonda ti bagbagida’ iti pannakaibangon dagiti kasapulan a Kingdom Hall. (Salmo 110:3) Nupay kasta, dagiti Saksi ni Jehova iti maysa a lugar kaaduanna a saan nga umdas ti kinasigoda iti trabaho a panagibangon, ken nakaro ti kinapanglaw iti dadduma a rehion a nakarangrang-ay ti pudno a panagdayaw. Idi 1999, ti Bagi a Manarawidwid dagiti Saksi ni Jehova rinugianna ti maysa a programa a panagibangon kadagiti Kingdom Hall tapno makatulong a mangrisut kadagita a parikut. Babaen dayta a programa, dagiti Saksi a nalaing iti panagibangon naibaonda iti adayo a luglugar tapno sanayenda dagiti kapammatianda a mangibangon kadagiti Kingdom Hall. Dagidiay nasanay iti dayta a trabaho ti nangitultuloy idi agangay iti trabaho a panagibangon iti dayta a rehion. Ania ngay ti resulta daytoy naisangsangayan a panagregget?

Idi Pebrero 2006, dagiti Saksi ni Jehova kadagiti napanglaw a pagilian nakaibangonda iti nasurok a 13,000 a baro a Kingdom Hall. Basaem ti nasao ti dadduma nga agus-usar kadagiti baro a Kingdom Hall.

“Iti maysa a kongregasion, 160 ti promedio idi a makigimgimong. Iti kaunaan a gimong kalpasan a naibangon ti baro a Kingdom Hall, 200 ti makigimgimongen. Ita, innem a bulan kalpasanna, 230 dagiti tumabtabunon. Nabatad a bembendisionan ni Jehova ti pannakaibangon dagitoy simple ngem makatulong unay a pasdek.”​—Maysa a manangaywan iti sirkito idiay Ecuador.

“Adun a tawen a kastoy ti iyim-imtuod kadakami dagiti tattao, ‘Kaano a maaddaankayo iti Kingdom Hall a kas kadagiti nailadawan kadagiti publikasionyo?’ Gapu ken Jehova, adda met laengen presentable a lugar a pagdayawanmi. Iti tiendaan laeng idi ti maysa a kabsat ti paggigimonganmi. Tallopulo laeng idi ti promedio a makigimgimong. Iti damo a gimongmi a naangay iti baro a Kingdom Hall, 110 ti timmabuno.”​—Maysa a kongregasion idiay Uganda.

“Impadamag ti dua a regular pioneer a kakabsat a babbai a naragragsaken ti panangasabada sipud idi naibangon ti Kingdom Hall-da. Mas interesadon dagiti tattao a dumngeg iti panangasabada iti binalaybalay ken iti di pormal a pamay-an. Mangikonkondukta ita dagitoy a kakabsat iti 17 a panangyadal iti Biblia, ket makigimgimongen ti adu kadagitoy.”​—Sanga nga opisina ti Solomon Islands.

“Imbaga ti maysa a pastor nga agnanaed iti asideg a gapu iti baro a Kingdom Hall, ad-addan a mararaem ti intero a sangakaarrubaan ken ipagpannakkel dayta dagiti umili. Kuna ti adu a lumabas a nagpintas dayta a pasdek. Gapu iti dayta, dagiti kakabsat ket addaanen kadagiti nagsayaat a gundaway a mangasaba. Umad-adun ti mayat a mangammo maipapan iti sangalubongan a panagkakabsattayo. Adu kadagiti saan a makigimgimong iti adun a tawen ti natignay a regular manen a makitimpuyog.”​—Sanga nga opisina ti Myanmar.

“Adda interesado a lalaki nga inawis ti maysa a kabsattayo a babai iti pakaibangbangonan ti baro a Kingdom Hall iti lugarna. Idi agangay, kastoy ti kinuna dayta a lalaki: ‘Impagarupko no didak pastreken dagiti trabahador. Nasdaawak ta sibabara a kinablaawandak. Nakagaggaget dagiti lallaki ken babbai, ken awan ti saysayangenda nga oras. Agkaykaysa ken naragsakda.’ Immannugot daytoy a lalaki a mayadalan iti Biblia ken nangrugin a makigimong. Idi agangay, kinunana: ‘Nagbalbaliwen ti panunotko. Ita ta nasarakakon ti Dios, diakton umadayo kenkuana.’”​—Sanga nga opisina ti Colombia.

Napateg ti Panangsuportatayo

Ti panangibangon kadagiti Kingdom Hall ket maysa a napateg a paset ti sagrado a serbisiotayo. Talaga a makomendaran dagiti Saksi ni Jehova iti intero a lubong gapu iti panangsuportada iti dayta a trabaho, iti pinansial ken iti dadduma pay a wagas. Ngem laglagipentayo koma a napateg met ti dadduma pay a paset ti sagrado a serbisiotayo. No dadduma, dagiti Kristiano ket biktima dagiti natural a didigra isu a kasapulanda ti tulongtayo. Ti pannakaipablaak dagiti literatura a naibasar iti Biblia ket dakkel ti maitulongna iti sagrado a serbisiotayo. Kaaduan kadatayo ti makapaneknek iti naaramidan ti maysa a magasin wenno libro a naibasar iti Biblia a naipaima iti tao nga umiso ti pagannayasanna. Kanayonanna, nakapatpateg ti panangsuportatayo kadagiti misionero ken dadduma pay nga adda iti espesial nga amin-tiempo a panagserbi. Dagita a managsakripisio a Kristiano ket napateg ti maar-aramidanda iti irarang-ay ti trabaho a panangasaba kadagitoy maudi nga aldaw.

Napalalo ti ragsak dagidiay timmulong iti pannakaibangon ti templo idi un-unana. (1 Cronicas 29:9) Uray ita, naragsaktayo no suportarantayo ti pudno a panagdayaw babaen kadagiti kontribusiontayo. (Aramid 20:35) Mariknatayo dayta a kinaragsak no itinnagtayo dagiti kontribusiontayo iti naituding a kahon agpaay iti Kingdom Hall Fund ken no agkontribusiontayo agpaay iti sangalubongan a trabaho. Iti kasta, masuportarantayo ti dadduma pay a proyekto a nainaig iti panangasaba iti naimbag a damag ti Pagarian. Nagsayaat ti panagkaykaysa ita dagiti Saksi ni Jehova iti pudno a panagdayaw. Sapay koma ta masagraptay amin ti kinaragsak nga itden ti panangsuportatayo iti dayta a panagdayaw!

[Footnote]

[Kahon/Ladawan iti panid 20, 21]

DAGITI PAMAY-AN TI DADDUMA A MANGTED

DAGITI KONTRIBUSION ITI SANGALUBONGAN A TRABAHO

Adu ti mangilasin, wenno mangilatang, iti kantidad nga itinnagda kadagiti kahon ti kontribusion a namarkaan iti “Contributions for the Worldwide Work​—Matthew 24:14.”

Dagiti kongregasion binulan nga ipatulodda dagitoy a kantidad kadagiti opisina dagiti Saksi ni Jehova nga agserserbi iti pagilianda. Mabalin met nga ipatulod a direkta dagiti boluntario a donasion a kuarta iti Watch Tower Bible and Tract Society of the Philippines, Inc., P.O. Box 2044, 1060 Manila, wenno iti sanga nga opisina dagiti Saksi ni Jehova nga agserserbi iti pagilianyo. Dagiti tseke a maipatulod iti nadakamat nga adres ket nasken a maipanagan iti “Watch Tower.” Mabalin met nga idonar dagiti alahas wenno dadduma pay a napapateg a banag. Masapul a mapakuyogan dagitoy a kontribusion iti ababa a surat a mangibagbaga a dayta ket direkta a sagut.

KONDISIONAL A DONASION

Ti kuarta ket mabalin a maitalek iti Watch Tower tapno mausar iti sangalubongan. Ngem maisubli dayta no kiddawen ti nangitalek. Para iti kanayonan nga impormasion, pangngaasiyo ta agsuratkayo iti Treasurer’s Office iti nadakamat a direksion.

NAIPLANO A PANAGIDONAR

Malaksid kadagiti direkta a sagut ken kondisional a donasion a kuarta, adda dagiti sabali pay a pamay-an ti panagidonar a makatulong iti sangalubongan a panagserbi nga agpaay iti Pagarian. Karaman ditoy ti:

Insurance: Mabalin a ti Watch Tower ti agserbi a benepisario ti life insurance policy wenno ti retirement/pension plan.

Deposito iti Banko: Dagiti deposito iti banko, sertipiko ti deposito, wenno indibidual a deposito iti panagretiro ket mabalin nga italek wenno maibayad iti Watch Tower Society inton matay ti nagidonar, a mayannurot kadagiti paglintegan ti lokal a banko.

Stock ken Bond: Mabalin nga idonar dagiti stock ken bond iti Watch Tower kas direkta a sagut.

Lote ken Pasdek: Mabalin nga idonar ti lote wenno pasdek kas direkta a sagut wenno, iti kaso ti maysa a balay, babaen ti panangireserba iti pagtaengan ti nagidonar, a makapagtultuloy nga agnaed sadiay bayat a sibibiag. Makiumankayo iti sanga nga opisina iti pagilianyo sakbay a legal nga iyallatiwyo dagiti papeles ti aniaman a lote, balay, wenno pasdek.

Gift Annuity: Iti daytoy nga urnos, ti nagidonar iyallatiwna ti kuarta wenno dagiti security iti maysa a natudingan a korporasion nga us-usaren dagiti Saksi ni Jehova. Ti nagidonar, wenno daydiay tinudinganna, ket makaawat met iti espesipiko a kantidad kada tawen bayat a sibibiag. Makissayan ti income tax a bayadan ti nagidonar iti tawen a mapatalgedan ti gift annuity.

Testamento ken Bambanag a Maitalek (Trusts): Mabalin nga ipatawid ti sanikua wenno kuarta iti Watch Tower babaen ti legal ti pannakapatalgedna a testamento, wenno ti Watch Tower ti agserbi a benepisario ti katulagan mainaig kadagiti bambanag a maitalek. Mabalin nga addada bentahana iti buis no narelihiosuan nga organisasion ti benepisario ti trust.

Kas ipasimudaag ti termino a “naiplano a panagidonar,” kalikaguman dagitoy a kita ti donasion ti panagplano daydiay agidonar. Tapno matulongan dagidiay agtarigagay a tumulong iti sangalubongan a trabaho dagiti Saksi ni Jehova babaen ti maysa a kita ti naiplano a panagidonar, naisagana ti Ingles ken Espaniol a broshur a napauluan iti Charitable Planning to Benefit Kingdom Service Worldwide. Naisurat daytoy a broshur tapno maipakaammo no ania ti nadumaduma a wagas a mabalin nga ited ita dagiti sagut wenno ipatawid inton pumusayda. Kalpasan a nabasada ti broshur ken nakiumanda kadagiti bukodda a mammagbaga mainaig iti linteg wenno buis, adu dagidiay nakatulong iti narelihiosuan ken pangsaranay a trabaho dagiti Saksi ni Jehova iti intero a lubong ken naaprobetsarda dagiti benepisio mainaig iti panagbuis gapu iti panangaramidda iti kasta. Magun-od daytoy a broshur manipud iti Charitable Planning Office.

Para iti kanayonan nga impormasion, makiumankayo iti Charitable Planning Office, babaen iti surat wenno telepono, iti adres a nailista iti baba, wenno makiumankayo iti opisina dagiti Saksi ni Jehova iti pagilianyo.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue, San Francisco del Monte

1105 Quezon City

Telepono: (02) 411-6090

[Ladawan iti panid 18]

Gapu iti nagkaykaysa a panagreggettayo, posible ti pannakaibangon dagiti napintas a Kingdom Hall iti intero a lubong

[Ladawan iti panid 18]

Baro a Kingdom Hall idiay Ghana