Pakasaritaan ti Biag
Ginundawayanmi ti Agbaliwbaliw a Kasasaadmi Tapno Mangasaba iti Adayo a Luglugar
KAS INSALAYSAY NI RICARDO MALICSI
Idi napukawko ti panggedak gapu iti neutral a takderko kas Kristiano, kiniddawko ken ti pamiliak a tulongannakami ni Jehova a mangiplano iti masakbayanmi. Iti kararag, inyebkasmi ti tarigagaymi a mangpalawa iti ministeriomi. Di nagbayag kalpasanna, nagakar-akarkami iti walo a pagilian kadagiti dua a kontinente. Kas resultana, naitungpalmi ti ministeriomi kadagiti adayo a luglugar.
NAIPASNGAYAK iti Pilipinas idi 1933 iti maysa a pamilia a naitimpuyog iti Philippine Independent Church. Miembro iti dayta a relihion ti amin a 14 a kameng ti pamiliami. Idi agtawenak iti agarup 12, inkararagko iti Dios nga iturongnak iti pudno a pammati. Maysa kadagiti maestrok ti nangyenrol kaniak iti maysa a klase mainaig iti relihion, ket nagbalinak a deboto a Katoliko. Diak pulos nagliway iti panagkompesar no Sabado ken iti Misa no Domingo. Ngem nangrugiak nga agduadua ken di mapnek. Binuribornak dagiti saludsod maipapan iti no ania ti mapasamak kadagiti tattao no matayda, no ania ti umap-apuy nga impierno, ken ti Trinidad. Awan kaipapananna ken di makapnek dagiti sungbat dagiti lider ti relihion.
Panangsapul Kadagiti Makapnek a Sungbat
Bayat ti panagadalko iti kolehio, timmiponak iti maysa a gunglo a nangituggod kaniak kadagiti panagraranget, sugal, panagsigarilio, ken dadduma pay a dakes nga aktibidad. Maysa a rabii, naam-ammok ti ina ti maysa kadagiti kaeskuelaak. Isu ket maysa kadagiti Saksi ni Jehova. Inyimtuodko kenkuana dagiti saludsod nga inyimtuodko kadagiti mannursurok iti relihion. Sinungbatanna ti amin a saludsodko babaen ti Biblia, ket nakombinsirak a pudno dagiti imbagana.
Gimmatangak iti Biblia ken rinugiak ti makipagadal kadagiti Saksi. Di nagbayag, tumabtabunoakon kadagiti amin a gimong dagiti Saksi ni Jehova. Kas panangsurot iti nainsiriban a patigmaan ti Biblia a “dagiti dakes a pannakitimpuyog dadaelenda dagiti makagunggona nga ugali,” insardengko ti makitimpuyog kadagiti imoral a gagayyemko. (1 Corinto 15:33) Daytoy ti timmulong kaniak a rumang-ay iti panagadalko iti Biblia agingga nga indedikarko ti biagko ken ni Jehova. Kalpasan ti panagpabautisarko idi 1951, nagserbiak kas amin-tiempo a ministro (payunir). Kalpasanna, idi Disiembre 1953, inkasarko ni Aurea Mendoza Cruz, a nagbalin a tungpal biag a katakunaynayko ken matalek a katrabahuak iti ministerio.
Sungbat Kadagiti Kararagmi
Talaga a tarigagaymi ti agserbi kas payunir. Ngem saan a natungpal a dagus ti tarigagaymi nga agserbi a naan-anay ken ni Jehova. Nupay kasta, saanmi nga insardeng ti nagkiddaw ken ni Jehova a maaddaankami iti dakdakkel a gundaway a makapagserbi kenkuana. Ngem narigat ti biagmi. Kaskasdi, sipapanunotkami kadagiti naespirituan a kalatmi, ket idi agtawenak iti 25, nadutokanak kas adipen ti kongregasion, ti mamangulo a manangaywan iti kongregasion dagiti Saksi ni Jehova.
Bayat a rimmang-ay ti pannakaammok iti Biblia ken naaddaanak iti nasaysayaat a pannakaawat kadagiti prinsipio ni Jehova, nabigbigko a ti panggedak ket maikontra iti naibatay iti konsiensia a takderko kas neutral a Kristiano. (Isaias 2:2-4) Inkeddengko ti agikkat iti trabahok. Ditoy a nasubok ti pammatimi. Kasano pay itan a maipaayko dagiti kasapulan ti pamiliak? Manen, immadanikami ken ni Jehova a Dios babaen ti kararag. (Salmo 65:2) Inyebkasmi kenkuana dagiti pakaseknan ken pakadanaganmi, ngem inyebkasmi met ti tarigagaymi nga agserbi iti sadinoman a dakdakkel ti pakasapulan kadagiti manangaskasaba iti Pagarian. (Filipos 4:6, 7) Dimi impagarup a nagduduma a gundaway ti agur-uray kadakami!
Idi Mangrugikami nga Agdaliasat
Idi Abril 1965, inawatko ti trabaho kas superbisor dagiti manangispal no adda aksidente iti Vientiane International Airport, idiay Laos, ket immakarkami sadiay. Iti siudad ti Vientiane, adda 24 a Saksi, ket tinagiragsakmi ti nangasaba a kadua dagiti misionero ken dagiti kakabsat iti dayta a lugar. Idi agangay, nayakarak idiay Udon Thani Airport, idiay Thailand. Awan ti sabali a Saksi idiay Udon Thani. Dakdakami a sangapamiliaan ti nangikondukta kadagiti amin a linawas a gimong. Nangasabakami iti binalaybalay, nagsarungkar, ken nangyadal iti Biblia.
Malagipmi ti indagadag ni Jesus kadagiti adalanna nga ‘itultuloyda koma ti mangpataud iti adu a bunga.’ (Juan 15:8) Isu nga inkeddengmi a suroten ti ulidanda ket intultuloymi nga inwaragawag ti naimbag a damag. Di nagbayag, nagsayaat ti resultana dayta. Maysa a balasang a Thai ti nangabrasa iti kinapudno ket nagbalin a kapammatiantayo. Dua a taga Amianan nga Amerika ti nangawat iti kinapudno ket nagangayanna nagbalinda a Kristiano a panglakayen. Intultuloymi nga inkasaba ti naimbag a damag iti nasurok a sangapulo a tawen idiay makin-amianan a Thailand. Anian a ragsakmi idi maammuanmi nga addan ti kongregasion idiay Udon Thani! Agingga ita, agbungbunga pay laeng ti dadduma kadagiti immulami a bin-i ti kinapudno.
Ngem makapaladingit ta kasapulan nga umakarkami manen, isu nga inkararagmi a tulongannakami ti “Apo ti panagani” tapno maitultuloymi ti trabaho a panangasaba. (Mateo 9:38) Nayakarkami idiay Tehran, ti kabesera ti Iran. Tiempo idi ti panagturay ti Shah.
Panangasaba Kadagiti Narigat a Teritoria
Idi simmangbaykami idiay Tehran, dagus a binirokmi dagiti kapammatian. Naitimpuyogkami iti bassit a grupo dagiti Saksi a buklen ti 13 a nasionalidad. Kasapulan a mangaramidkami kadagiti panagbalbaliw tapno maikasabami ti naimbag a damag idiay Iran. Nupay awan ti napasaranmi a direkta nga ibubusor, nasken nga agannadkami.
Gapu iti oras ti panagtrabaho dagiti interesado, nasken no dadduma nga iyadalanmi ida iti tengnga ti rabii wenno naladladaw pay—agingga iti parbangon. Kaskasdi, anian a ragsakmi a makakita kadagiti bunga ti panagreggetmi! Adu a pamilia a Filipino ken Koreano ti nangabrasa iti Nakristianuan a kinapudno ket indedikarda ti biagda ken ni Jehova.
Simmaganad, naibaonak nga agtrabaho idiay Dhaka, Bangladesh. Dimtengkami sadiay idi Disiembre 1977. Narigat met ti mangasaba iti daytoy a pagilian. Ngem sangkapanunotmi a masapul nga okupadokami a kanayon iti ministerio. Babaen ti panangiwanwan ti espiritu ni Jehova, nasarakanmi ti adu a pamilia nga agkunkuna a Kristiano. Dadduma kadakuada ti mawaw iti makapabang-ar a danum ti kinapudno nga aggubuay iti Nasantuan a Kasuratan. (Isaias 55:1) Kas resultana, nakairugikami iti adu a panangyadal iti Biblia.
Sipapanunotkami a pagayatan ti Dios a “maisalakan koma dagiti amin a kita ti tattao.” (1 Timoteo 2:4) Makaparagsak ta awan ti siasinoman a nanglapped kadakami. Tapno madaeranmi ti aniaman a panangidumduma, siniguradomi a nainggayyeman ti pannakisaritami. Kas ken ni apostol Pablo, inkagumaanmi ti ‘agbalin nga amin a bambanag iti amin a kita ti tattao.’ (1 Corinto 9:22) No mayimtuod no ania ti panggep ti kaaddami, siaayat nga ilawlawagmi, ket napaliiwmi a nainggayyeman ti kaaduan.
Idiay Dhaka, nakasarakkami iti maysa a lumugar a Saksi ket pinaregtami a tumabuno kadagiti Nakristianuan a gimong ken makiraman iti trabaho a panangasaba. Maysa met a pamilia ti inyadalan ni baketko iti Biblia ken inawisna ida a makigimong. Babaen ti naayat a kinamanangngaasi ni Jehova, inabrasa ti intero a pamilia ti kinapudno. Idi agangay, timmulong ti dua kadagiti annakda a babbai tapno maipatarus iti pagsasao a Bengali dagiti naibatay iti Biblia a literatura, ket adu kadagiti kabagianda ti nakaam-ammo met ken ni Jehova. Adu pay a nayadalanmi iti Biblia ti nangawat iti kinapudno. Kaadduan kadakuada ti agserserbi ita kas panglakayen ken payunir.
Yantangay adu ti tao iti siudad ti Dhaka, inawismi ti dadduma kadagiti kapamiliami a tumulong iti trabaho a panangasaba. Addada immannugot ket kinaduaandakami idiay Bangladesh. Anian a rag-o ken panagyamanmi ken ni Jehova gapu iti naipaay kadakami a gundaway a makipaset iti pannakaikasaba ti naimbag a damag iti dayta a pagilian! Manipud iti maysa laeng a tao idi damo, adda itan ti dua a kongregasion idiay Bangladesh.
Idi Hulio 1982, kasapulan nga umakarkami manipud Bangladesh. Agluluakami a nangpanaw kadagiti kakabsat. Di nagbayag kalpasanna, nakaawatak iti trabaho iti Entebbe International Airport, idiay Uganda, a nagnaedanmi iti uppat a tawen ken pito a bulan. Kasano a maidaydayawmi ti naindaklan a nagan ni Jehova iti daytoy a pagilian?
Panagserbi ken ni Jehova Idiay Makindaya nga Africa
Iti isasangbaymi iti Entebbe International Airport, maysa a drayber ti nangsabet kadakami ken ni baketko tapno itulodnakami iti dagusmi. Bayat ti ipapanawmi iti eropuerto, kinasabaak ti drayber maipapan iti Pagarian ti Dios. Inyimtuodna: “Maysakayo kadi kadagiti Saksi ni Jehova?” Idi imbagak a Saksikami, kinuna ti drayber: “Maysa kadagiti kabsatyo ti agtartrabaho iti control tower.” Dagus a kiniddawko nga ipannakami sadiay. Naam-ammomi ti kabsat, a naragsakan unay a makakita kadakami, ket nayurnos ti pannakigimong ken panangasabami iti tay-ak.
Adda laeng 228 nga agibumbunannag iti Pagarian idiay Uganda iti dayta a tiempo. Kaduami ti dua a kabsat a lallaki idiay Entebbe a nangbusbos iti umuna a tawenmi a nangimula kadagiti bin-i ti kinapudno. Gapu ta managbasa dagiti tattao sadiay, adu a literatura ti naipaimami, agraman ti ginasgasut a magasin. Inawismi dagiti kakabsat manipud Kampala, ti kabesera, tapno tumulong kadakami iti panangasaba iti teritoria ti Entebbe bayat ti ngudo ti lawas. Iti damo a palawagko iti publiko, lima ti timmabuno—a pakaibilangak.
Kadagiti simmaganad a tallo a tawen, nariknami ti dadduma kadagiti karagsakan a kanito iti biagmi idi makitami dagidiay inyadalanmi a nagtignay ken napartak a rimmang-ay. (3 Juan 4) Iti maysa nga asamblea sirkito, innem ti nabautisaran kadagiti iyad-adalanmi iti Biblia. Adu kadakuada ti nangibaga a naparegtada a mangragpat iti amin-tiempo a serbisio agsipud ta nakitada nga agserserbikami kas payunir, uray no adda amin-tiempo a sekular a trabahomi.
Nakitami a posible nga agbalin a nabunga a teritoria ti pagtrabahuanmi. Naminsan, inasitgak ti maysa nga opisial dagiti bombero iti eropuerto ket inranudko kenkuana ti naibatay iti Biblia a namnama a biag iti maysa a paraiso a daga. Impakitak iti mismo a Bibliana nga agbiagto ti natulnog a sangatauan buyogen ti talna ken panagkaykaysa, a saanton nga agsagaba iti kinapanglaw, kinaawan ti pagnaedan, gubat, sakit, wenno ipapatay. (Salmo 46:9; Isaias 33:24; 65:21, 22; Apocalipsis 21:3, 4) Natukay ti interesna idi mabasana dayta iti mismo a Bibliana. Dagus a nairugi ti panagadal iti Biblia. Tinabunuanna ti amin a gimong. Di nagbayag, indedikarna ti biagna ken ni Jehova ket nabautisaran. Idi agangay, nakipaset met iti amin-tiempo a ministerio.
Namindua a napasamak ti riribuk iti kagimongan idiay Uganda bayat ti kaaddami sadiay, ngem saan a nakalapped dayta kadagiti naespirituan nga aktibidadmi. Ti pamilia dagiti trabahador kadagiti internasional nga ahensia ket nayakar idiay Nairobi, Kenya, iti uneg ti innem a bulan. Dakami a nabati idiay Uganda intultuloymi dagiti Nakristianuan a panaggigimongmi ken ti trabaho a panangasaba, nupay masapul nga agannadkami.
Idi Abril 1988, nagpatingga ti kontratak ket immakarkami manen. Pinanawanmi ti Kongregasion ti Entebbe buyogen ti kasta unay a pannakapnek gapu iti naespirituan a panagrang-ay sadiay. Idi Hulio 1997, naaddaankami iti gundaway a bumisita iti Entebbe, ket naammuanmi nga agserserbin kas panglakayen ti dadduma kadagiti inyadalanmi idi iti Biblia. Anian ti ragsakmi idi makitami ti 106 a timmabuno iti Miting Publiko!
Iyaakar iti Di Pay Nakasabaan a Teritoria
Mabalinmi ngata ti maaddaan iti baro a gundaway? Wen, ti simmaganad a kontratak ket iti Mogadishu International Airport, idiay Somalia. Determinadokami a mangusar a naimbag iti daytoy a baro a gundaway tapno agserbi iti di pay nakaskasabaan a teritoria.
Kaaduan a kinaskasabaanmi ket dagiti empleado iti embahada, mangmangged a Filipino, ken dadduma pay a ganggannaet. Masansan a makitami ida iti tiendaan. Nainggayyeman met a bimmisitakami kadagiti pagtaenganda. Babaen ti kinataktika, panangipamuspusan, kinaannad, ken naan-anay a panagpannuray ken Jehova, nabaelanmi nga inranud dagiti kinapudno iti Biblia, ket nasayaat ti resultana kadagiti nagduduma a nasionalidad. Kalpasan ti dua a tawen, pimmanawkami iti Mogadishu—sakbay unay a bimtak ti gubat sadiay.
Kalpasanna, imbaonnak ti International Civil Aviation Organization nga agtrabaho idiay Yangon, Myanmar. Manen, naaddaankami kadagiti nasayaat a gundaway a tumulong kadagiti naimbag ti panagpuspusona a tattao a mangammo kadagiti panggep ti Dios. Kalpasan ti Myanmar, naibaonkami idiay Dar es Salaam, Tanzania. Nalaklaka nga ikasaba ti naimbag a damag iti binalaybalay idiay Dar es Salaam agsipud ta adda Ingles ti pagsasaona a komunidad sadiay.
Iti amin a pagilian a nagtrabahuanmi, manmano dagiti parikut iti panangitungpalmi iti ministeriomi nupay, iti adu a gundaway, adda ti panangiparit iti trabaho dagiti Saksi ni Jehova. Gapu iti kita ti trabahok, a masansan a konektado iti gobierno wenno kadagiti internasional nga ahensia, awan ti nangkuestion kadagiti aktibidadmi.
Gapu iti sekular a trabahok, nagakar-akarkami ken ni baketko iti unos ti tallo a dekada. Nupay kasta, minatmatanmi ti panggedak kas pamay-an laeng tapno maitungpalmi ti kalatmi. Ti kangrunaan a kalatmi ket tapno itandudo ti interes ti Pagarian ti Dios. Agyamankami ken ni Jehova ta tinulongannakami a mangusar a naimbag kadagiti agbaliwbaliw a kasasaadmi ken mangtagiragsak iti naisangsangayan a pribilehio a mangisaknap iti naimbag a damag kadagiti adayo a lugar.
Panagsubli iti Lugar a Nangrugian
Idi agtawenak iti 58, inkeddengko ti agretiro a nasapa ken agsubli iti Pilipinas. Idi nakasublikami, inkararagmi nga iwanwannakami ni Jehova. Inrugimi ti agserbi iti maysa a kongregasion idiay Siudad ti Trece Martires iti probinsia ti Cavite. Idi damo, adda laeng 19 a manangiwaragawag iti Pagarian ti Dios. Naorganisar ti inaldaw a panangasaba, ken nairugi ti adu a panagadal iti Biblia. Nangrugi a dumakkel ti kongregasion. Adda tiempo a 19 ti kaadu ti iyad-adalan ni baketko, ken 14 met ti iyad-adalak.
Di nagbayag, saanen nga umanay a paggimongan ti Kingdom Hall. Inkararagmi dayta ken ni Jehova. Maysa nga agassawa a kakabsat iti naespirituan ti nangikeddeng a mangidonar iti loteda, ket nangipabulod ti sanga nga opisina iti kantidad para iti pannakaibangon ti baro a Kingdom Hall. Nagsayaat ti epekto ti baro a pasdek iti trabaho a panangasaba, ket linawas nga immadu ti tumabuno. Iti agdama, agdaliasatkami iti nasurok a maysa nga oras iti panagturongmi a mapan tumulong iti sabali pay a kongregasion a buklen ti 17 nga agibumbunannag.
Tagipatgenmi ken ni baketko ti pribilehiomi a nakapagserbi iti adu a pagilian. No lagipek ti panagakar-akarmi, mariknami ti kasta unay a pannakapnek ta ammomi nga inusarmi dayta iti kasayaatan a posible a pamay-an—tapno tulongan dagiti sabsabali a mangammo iti maipapan ken ni Jehova!
[Mapa iti panid 24, 25]
(Para iti aktual a pannakaurnosna, kitaem ti publikasion)
TANZANIA
UGANDA
SOMALIA
IRAN
BANGLADESH
MYANMAR
LAOS
THAILAND
PHILIPPINES
[Ladawan iti panid 23]
Dakami ken ni Aurea a baketko