“Ti Tulongko Aggapu ken Jehova”

Naragsak ti Biag Dagiti Agtutubo a Mangidaydayaw ken ni Jehova

“KAYATKO a matagiragsak ti kasayaatan a maipaay ti biag!” Kasta ti kinuna ti maysa nga agtutubo mainaig kadagiti inanamaenna. Ngem kasano a ti agtutubo matagiragsakna ti kasayaatan a maipaay ti biag? Nalawag ti sungbat ti Biblia: “Laglagipem ti Namarsua kenka bayat ti kinaagtutubom!”​—Eclesiastes 12:1, Contemporary English Version.

Ti panagdayaw ken panagserbi ken ni Jehova ket saan laeng nga agpaay kadagiti adulto. Ni Samuel, nga anak da Elcana ken Anna, ket nakaub-ubing idi nagserbi ken ni Jehova iti tabernakulo. (1 Samuel 1:19, 20, 24; 2:11) Maysa a Hebreo a balasitang ti nangipakita iti naan-anay a panagtalek ken ni Jehova idi insingasingna iti Siriano a panguluen ti armada a ni Naaman a mapan ken ni propeta Eliseo tapno mapaimbag ti sakitna a kukutel. (2 Ar-ari 5:2, 3) Iti Salmo 148:7, 12, dagiti agtutubo a lallaki ken babbai agpada a naibilin kadakuada nga idaydayawda ni Jehova.a Idi agtawen laeng iti 12, kasta unay ti tarigagay ni Jesus nga agserbi ken ni Amana. (Lucas 2:41-49) Gapu ta nasursuruanda iti Kasuratan, impukkaw dagiti ubbing a lallaki a nakakita ken Jesus iti templo: “Mangisalakanka, ikararagmi, iti Anak ni David!”​—Mateo 21:15, 16.

Panangidayaw ken ni Jehova Ita

Adu ita nga agtutubo a Saksi ni Jehova ti di mangibain kadagiti patpatienda ken situtured nga ilawlawagda dagita kadagiti eskuelaan ken iti sadinoman. Usigenyo ti dua a pagarigan.

Idiay Britania, iti klase ti agtawen iti 18 a ni Stephanie, napagsasaritaan ti maipapan iti aborsion ken dadduma pay a moral nga isyu. Kinuna ti maestroda a kaaduan ita ti mangakseptar iti aborsion ken awan ti rason dagiti agtutubo a babbai a mangliklik iti daytoy nga aramid. Idi immanamong ti amin nga estudiante iti dayta a panangmatmat, kayat ni Stephanie nga idepensa ti naibatay iti Biblia a takderna. Naikkan iti gundaway ni Stephanie idi sinaludsod ti maestroda no ania ti takderna. Nupay agnerbios idi damo, ginundawayanna dayta a mangilawlawag iti Nainkasuratan a panangmatmatna. Inusarna ti Exodo 21:22-24 ket inlawlawagna a no dakes ti mangdangran iti sikog, nalawag ngarud a maikontra ti aborsion iti pagayatan ti Dios.

Ti maestro, a maysa a klero, saanna pay pulos a nabasa dagita a bersikulo. Ti natured a panangsaksi ni Stephanie ti nanglukat iti adu a makapainteres a panagsasarita kadagiti kaeskuelaanna mainaig iti nadumaduma a topiko. Maysa kadagiti kaeskuelaanna ti regular ita nga umaw-awat kadagiti kabaruan a kopia Ti Pagwanawanan ken Agriingkayo!, ken dua ti timmabuno iti kombension distrito dagiti Saksi ni Jehova tapno makitada ti panagpabautisar ni Stephanie kas simbolo ti dedikasionna iti Dios.

Ti agtawen iti innem a ni Vareta, nga agnanaed idiay Suriname, South America, ginundawayanna nga idaydayaw ti Dios idi agkasapulan ti mannursurona iti liwliwa manipud iti Kasuratan. Idi nagsubli ti mannursuro kalpasan ti tallo nga aldaw a kaawanna, inyimtuodna kadagiti estudiantena no ammoda ti makagapu no apay a nagbakasion. Insungbatda, “Nagsakitkayo, saan aya?” “Saan,” insungbat ti mannursuro. “Natay ni manangko, ket maladingitanak unay. Isu nga agulimekkayo ta nasakit ti ulok.”

Kamalmanna, bayat a nakaridep ni nanangna, nagsukain ni Vareta kadagiti daan a magasin, a binasbasana dagiti paulo. Nakitana Ti Pagwanawanan a Hulio 15, 2001, a napauluan “Adda Kadi Biag Kalpasan ti Ipapatay?” Gapu iti ragsakna, riniingna ni nanangna ket kinunana, “Nanang, Nanang, kitaem! Nakasarakak iti magasin para iti natayan a mannursuromi!” Naipatulod iti mannursuro ti magasin a napakuyogan iti surat manipud ken Vareta. Insuratna: “Nangnangruna nga agpaay daytoy kadakayo. Iti Paraiso, makitayonto manen ni manangyo agsipud ta di pulos agulbod ni Jehova. Inkarina nga addanto paraiso, saan nga idiay langit, no di ket ditoy daga.” Inyebkas ti mannursuro ti nauneg nga apresasionna iti naibatay iti Biblia a liwliwa a linaon dagitoy nga artikulo.

Panagsagana Agpaay iti Masanguanan

Ni Jehova “ti naragsak a Dios,” ket tarigagayanna nga agbalin a naragsak dagiti agtutubo. (1 Timoteo 1:11) Kuna ti Saona: “Pagragsakam ti kinaagtutubom. Agragsakka bayat nga agtutuboka pay laeng.” (Eclesiastes 11:9, Today’s English Version) Makita ni Jehova uray ti masanguanan ken ammona ti mabayag nga epekto agpadpada ti naimbag ken dakes nga aramid. Dayta ti makagapu nga ibalakad ti Saona: “Lagipem, itan, ti Naindaklan a Namarsuam kadagiti aldaw ti kinaagtutubom, sakbay nga umay dagiti makadidigra nga aldaw, wenno dimtengen dagiti tawen inton kunaem: ‘Awan pakaragsakak kadakuada.’”​—Eclesiastes 12:1.

Wen, tarigagayan ni Jehova a naan-anay a tagiragsaken dagiti agtutubo ti nagpateg a sagut a biag. Babaen ti pananglaglagip ken panangidaydayawda iti Dios, maaddaan dagiti agtutubo iti makapnek, makagunggona a biag. Uray no maipasango kadagiti pakarigatan, sikokompiansa a maibagada: “Ti tulongko aggapu ken Jehova.”​—Salmo 121:2.

[Footnote]

[Blurb iti panid 9]

“Idaydayawyo ni Jehova manipud iti daga, . . . dakayo nga agtutubo a lallaki ken kasta met dakayo a birhen.”​—SALMO 148:7, 12

[Kahon iti panid 8]

SARANAYEN NI JEHOVA DAGITI AGTUTUBO

“Sika ti namnamak, O Soberano nga Apo Jehova, ti pagkammatalkak manipud kinaagtutubok.”​—Salmo 71:5.

“Ti intero a panagbiagmo pempenneken [ti Dios] iti naimbag; ti met laeng kinaagtutubom agtultuloy nga agpabaro a kas iti panagpabaro ti maysa nga agila.”​—Salmo 103:5.