Balasitang nga Addaan Naragsak a Namnama
ADDA surat a naawat dagiti agipabpablaak iti Agriingkayo! manipud iti 12 anyos a balasitang nga agnagan Stephanie. “Kayatko nga ibaga kadakayo no kasano a dagiti publikasionyo ket nakatulong unay kaniak idiay eskuelaan,” insuratna. “Nabiit pay a natudingankami iti proyekto a natemaan iti ‘Nadumaduma a Kultura.’ Nagbirokkami a sangapamiliaan iti nadumaduma a publikasion, ket kinartibmi dagiti teksto ken ladawan a maibagay iti tema. Kalpasanna, impigketko dagita iti poster.” Imbilin ti maestra ni Stephanie iti klasena nga agpilida iti pagarupenda a lima a kapipintasan a proyekto. “Kabigatanna,” insurat ni Stephanie, “naammuak a ti poster-ko ti maysa kadagiti lima a kapipintasan.”
Ti Oktubre 22, 1998, nga Agriingkayo! a napauluan ti akkubna iti “Addanto Ngata Tiempo nga Agiinnayat Amin a Tattao?” ti maysa kadagiti publikasion a pinili ni Stephanie para iti proyektona. Kas maysa kadagiti Saksi ni Jehova, sititibker a patien ni Stephanie a makapagbiag a sitatalna dagiti tattao a nadumaduma ti kulturada. Kinapudnona, isut’ paset iti maysa a sangalubongan a panagkakabsat a dagiti dati nga agbibinnusor—a pakairamanan dagiti Tutsi ken Hutu, Aleman ken Ruso, Armeniano ken Turko, Hapones ken Americano—ket pinagkaykaysa ti kinapudno nga isursuro ti Biblia. Sangsangkamaysa nga ikagkagumaanda a tuladen ti Namarsua kadakuada. Kasano? Adda sungbat ti maysa kadagiti teksto iti Biblia nga inusar ni Stephanie iti proyektona: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) Ikagkagumaan dagiti Saksi ni Jehova nga ipakita ti kasta a di panangidumduma iti pannakilangenda iti sabsabali.
Segseggaan ni Stephanie ti kaitungpalan ti kari ti Biblia nga asidegen nga iyeg ti Pagarian ti Dios dagiti nalinteg a kasasaad ditoy dagatayo. (Apocalipsis 21:3, 4) Iti lubong nga adu nga agtutubo ti mabuteng ken agpangpangadua maipapan iti masakbayanda, isut’ naisalsalumina a balasitang nga addaan naragsak a namnama.