Salsaludsod Dagiti Agbasbasa
Ti kadi inaramid ni David ken dagiti tattaona a pannangan iti tinapay ti panangidiaya, wenno tinapay ti pamarang, ipasimudaagna a saan a madusa dagidiay mangsalungasing iti linteg ti Dios no addada kadagiti narigat a kasasaad?—1 Samuel 21:1-6.
Sigun iti Levitico 24:5-9, dagiti tinapay ti panangidiaya a masuksuktan iti tunggal Sabbath ket nailatang a kanen dagiti papadi. Nasantuan ngamin dagiti tinapay ken agserbida a pagtaraon dagiti lallaki nga agserserbi kas papadi ti Dios. Saan ngarud a maiparbeng a maited dayta kadagiti gagangay a trabahador wenno kanen tapno laeng pagraragsakan. Nupay kasta, saan a nakabasol ni Ahimelec idi inranudna kada David ti tinapay ti pamarang.
Agparang nga adda naisangsangayan a bilin ni Ari Saul a nasken nga itungpal ni David. Mabisin idi ni David ken ti buyotna. Gapu ta nasukimat ni Ahimelec a nadalusda, pinalubosanna a manganda kadagiti tinapay ti panangidiaya. Nupay makuna a saan a maitunos dayta iti linteg, maitunos met dayta iti pakausaran ti tinapay ti pamarang. Dayta ti makagapu nga impalubos ni Ahimelec a manganda iti tinapay. Ni Jesu-Kristo a mismo inusarna dayta a pasamak tapno ilawlawagna a saan nga umiso ti nalabes ti kinaingetna a panangannurot iti linteg ti Sabbath a kalkalikaguman dagiti Fariseo.—Mateo 12:1-8.
Nupay kasta, dagita a nadakamat dina kaipapanan a mabalin a salungasingen ti linteg ti Dios no narigat dagiti kasasaad. Kas pagarigan, timmaud ti maysa a narigat a situasion bayat ti pannakibakal dagiti Israelita kadagiti Filisteo. Kinuna ni Ari Saul: “Mailunod ti tao a mangan iti tinapay sakbay ti rabii ken agingga a nakaibalesakon kadagiti kabusorko!” Kuna ti Biblia: “Iti dayta nga aldaw intultuloyda a kinabil dagiti Filisteo.” Nabannog ken mabisin dagiti soldado gapu iti pannakibakal, isu a ‘dagiti tattao pinartida dagiti animal iti daga ket nagkakaanda agraman iti dara.’ (1 Samuel 14:24, 31-33) Nakabasolda ken ni Jehova gapu ta sinalungasingda ti linteg mainaig iti dara. Ti inaramidda ket saan a maitunos iti kakaisuna a pinanggep ti Dios a pakausaran ti dara, kas ‘pangabbong’ kadagiti basol. (Levitico 17:10-12; Genesis 9:3, 4) Ngem gapu iti asina, inawat ni Jehova dagiti naisangsangayan a daton agpaay kadagidiay nagbasol.—1 Samuel 14:34, 35.
Wen, namnamaen ni Jehova nga agtulnogtayo kadagiti lintegna iti aniaman a kasasaad. “Daytoy ti kaipapanan ti ayat iti Dios,” kuna ni apostol Juan, “a tungpalentayo dagiti bilinna.”—1 Juan 5:3.
[Ladawan iti panid 30]
Kada Sabbath, naipan iti uneg ti tabernakulo dagiti baro a tinapay ti panangidiaya