Madaerantayo ti Aniaman a Pakasuotan!
ADDA kadi agdama a pakasuotam? Maup-upayka kadin ken dimon madaeran? Mariknam kadi no dadduma a naisalsalumina ti parikutmo ket awan ti solusionna dayta? No kasta, bumilegka! Aniaman dagiti sangsanguentayo a pakasuotan, ipanamnama kadatayo ti Biblia a mapagballigiantayo dagita babaen ti tulong ti Dios.
Ibaga ti Biblia a dagiti adipen ti Dios ‘maipasangoda iti nadumaduma a pakasuotan.’ (Santiago 1:2) Imutektekanyo ti sao a “nadumaduma” (poi·kiʹlos iti Griego). Sigun iti nagkauna a pannakausarna, ti orihinal a sao kaipapananna “adu nga agsasabali” wenno “adu a maris” a mangipaganetget iti “kinanadumaduma dagiti pakasuotan.” Gapuna, ‘dagiti nadumaduma a pakasuotan’ ket pakasuotan a nadumaduma ti marisda, no ar-arigen. Nupay kasta, tulongannatayo ni Jehova tapno madaerantayo ti tunggal maysa kadagita. Apay a masiguradotayo dayta?
“Di Kaikarian a Kinamanangngaasi ti Dios a Nayebkas iti Nadumaduma a Pamay-an”
Kinuna ni apostol Pablo nga ‘agledleddaang dagiti Kristiano gapu iti nadumaduma a pakasuotan.’ (1 Pedro 1:6) Iti naud-udi a paset ti naipaltiing a suratna, kunana a ti “di kaikarian a kinamanangngaasi ti Dios” ket “nayebkas iti nadumaduma a pamay-an.” (1 Pedro 4:10) Ti sasao nga “iti nadumaduma a pamay-an” ket addaan iti anag a pumada iti orihinal a Griego a sao. Iti panangkomentona iti daytoy nga ebkas, kuna ti maysa nga eskolar ti Biblia: “Nabagas dayta nga ebkas. . . . Ti panangdakamat iti asi [wenno, di kaikarian a kinamanangngaasi] ti Dios kas poikilos ket mangipamatmat nga awan ti aniaman a kasasaad ti tao a di marisut babaen ti asi ti Dios.” Innayonna: “Awan ti aniaman a kita dagiti kasasaad, krisis, emerhensia, wenno naganat a banag a saan a kabaelan a tamingen ken risuten ti asi ti Dios. Awan ti aniaman iti biag a di madaeran ti asi ti Dios. Daytoy a nabagas a sao a poikilos nalawag nga ipalagipna kadatayo dayta nga aduan iti maris nga asi ti Dios a talaga nga umdas a tumulong tapno madaerantayo ti amin a banag.”
Dagiti Pakasuotan a Madaeran Babaen ti Asi
Sigun ken ni Pedro, ti maysa a pamay-an a mayebkas ti di kaikarian a kinamanangngaasi ti Dios ket babaen dagiti nadumaduma nga indibidual a mangbukel iti kongregasion Kristiano. (1 Pedro 4:11) Tunggal adipen ti Dios ket addaan kadagiti naespirituan a sagut, wenno abilidad, nga agserbi a pakaparegtaan dagidiay maipaspasango iti pakasuotan. (Roma 12:6-8) Kas pagarigan, nalaing a mangisuro iti Biblia ti dadduma a kameng ti kongregasion. Dagiti masirib a sasaoda gutugoten ken tignayenna dagiti sabsabali nga agibtur. (Nehemias 8:1-4, 8, 12) Dagiti dadduma regular a bumisitada kadagiti pagtaengan tapno ipastoranda dagidiay agkasapulan iti tulong. Makaparegta, ‘makaliwliwa kadagiti puso,’ dagiti kasta nga isasarungkar. (Colosas 2:2) No agsarungkar dagiti manangaywan tapno pabilgenda ti pammati dagiti sabsabali, mangipaayda iti naespirituan a sagut. (Juan 21:16) Adda pay dagiti dadduma iti kongregasion a mararaem gapu iti nabara, naasi, ken nadungngo a pannakilangenda kadagiti kapammatianda nga agledleddaang gapu kadagiti pakasuotan. (Aramid 4:36; Roma 12:10; Colosas 3:10) Ti empatia ken aktibo a tulong dagiti kasta a naayat a kakabsat a lallaki ken babbai ket nagpateg nga ebkas, wenno “maris,” ti di kaikarian a kinamanangngaasi ti Dios.—Proverbio 12:25; 17:17.
“Ti Dios ti Amin a Liwliwa”
Kangrunaan iti amin, mangliwliwa ni Jehova. Isu ‘ti Dios ti amin a liwliwa, a mangliwliwa kadatayo iti amin a rigattayo.’ (2 Corinto 1:3, 4) Ti sirib a masarakan iti naipaltiing a Sao ti Dios ken ti pammabileg ti nasantuan nga espirituna ti kangrunaan a pamay-an ni Jehova a mangipaay iti tulong a dawdawatentayo iti kararag. (Isaias 30:18, 21; Lucas 11:13; Juan 14:16) Mapabilegtayo babaen ti kari a naipaltiing ken ni apostol Pablo. Kinunana: “Ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.”—1 Corinto 10:13.
Wen, aniaman ti “maris,” wenno kita, ti pakasuotantayo, adda a kanayon ti “maris,” wenno ebkas, ti di kaikarian a kinamanangngaasi ti Dios a tumulong tapno madaerantayo dayta. (Santiago 1:17) Ti naintiempuan ken maitutop a tulong ni Jehova kadagiti adipenna—aniaman a kita ti pakasuotan wenno pakarigatanda—ket maysa laeng a pammaneknek ti “kasta unay panagdudumana a sirib ti Dios.” (Efeso 3:10) Umanamongkay kadi?
[Dagiti Ladawan iti panid 31]
Tulongannatayo ni Jehova a mangdaer kadagiti pakasuotan