Salsaludsod Dagiti Agbasbasa

Kuna ti Deuteronomio 14:21: “Dikay mangan iti aniaman a natayen a bagi.” Maikontra kadi dayta iti Levitico 11:40, nga agkuna: “Daydiay mangan iti aniaman iti natay a bagina labaannanto dagiti kawesna, ket isu narugitto agingga iti rabii”?

Saan nga agkontra dagitoy dua a teksto. Ti immuna a teksto ipagpaganetgetna a maiparit ti mangan iti animal a nasarakan a natay, nalabit daydiay pinapatay dagiti atap nga animal. (Exodo 22:31; Levitico 22:8) Ilawlawag ti maikadua a teksto no ania ti mabalin nga inaramid ti maysa nga Israelita no bilang ta di inggagara a nasalungasingna dayta a linteg.

Adda a talaga dagiti gundaway a malabsing ti maysa ti iparit ti Linteg. Kas pagarigan, adda dagiti linteg a mangiparit iti panagtakaw, pammapatay, ulbod a panangsaksi, ken dadduma pay. Ngem adda met dagiti katupagna a pannusa no malabsing dagita a linteg ti Dios. Dagita a pannusa ti nangted iti ngipen kadagiti linteg ken mangipakita no kasano kaserioso dagita.

Ti tao a nangsalungasing iti linteg a mangiparit iti pannangan iti lasag ti animal a nasarakan a natay ket maibilang a narugit iti imatang ni Jehova ken masapul a lumasat iti umiso a pamay-an ti panagdalus. No saan nga umiso ti panangdalusna iti bagina, ‘sungsungbatanna ti biddutna.’​—Levitico 17:15, 16.