Pakasaritaan ti Biag

Panagtultuloy kas Soldado ni Kristo

KAS INSALAYSAY NI YURII KAPTOLA

“Kombinsidoakon a talaga nga adda pammatim!” Kasta ti di ninamnama a kinuna ti maysa nga opisial ti armada ti Soviet, a nakapabileg kaniak iti umiso a tiempo. Nasentensiaanak ngamin a mabalud iti naunday a tiempo ket sipapasnek nga ikarkararagko ti tulong ni Jehova. Naipasangoak iti naunday a pannakidangadang nga agkasapulan iti panagibtur ken determinasion.

NAIPASNGAYAK idi Oktubre 19, 1962, ken dimmakkelak iti makinlaud a paset ti Ukraine. Iti dayta met laeng a tawen, ni Tatang a maawagan met iti Yurii naam-ammona dagiti Saksi ni Jehova. Di nagbayag, nagbalin ni Tatang kas ti kaunaan nga agdaydayaw ken ni Jehova iti purokmi. Naduktalan ti aktibidadna babaen kadagiti opisial a bumusbusor kadagiti Saksi ni Jehova.

Nupay kasta, ti kaaduan kadagiti kaarrubami raraemenda dagiti dadakkelko gapu kadagiti Nakristianuan a galad ken pannakaseknanda kadagiti tattao. Manipud kinaubingmi kadagiti tallo a kakabsatko a babbai, inusar dagiti dadakkelko ti tunggal gundaway a mangipasagepsep kadakami ti panagayat iti Dios, ket dayta ti timmulong kaniak a mangsango iti adu a karit iti eskuelaan. Timmaud ti maysa kadagita a karit idi naibilin kadagiti amin nga estudiante nga isuotda ti badge a mangipabigbig kadakuada kas October Children ni Lenin. Gapu iti neutral a takderko kas Kristiano, saanko nga insuot ti badge isu a siak la ti naidumduma.​—Juan 6:15; 17:16.

Kalpasanna, idi addaakon iti maikatlo a grado, naibilin kadagiti amin nga estudiante a makimiembroda iti Komunista nga organisasion dagiti agtutubo a maawagan iti Young Pioneers. Naminsan, naipan ti klasemi iti paraangan ti eskuelaan para iti seremonia ti panagpasalista. Nagamakak di la ket ta maumsi wenno mababalawak. Siak laeng ti saan a nangitugot iti nalabaga a panyo dagiti Pioneer, ket dagiti estudiante nagtakderda iti atiddog nga intar iti sango ti prinsipal, dagiti mannursuro, ken dagiti natataengan nga estudiante. Idi naibilin kadagiti natataengan nga estudiante nga ibedbedda ti panyo iti tengngedmi, nagdumogak, a nangnamnamaak nga awan makakita kaniak.

Naipan Kadagiti Adayo a Pagbaludan

Idi agtawenak iti 18, nasentensiaanak a maibalud iti tallo a tawen gapu iti agtultuloy a neutral a takderko kas Kristiano. (Isaias 2:4) Iti umuna a tawen, naibaludak iti ili ti Trudovoye, iti Distrito ti Vinnitskaya, Ukraine. Bayat ti kaaddak sadiay, naam-ammok ti agarup 30 a Saksi ni Jehova. Naibaonkami nga agtrabaho a sagdudua iti nagduduma a kampo, agsipud ta saan a kayat dagiti autoridad nga agkakaduakami.

Idi Agosto 1982, nailuganak iti tren a kaduak ti sabali pay a Saksi nga agnagan Eduard ket naipankami iti makin-amianan ti Ural Mountains a kaduami ti maysa a grupo dagiti dadduma pay a balud. Walo nga aldaw nga inibturanmi ti nakabarbara ken napekpek a tren agingga a dimtengkami iti Solikamsk Prison, iti Distrito ti Permskaya. Naibaonkami ken ni Eduard nga agtrabaho iti nadumaduma a selda. Dua a lawas kalpasanna, naipanak pay iti amianan ti Vels, iti rehion ti Krasnovishersky.

Simmangpet ti luganmi iti tengnga ti rabii, ket nakasipsipnget. Iti laksid ti kinasipnget, binilinnakami ti maysa nga opisial a bumallasiw iti karayan babaen ti barangay. Saanmi a makita ti karayan ken ti barangay! Kaskasdi, nagkaradapkami agingga a nasapulanmi ti barangay ket, nupay nakaam-amak, naikagumaanmi a binallasiw ti karayan. Apaman a nakaballasiwkami, tinuntonmi ti maysa a lawag a makita iti asideg a turod, a nakasarakanmi iti sumagmamano a tolda. Daytoy ti agbalin a baro a pagtaenganmi. Nagtaengak iti maysa a dakkel a tolda nga addaan iti agarup 30 a balud. Bayat ti tiempo ti lam-ek, inibturanmi ti temperatura a bumaba no dadduma iti menos 40 degrees Fahrenheit, isu a malamminkami latta uray no adda ti tolda. Ti kangrunaan a trabaho dagiti balud ket panagpukan iti kaykayo, ngem ti trabahok ket panagbangon kadagiti kalapaw dagiti balud.

Ti Naespirituan a Taraon Dimmanonda Kadagiti Naiputputong a Kampo

Sisiak ti Saksi iti dayta a kampo; ngem saannak a binaybay-an ni Jehova. Maysa nga aldaw, maysa a pakete ti simmangpet manipud ken ni Nanang, nga agnanaed pay la idi iti makinlaud a Ukraine. Idi linuktan ti maysa a guardia ti pakete, maysa a bassit a Biblia ti damo a nakitana ket linukibna dayta. Nangpanunotak iti mabalinko nga ibaga tapno saanna a kompiskaren dayta a naespirituan a gameng. “Ania daytoy?” kellaat nga inyimtuod ti guardia. Sakbay a nakapanunotak iti ibagak, simmungbat ti maysa nga inspektor a nakatakder iti asideg: “Diksionario la dayta.” Saanakon a nagtagtagari. (Eclesiastes 3:7) Sinukimat ti inspektor ti dadduma a linaon ti pakete sa inyawatna kaniak agraman ti nagpateg a Biblia. Nakaragragsakak isu a nangidiayaak kenkuana iti nuez manipud iti pakete. Idi inawatko daytoy a pakete, ammok a saannak a linipatan ni Jehova. Sipaparabur a tinulongannak ken impaayannak kadagiti naespirituan a kasapulak.​—Hebreo 13:5.

Agtultuloy a Panangasaba

Sumagmamano a bulan kalpasanna, nasorpresaak a nakaawat iti maysa a surat manipud iti maysa a Kristiano a kabsat a nakabalud agarup 400 a kilometro ti kaadayona. Kiniddawna a sapulek ti maysa a lalaki a nangipakita iti interes a mabalin nga adda idin iti kampo. Gapu ta masuksukimat dagiti surat, saan a nainsiriban ti panangaramid kadagiti surat a di nalimed ti mensahena agsipud ta masukimat ti linaonda. Di pagsiddaawan, maysa kadagiti opisial ti nangayab kaniak iti opisinana ket siiinget nga imballaagna a diak mangaskasaba. Kalpasanna, binilinnak nga agpirma iti dokumento nga agkuna nga isardengko ti panangiranud iti patpatiek. Insungbatko a diak maawatan no apay a rumbeng nga agpirmaak iti kasta a dokumento, idinto ta ammo ti amin a maysaak kadagiti Saksi ni Jehova. Nadakamatko a kayat dagiti dadduma a balud a maammuan no apay a naibaludak. Ania koma ti isungbatko kadakuada? (Aramid 4:20) Naamiris ti opisial a dinak kabaelan a butbutngen, isu nga inkeddengna a papanawennak. Naipanak iti sabali a kampo.

Nayakarak iti purok ti Vaya, a 200 a kilometro ti kaadayona. Sadiay, dagiti superbisor rinaemda ti Nakristianuan a takderko ket impabaklayda kaniak dagiti di namilitariaan a trabaho​—umuna kas karpintero, sa kalpasanna kas elektrisian. Ngem adda latta dagiti parikut kadagitoy a trabaho. Naminsan, naibilin a mangitugotak kadagiti remienta ket mapanak iti lugar a paglinglingayan dagiti soldado. Idi dimtengak, naragsakan dagiti soldado sadiay idi makitadak. Parikutda ti saan a panagkurri dagiti silaw a mangpappapintas iti nadumaduma a namilitariaan nga emblema. Kayatda a tumulongak a mangtarimaan kadagitoy agsipud ta agsagsaganada para iti tinawen a panangrambak iti Red Army Day. Kalpasan ti nainkararagan a panangutobko no ania ti aramidek, imbagak kadakuada a saanko a maaramid dayta a kita ti trabaho. Intedko kadakuada dagiti remientak ket pimmanawak. Naipulongak iti diputado a direktor, ket nasdaawak ta kalpasan a nagimdeng kadagiti reklamo, insungbatna: “Raemek isuna. Adda prinsipiona.”

Pammaregta Manipud iti Di Ninamnama a Gubuayan

Idi Hunio 8, 1984, kalpasan ti eksakto a tallo a tawen a pannakaibalud, nawayawayaanak. Kalpasan ti panagsublik idiay Ukraine, masapul nga agparehistroak iti serbisio militar kas maysa a dati a balud. Kinuna dagiti opisial a mabistaak manen iti uneg ti innem a bulan, isu a nasaysayaat no panawak a naan-anay ti distrito. Gapuna, pimmanawak iti Ukraine ket nagangayanna nakasarakak iti trabaho idiay Latvia. Idi damo, nabalinak ti nangasaba ken nakitimpuyog iti bassit a grupo dagiti Saksi nga agnanaed iti aglikmut ti Riga, ti kabesera. Ngem kalpasan laeng ti makatawen, naayabanak manen nga agserbi iti militar. Iti opisina a pagrehistruan, imbagak iti opisial a siguden nga agkedkedak nga agserbi iti militar. Kas sungbat, inriawna: “Ammom kadi a talaga no ania ti ar-aramidem? Kitaenta no ania ti ibagam iti teniente koronel!”

Iti maysa a siled iti maikadua a kadsaaran, indatagnak iti teniente koronel a nakatugaw iti likudan ti atiddog a lamisaan. Nagimdeng a naimbag bayat nga inlawlawagko ti takderko ket kalpasanna imbagana nga adda pay tiempok a mangbalbaliw iti desisionko sakbay a maipasangoak iti komite ti panagpasalista. Bayat ti ipapanawmi iti opisina ti teniente koronel, inadmitir ti opisial a nagunget kaniak: “Kombinsidoakon a talaga nga adda pammatim!” Idi naisaklangak iti komite ti militar, inlawlawagko manen ti neutral a takderko, ket temporario a binaybay-andak.

Bayat dayta a tiempo, nagnaedak iti motel. Maysa a rabii, nakangngegak iti nakapsut a tuktok iti ridaw. Linuktak dayta ket nakasaritak ti maysa a lalaki a pormal ti kawesna ken nakaawit iti portpolio. Inyam-ammona ti bagina, a kunkunana: “Kamengak ti State Security. Ammok nga adda parikutmo ken adda kasom iti pangukoman.” “Wen, pudno dayta,” insungbatko. Intuloy ti lalaki: “Matulongandaka no umanamongka a makipagtrabaho kadakami.” “Saan, saan a mabalin dayta,” insungbatko. “Agtalinaedak a nasungdo kadagiti Nakristianuan a patpatiek.” Pimmanaw ti lalaki, ket dinan inkagumaan pay ti nangallukoy kaniak.

Gundaway Manen a Mangasaba iti Pagbaludan

Idi Agosto 26, 1986, ti National Court ti Riga sinentensiaannak iti inkapilitan a panagtrabaho iti uppat a tawen, ket naipanak iti Riga Central Prison. Imbaluddak iti dakkel a selda a kaduak ti 40 a sabali pay a balud, ket inkagumaak a kinasabaan ti tunggal balud iti dayta a selda. Adda dagiti mangibaga a mamatida iti Dios; ti dadduma katawaanda laeng dayta. Nadlawko a nagrupogrupo dagiti lallaki, ket kalpasan ti dua a lawas imbaga dagiti lider dagitoy a grupo a saanak a mapalubosan a mangasaba agsipud ta saanak a sumursurot kadagiti di naisurat a paglinteganda. Inlawlawagko a naibaludak gapu iti dayta a rason​—agbibiagak mayannurot kadagiti naiduma a linteg.

Intultuloyko ti nangasaba a siaannad, ket idi adda dagiti aginteres iti naespirituan, impamuspusak nga inyadalan iti Biblia ti uppat kadakuada. Bayat ti panagadalmi, insuratda iti maysa a kuaderno dagiti pamunganayan a sursuro ti Biblia. Sumagmamano a bulan kalpasanna, naipanak iti nainget ti seguridadna a kampo idiay Valmiera, a nagtrabahuak kas elektrisian. Sadiay, inyadalak iti Biblia ti maysa met nga elektrisian a nagbalin a Saksi ni Jehova uppat a tawen kalpasanna.

Idi Marso 24, 1988, nayakarak iti asideg a kampo manipud iti nainget ti seguridadna a kampo. Pudno a bendision dayta, yantangay nawaywayaak. Naibaonak nga agtrabaho iti nadumaduma a lugar a pagibangonan, ket kanayon a mangbirokak kadagiti gundaway a mangasaba. Masansan nga addaak kadagiti lugar nga adayo iti kampo, a mangaskasaba agingga iti adalemen ti rabii, ngem awan a pulos ti rigrigatko nga agsubli iti kampo.

Binendisionan ni Jehova dagiti panagreggetko. Sumagmamano a Saksi ti agnanaed iti lugar ti kampo, ngem iti ili a mismo adda laeng maymaysa a Saksi, ni Vilma Krūmin̗a​—maysa a baket a kabsat. Inrugimi ken ni Kabsat Krūmin̗a nga angayen ti adu a panagadal iti Biblia kadagiti agtutubo. Dagiti kakabsat agdaliasatda sagpaminsan manipud Riga tapno makiramanda iti ministerio, ken adda pay regular pioneer nga immay manipud Leningrad (St. Petersburg itan). Babaen ti tulong ni Jehova, nakairugikami kadagiti panagadal iti Biblia, ken di nagbayag nagpasalistaak kas payunir, a mangbusbos iti 90 nga oras kada bulan iti trabaho a panangasaba.

Idi Abril 7, 1990, nausig manen ti kasok iti People’s Court idiay Valmiera. Idi nangrugi ti bista, nabigbigko ti piskal. Isu ket agkabannuag idi a baro a nakapatangko maipapan iti Biblia! Nabigbignak isu nga immisem ngem di nagsasao. Malagipko pay ti kinuna kaniak ti ukom iti dayta nga aldaw: “Yurii, ilegal ti desision idi a pannakaibaludmo iti uppat a tawen. Saan a nainkalintegan ti panangsentensiada kenka.” Nawayawayaanak met laengen!

Soldado ni Kristo

Idi Hunio 1990, kasapulan manen nga agpasalistaak iti opisina ti pagrehistruan tapno makaalaak iti permiso nga agnaed idiay Riga. Simrekak iti isu met laeng a siled nga addaan iti atiddog a lamisaan, ti opisina ti teniente koronel a nangibagaak a saanak nga agserbi iti militar. Iti daytoy a gundaway, timmakder tapno kablaawannak, nakialamano, ken kinunana: “Saan koma a rumbeng a napasaram amin dagitoy. Maladingitanak a napasamak dagita kenka.”

Insungbatko: “Soldadoak ni Kristo, ket masapul nga itungpalko ti annongek. Babaen ti tulong ti Biblia, mabalinmo met a tagiragsaken ti inkari ni Kristo kadagiti adalanna​—naragsak a biag ken agnanayon a masakbayan.” (2 Timoteo 2:3, 4) Insungbat ti koronel: “Iti di pay nabayag, gimmatangak iti Biblia, ket basbasaekon dayta.” Awitko ti libro a Mabalinyo ti Agbiag nga Agnanayon iti Paraiso a Daga.a Linuktak iti kapitulo maipapan iti pagilasinan ti maudi nga al-adaw ken inlawlawagko no kasano a nainaig iti tiempotayo ti padto ti Biblia. Buyogen ti kasta unay nga apresasion, inalamanonak manen ken kinunana nga agballigiak koma iti trabahok.

Iti dayta a tiempo, panawenen ti panagani idiay Latvia. (Juan 4:35) Idi 1991, nangrugiak nga agserbi kas panglakayen ti kongregasion. Dua laeng ti nadutokan a panglakayen iti intero a pagilian! Makatawen kalpasanna, nabingay iti dua ti kakaisuna a kongregasion iti Latvia​—maysa iti pagsasao ti Latvia ken maysa iti pagsasao a Ruso. Naipaayanak iti pribilehio nga agserbi iti Ruso a kongregasion. Nakaparpartak ti panagrang-ayna isu a ti kongregasionmi ket nabingay iti tallo iti simmaganad a tawen! No lagipek ti napalabas, nalawag a ni Jehova a mismo iturturongna dagiti karnerona iti organisasionna.

Idi 1998, nadutokanak nga agserbi kas special pioneer idiay Jelgava, maysa nga ili nga 40 a kilometro iti abagatan a laud ti Riga. Iti dayta met laeng a tawen, maysaak kadagiti kaunaan manipud Latvia a naawis a tumabuno iti Ministerial Training School a naikondukta iti pagsasao a Ruso idiay Solnechnoye, asideg ti St. Petersburg, Russia. Bayat ti kaaddak iti eskuelaan, naammuak no kasano kapateg ti maaddaan iti ayat kadagiti tattao tapno agbalinak a naballigi iti ministerio. Ti nangnangruna a nagustuak, nga adayo a napatpateg ngem kadagiti banag a naisuro iti eskuelaan, isu ti ayat ken atension nga impakita ti pamilia ti Bethel ken dagiti instruktor ti eskuelaan.

Idi 2001, naaddaan ti biagko iti sabali pay a nagpateg a pasamak idi nagkasarkami ken ni Karina, maysa a nakasaysayaat a Kristiano a babai. Kinaduaannak ni Karina iti espesial nga amin-tiempo a serbisio, ket inaldaw a naparegtaak gapu ta makitak a nakaragragsak ni baketko kada agsubli manipud iti tay-ak ti serbisio. Talaga a dakkel a rag-o ti agserbi ken ni Jehova. Dagiti nakas-ang a kapadasan iti sidong ti rehimen a Komunista insuronak nga agtalek a naan-anay iti Dios. Saan a dakkel a banag ti panagsakripisio ti maysa a tao nga agtarigagay nga agtalinaed a gayyem ni Jehova ken mangitandudo iti kinasoberanona. Naaddaan ti biagko iti panggep gapu iti panangtulongko kadagiti tattao a mangammo iti maipapan ken ni Jehova. Matmatak a naisangsangayan a pakaidayawan ti agserbi ken ni Jehova “kas maysa a nasayaat a soldado ni Kristo.”​—2 Timoteo 2:3.

[Footnote]

[Ladawan iti panid 10]

Nasentensiaanak iti inkapilitan a panagtrabaho iti uppat a tawen ken naibaludak iti Riga Central Prison

[Ladawan iti panid 12]

Dakami ken ni Karina iti ministerio