Armagedon—Makadidigra a Panungpalan?
ARMAGEDON! Dayta kadi a sao iladawanna iti isipyo ti sapasap a pannakadadael wenno pannakauram ti uniberso? Iti adu a paset ti lubong, masansan ti pannakadakamat ti sumagmamano a termino iti Biblia kas iti “Armagedon.” Daytoy a termino ket kaaduan a maus-usar a mangdeskribir iti nalidem a masakbayan dagiti tattao. Dagiti pelikula pinunnoda ti pampanunot dagiti tattao kadagiti nakabutbuteng nga eksena ti um-umay nga “Armagedon.” Dayta a sao ket nabalkut iti misterio ken kadagiti di umiso a kapanunotan. Nupay adu ti kapanunotan maipapan iti kaipapananna, kaaduan kadagita ti di maitunos iti isursuro ti Biblia—ti nagtaudan ti sao nga Armagedon.
Yantangay ti Biblia inaigna ti Armagedon iti “panungpalan ti lubong,” saankayo kadi nga umanamong a napateg ti maaddaan iti nalawag a pannakaawat no ania a talaga ti kaipapanan dayta a sao? (Mateo 24:3, King James Version) Ken saan kadi a rasonable a sukimaten ti gubuayan ti kinapudno, ti Sao ti Dios, tapno masarakan dagiti sungbat no ania a talaga ti Armagedon ken no kasano nga apektarannaka ken ti pamiliam?
Ti kasta a panagsukimat ipakitana nga imbes a makadidigra a panungpalan, iyeg ti Armagedon ti maysa a naragsak a pangrugian para kadagiti tattao nga agtarigagay nga agbiag nga agtultuloy iti maysa a nalinteg a baro a lubong. Maawatamto a silalawag daytoy a napateg a kinapudno iti Kasuratan no usigem ti sumaganad nga artikulo a mangilawlawag iti pudno a kaipapanan ti Armagedon.
[Kahon/Ladawan iti panid 3]
ANIA TI AMMOM NGA ARMAGEDON?
• Pannakaikisap babaen ti nuklear
• Pannakadadael ti aglawlaw
• Panagdinnungpar ti daga ken ti maysa a banag iti uniberso
• Panangdadael ti Dios kadagiti nadangkes