Krismas ken Baro a Tawen—Agbanag Ngata a kas iti Namnamaem?
“Ni Peter [the Great] imbilinna a maangay dagiti naisangsangayan a misa ti Baro a Tawen kadagiti amin a simbaan iti kada Enero 1. Imbilinna pay a mausar dagiti berde a sangsanga a pangarkos kadagiti bautek iti uneg dagiti pagtaengan, ken imbilinna nga amin nga umili ti Moscow masapul nga ‘ipakitada ti ragsakda babaen ti naariwawa a panagkikinnablaaw’ kabayatan ti Baro a Tawen.”—Peter the Great—His Life and World.
ANIA ti segseggaam iti tiempo ti Krismas ken Baro a Tawen? Mabalin a nakabakasion dagiti nagannak ken annak bayat dayta a tiempo, isu nga agparang a nasayaat dayta a gundaway a makapaglalangen dagiti pamilia. Ti Krismas isu ti tradisional nga aldaw ti pannakaipasngay ni Kristo. Dadduma a tattao tarigagayanda a padayawan ni Kristo agsipud ta para kadakuada daytoy ti kapatgan nga aspeto dayta a tiempo ti tawen. Mabalin a kasta met ti panangmatmatmo.
Dayta man ket tapno mangpadayaw ken ni Kristo ken tapno matagiragsak ti sangapamiliaan a panaglalangen, wenno aniaman kadagita, minilion nga agassawa ken annak iti lubong ti mangsegsegga iti dayta a tiempo. Komusta met ita a tawen? Naisangsangayanto ngata dayta a tiempo para iti pamilia, ken naisangsangayan kadi dayta iti Dios? No adda ti panagtitipon ti pamilia iti dayta a tiempo, agbanag ngata dayta a kas iti namnamaem, wenno maupayka ketdi?
Adu a tattao a mangpadpadaan iti Krismas ken Baro a Tawen kas narelihiosuan a tiempo ti makadlaw a masansan a saan a ni Kristo ti nakaisentruan ti pannakarambak dayta. Imbes ketdi, dayta a tiempo ket nagbalin a maysa laeng a gundaway tapno makaawat iti regalo, tapno adda laeng rason a mangangay iti ragragsak a mabalin a pakairamanan ti aramid a mangibabain ken Kristo, wenno tapno laeng makapagtitipon ti pamilia. Adu a daras a ti kasta a panagtitipon ket dadaelen ti maysa wenno ad-adu pay a kapamilia a mangan ken uminom iti aglablabes, a pangrugian dagiti supiat a masansan nga agresulta iti kinaranggas iti pamilia. Mabalin a napaliiwmo dayta kadagiti sabali, wenno iti mismo a pamiliam.
No kasta, nalabit a nadlawmo nga awan unay ti nagbalbaliwanna sipud idi panawen ti nadakamat nga emperador ti Russia a ni Peter the Great. Gapu ta maringgoranda kadagiti paspasamak ita, tarigagayan ti adu a tattao a ti Krismas ken Baro a Tawen ket agbalin a tiempo ti serioso a narelihiosuan a panagmennamenna ken nasayaat a panaglalangen ti pamilia. Dadduma ti mangikampania pay ketdi iti panagbalbaliw, nga agusarda kadagiti islogan a kas iti, Ni Jesus ti pakaigapuan ti piesta. Ngem mangyeg kadi dayta iti panagbalbaliw? Ken talaga kadi a pakaidayawan dayta ni Kristo? Adda kadi rason tapno maaddaan iti naiduma a panangmatmat iti tiempo ti Krismas ken Baro a Tawen?
Tapno masarakantayo dagiti makapnek a sungbat, matmatantayo ti kasasaad babaen ti panangusigtayo kadagiti komento dagiti umili iti maysa a nasion a rumbeng nga addaan iti naisangsangayan a rason a mangapresiar iti daytoy a tiempo ti tawen.