Ti Panagdayaw a Pagimbagam

“TI IYAADANI iti Dios naimbag kaniak,” impakaammo ni salmista Asaf. Pinanunotna idi a tuladen dagidiay saanen a mangikankano iti Dios tapno ragpatenda ti nanam-ay a biag. Ngem inamirisna dagiti pagimbagan ti iyaadani iti Dios ket napanunotna a pagsayaatanna dayta. (Salmo 73:2, 3, 12, 28) Pagimbagam kadi ita ti pudno a panagdayaw? Kasano a makagunggona dayta kenka?

Ti panagdayaw iti pudno a Dios tulongannatayo a mangtagiragsak iti maysa a banag a natantan-ok ngem iti panagbiag a naisentro iti bagi. Dagidiay mangragragpat kadagiti bukodda laeng nga interes saandanto a pulos nga agbalin a naragsak gapu ta saan a maitunos dayta iti wagas ti panangparsua kadatayo “ti Dios ti ayat.” (2 Corinto 13:11) Insuro ni Jesus ti maysa a pamunganayan a kinapudno maipapan iti kinatao idi kinunana: “Ad-adu ti kinaragsak iti panangted ngem iti panangawat.” (Aramid 20:35) Dayta ti makagapu a maragsakantayo no adda maaramidantayo para kadagiti gagayyem ken kapamiliatayo. Ngem agtaud ti kadakkelan a ragsak manipud iti panangaramid iti bambanag para iti Dios. Isu ti ad-adda a maikari nga ayatentayo ngem iti siasinoman. Minilmilion a tattao manipud iti amin a kasasaad iti biag ti nakapaneknek a nakaragragsak ti agdayaw iti Dios babaen ti panagtulnog kenkuana.​—1 Juan 5:3.

Addaan Panggep iti Biag

Pagimbagam met ti pudno a panagdayaw agsipud ta tulongannaka a maaddaan iti panggep iti biag. Nadlawmo kadi a naragsakka tunggal adda nasayaat a magapuanam? Adda kalat ti kaaduan a tattao, nainaig man dayta iti pamilia, gagayyem, negosio, wenno ragragsak. Ngem gapu kadagiti pakaringgoran iti biag, masansan a saan a maipaay dagita a bambanag ti kinaragsak a birbirokenda. (Eclesiastes 9:11) Ngem ti pudno a panagdayaw tulongannaka a maaddaan iti natantan-ok a panggep, nga agtultuloy a makapnek uray no napaayka kadagiti dadduma nga aspeto iti biag.

Ti pudno a panagdayaw iramanna ti panangam-ammo ken ni Jehova ken simamatalek a panagserbi kenkuana. Dagidiay mangan-annurot iti dayta nakasingsingedda iti Dios. (Eclesiastes 12:13; Juan 4:23; Santiago 4:8) Kasla nagrigat a panunoten a mabalinmo nga am-ammuen a naimbag ti Dios agingga nga isu ket agbalin a gayyemmo. Ngem babaen ti panangusig kadagiti naisalaysay a pannakilangenna iti tao ken babaen ti panangutob kadagiti pinarsuana, talaga a mabalinmo a matarusan dagiti aspeto ti personalidadna. (Roma 1:20) Kanayonanna, babaen ti panangbasa iti Sao ti Dios, maawatam no apay nga addatayo ditoy, no apay nga ipalpalubos ti Dios ti panagsagaba, no kasano a pagpatinggaenna ti panagsagaba ken, nalabit ti makapainteres iti amin, no kasano a maaddaanka iti napnuan kaipapanan a pannakiraman iti panggep ti Dios. (Isaias 43:10; 1 Corinto 3:9) Ti kasta a pannakaawat ipaayannaka iti baro a rason nga agbiag!

Panagbalin a Nasaysayaat a Tao

Pagimbagam ti pudno a panagdayaw agsipud ta tulongannaka nga agbalin a nasaysayaat a tao. Bayat a makipasetka iti pudno a panagdayaw, mapatanormo ti personalidad a mamagbalin a naragragsak ti relasionmo kadagiti sabsabali. Makasursuroka iti Dios ken iti Anakna maipapan iti panagbalin a napudno, panagsao a siaasi, ken panagbiag a responsable. (Efeso 4:20–5:5) No am-ammuem a naimbag ti Dios, mapatanormo ti panagayat kenkuana ket matignayka a mangtulad kenkuana. Kuna ti Biblia: “Agbalinkayo a tumutulad iti Dios, kas annak a dungdungnguen.”​—Efeso 5:1, 2.

Saan kadi a makaay-ayo ti makitimpuyog kadagiti tattao a mangiparparangarang iti ayat ti Dios? Makaparagsak ta ti panagdayaw iti pudno a Dios ket saan nga aktibidad nga agmaymaysaka a mangaramid. Dayta ti mangitimpuyog kenka kadagiti tattao a mangipatpateg iti umiso ken naimbag. Siempre, nalabit nga adda panagduaduam maipapan iti organisado a relihion. Ngem kas nakitatayo iti immuna nga artikulo, ti parikut iti kaaduan a relihion ket saan a gapu ta organisadoda no di ket gapu ta saanda nga organisado iti umiso a pamay-an ken iti umiso a panggep. Saan a Nakristianuan ti panggep ti adu nga organisado a relihion. Ni Jehova a mismo ti mangor-organisar iti ilina maigapu iti natan-ok a panggep. Kuna ti Biblia: “Ti Dios ket Dios, saan a ti riribuk, no di ket ti talna.” (1 Corinto 14:33) Kas iti minilmilion a sabsabali, agbalin a nalawlawa ti panangmatmatmo no makitimpuyogka iti maysa nga organisado a grupo dagiti Kristiano.

Namnama Para iti Masanguanan

Ti Nasantuan a Kasuratan ipakitana nga or-organisaren ti Dios dagiti pudno a managdaydayaw tapno malasatanda ti panungpalan ti agdama a sistema ti bambanag ken tawidenda ti baro a daga a ‘pagtaengan ti kinalinteg.’ (2 Pedro 3:13; Apocalipsis 7:9-17) Ti panagdayaw ngarud a pagimbagam ket mangipaay kenka iti namnama, banag a napateg iti panagbalinmo a naragsak. Dadduma a tattao ti mangnamnama iti masanguanan sigun iti kinatalged dagiti gobierno, kadagiti oportunidad iti negosio, wenno iti namnamaenda a naimbag a salun-at ken makapnek a panagretiro. Ngem manmano no adda man kadagitoy a bambanag ti makaipaay iti natalged a pangnamnamaan agpaay iti naragsak a masanguanan. Iti sabali a bangir, insurat ni apostol Pablo: “Insadagtayo ti namnamatayo iti sibibiag a Dios.”​—1 Timoteo 4:10.

No agsukimatka a naimbag, makasarakka kadagiti pudno nga agdaydayaw. Iti lubongtayo ita a nabingaybingay, nalawag a nagpaiduma dagiti Saksi ni Jehova gapu iti ayat ken panagkaykaysada. Naggapuda manipud iti dandani amin a nasion ken kasasaad; ngem pinagkaykaysa ida ti panagayatda iti maysa ken maysa ken ti panagayatda ken ni Jehova. (Juan 13:35) Awisendaka a mangammo a mismo no ania ti napasaranda. Insurat ni Asaf: “Ti iyaadani iti Dios naimbag kaniak.”​—Salmo 73:28.

[Ladawan iti panid 7]

Mabalinmo ti makigayyem iti Dios