Ania ‘ti Maudi nga Al-aldaw’?

PAMPANUNOTEM kadi no ania ti masakbayanyo kadagiti ing-ingungotem? Adu a tattao ti mangsuksukimat a naimbag kadagiti damdamag tapno maammuanda dagiti pasamak iti lubong a mangapektar iti panagbiagda. Ngem maaddaantayo iti umiso a pannakaawat no ipangagtayo ti naipaltiing a Sao ti Dios. Saan laeng ngamin a ti agdama a paspasamak ti nabayagen a naipadto iti Biblia no di ket dagiti pay bambanag nga umayto.

Kas pagarigan, naynay nga impakaammo ni Jesus ti Pagarian ti Dios idi adda ditoy daga. (Lucas 4:43) Gagangay laeng a dagiti tattao a dimngeg kenkuana kayatda a maammuan no kaano a dumteng dayta a nagsayaat a Pagarian. Kinapudnona, tallo nga aldaw sakbay ti di nainkalintegan a pannakapapatay ni Jesus, inyimtuod dagiti adalan kenkuana: “Anianto ti pagilasinan ti kaaddam [iti Pagarian kas agturay] ken ti panungpalan ti sistema ti bambanag?” (Mateo 24:3) Imbaga ni Jesus kadakuada a ni laeng Jehova ti makaammo iti eksakto nga oras no kaano a naan-anay nga agturay ti Pagarian ditoy daga. (Mateo 24:36; Marcos 13:32) Nupay kasta, ni Jesus ken ti sabsabali pay impadtoda dagiti pasamak ditoy daga nga agserbi a pammaneknek nga agturturayen ni Kristo iti Pagarian.

Sakbay nga usigentayo dagiti makita a pammaneknek nga agbibiagtayon “kadagiti maudi nga aldaw” iti agdama a sistema ti bambanag, usigentayo iti apagbiit ti maysa a nagpateg a napasamak iti pagnanaedan dagiti espiritu. (2 Timoteo 3:1) Nagari ni Jesu-Kristo idiay langit idi tawen 1914.a (Daniel 7:13, 14) Kalpasan la unay ti panagtugawna kas ari iti Pagarianna, nagtignay ni Jesus. Kastoy ti kuna ti Biblia: “Bimtak ti gubat sadi langit: Ni Miguel ken dagiti anghelna nakibakalda iti dragon, ket nakibakal ti dragon ken dagiti anghelna.” (Apocalipsis 12:7) “Ni Miguel nga arkanghel” isu ni Jesu-Kristo nga adda iti nailangitan a saadna.b (Judas 9; 1 Tesalonica 4:16) Ni Satanas a Diablo ti dragon. Ania ti nagbanagan ni Satanas ken dagiti pasurotna a nadangkes nga anghel, a naawagan iti demonio, iti daytoy a rinnupak? Naabakda iti dayta a gubat ket napapanawda idiay langit, wenno “naitapuakda” iti kaparanget ti daga. (Apocalipsis 12:9) Gapu iti daytoy, agragsak ti ‘langlangit ken dagidiay agnaed kadakuada,’ kayatna a sawen, dagidiay matalek nga espiritu nga annak ti Dios. Ngem saan a nagragsak dagiti tattao. “Asi pay ti daga,” impadto ti Biblia, ‘agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti tiempona.’​—Apocalipsis 12:12.

Gapu iti pungtotna, nangyeg ni Satanas iti panagsagaba ken panagrigat kadagiti agnanaed ditoy daga. Ngem apagkanito laeng dayta, maysa nga ‘ababa a tiempo.’ Ti Biblia tukoyenna daytoy a tiempo kas ‘ti maudi nga al-aldaw.’ Makapagragsaktayo yantangay iti mabiiten, naan-anayton a mapukaw ti impluensia ti Diablo ditoy daga. Ngem ania ti pammaneknek nga agbibiagtayon kadagiti maudi nga aldaw?

[Footnotes]

[Picture Credit Lines iti panid 2]

AKKUB: Sango: © Chris Stowers/Panos Pictures; likud: FAROOQ NAEEM/AFP/Getty Images