Pagragsakanna ti Linteg ni Jehova

NI ALBERT D. SCHROEDER, a kameng ti Bagi a Manarawidwid Dagiti Saksi ni Jehova, naturposna ti panagbiagna ditoy daga idi Mierkoles, Marso 8, 2006. Agtawen iti 94 ken nasurok a 73 a tawen a nagserbi iti amin-tiempo a ministerio.

Naipasngay ni Kabsat Schroeder idiay Saginaw, Michigan, E.U.A., idi 1911.a Kas maysa nga ubing, adu ti naammuanna maipapan iti Biblia manipud iti lolana iti ina, a nangipasagepsep kenkuana iti panagayat iti panagbasa iti Sao ni Jehova. Nagadal iti Latin, Aleman, ken kinainheniero elektrikal idiay University of Michigan. Ngem bayat nga immuneg ti panangapresiarna iti Kasuratan, insardengna ti nageskuela tapno agpayunir. Idi 1932, nagbalin a kameng ti pamilia ti Bethel idiay Brooklyn, New York.

Idi 1937 iti edad a 26, nadutokan ni Kabsat Schroeder a mangimaton iti trabaho dagiti Saksi ni Jehova idiay Britania. Gapu iti regtana iti trabaho a panangasaba, adu sadiay ti naparegta a simrek iti amin-tiempo a panagserbi. Ni John E. Barr ti maysa nga agtutubo a nakalangenna idiay Bethel iti London. Kamaudiananna, nagserbida a dua iti adu a tawen kas kameng ti Bagi a Manarawidwid.

Idi panawen ti gubat, natakuatan ti trabaho nga ar-aramiden ni Kabsat Schroeder agpaay kadagiti Saksi ni Jehova. Idi Agosto 1942, isu ket napapanaw idiay Britania. Kalpasan ti makapadanag a panaglayagna iti Atlantico gapu iti gubat, simmangpet idiay Brooklyn idi Setiembre.

Namnamaen idin dagiti adipen ni Jehova nga adda dakkel a trabaho a masapul a maibanag kalpasan ti Gubat Sangalubongan II. Nasdaaw ngem maragsakan ni Kabsat Schroeder idi naawatna ti sumaganad nga annongenna―ti itutulongna a mangsangal iti mapagadalan a kurso iti Watchtower Bible School of Gilead. Sumagmamano a tawen a nagserbi kas instruktor, a tumultulong a mangsanay kadagiti misionero. Dagiti estudiante nga insurona iti Gilead ken kalpasanna iti Kingdom Ministry School addaanda kadagiti nakaay-ayat a pakalaglagipan kadagiti klasena. Pagragsakanna nga iyukuok kadagiti estudiantena ti panagayat kadagiti linlinteg ti Dios ken impaganetgetna ti kinapateg ti panangam-ammo ken Jehova.

Idi 1956, ni Kabsat Schroeder inkasarna ni Charlotte Bowin, ket idi 1958, naipasngay ti anakda a ni Judah Ben. Nagsayaat a Kristiano nga asawa ken ama ni Kabsat Schroeder. Idi 1974, nangrugi a nagserbi iti Bagi a Manarawidwid, ket maapresiar unay dagiti nauneg a pannakaawatna. Isu ket naanus ken napakumbaba a lalaki, ngem kangrunaanna, tarigagayanna nga itan-ok ti naindaklan a nagan ti Dios. Agtalektayo nga inawaten ni Kabsat Schroeder ti nailangitan a gunggonana kas napulotan a Kristiano a talaga a ‘ti pagragsakanna adda iti linteg ni Jehova.’​—Salmo 1:2.

[Footnote]