Report dagiti Manangiwaragawag ti Pagarian

Maysa a Naragsak a Reunion Idiay Brazil

KADAGITI 67 a nasanay idiay Gilead a misionero nga agdama nga agserserbi idiay Brazil, 63 ti nagtataripnong idiay sanga nga opisina ket naguummongda a maipaay iti daytoy a historiko a retrato. Daytoy naragsak a reunion napasamak idi Nobiembre 18, 1986, bayat ti isasarungkar ni A. D. Schroeder, kameng ti Bagi a Manarawidwid dagiti Saksi ni Jehova idiay Brooklyn, Nueva York.

Daytat’ 41 años a nasaksakbay pay​—idi Nobiembre 17, 1945​—a dua a graduado iti umuna a klase ti Watchtower Bible School of Gilead ti nakagteng idiay Brazil. Para iti maysa kadakuada, ni Charles Leathco (makinlikud, a kannigid ti makintengnga), daytoy ti maysa a naisangsangayan a reunion agsipud ta isu ken ni sangaili a Charlotte Schroeder ket agkaeskuelaanda idiay Gilead, ket ni Kabsat Schroeder ti maysa idi kadagiti instruktorda.

Nanipud iti dayta immuna a klase, adda dagupnan a 258 a misionero nga immay ditoy Brazil. Mairaman kadakuada isu dagiti 16 a katutubo a Braziliano. Maysa kadakuada, ni Augusto Machado (makinsango iti kannigid), naammuanna ti kinapudno manipud kadagiti immuna a misionero, napan idiay Gilead ken nagsubli idiay Brazil. Isut’ nagserserbin idiay sanga opisina iti napalabas a 30 años, ket itan isut’ coordinator ti Komite ti Sanga. Nupay adu kadagiti misionero ti saanen nga agserserbi iti misionero a tay-ak, ti nasayaat a trabaho a nagapuananda ti nagtalinaed sadiay. Idi 1945 adda laeng 344 nga agibumbunannag ti Pagarian iti dayta a daga; itan ti Brazil ragragpatennan ti 200,000, a nakaireporten iti kangatuan a bilang a 196,948 nga agibumbunannag idi 1986 a tawen serbisio.

Anian a ragsak para kadagiti Braziliano a misionero, agtutubo ken natataenganen, a malaglagipda amin iti daytoy nagragsak a reunion dagiti nakaskasdaaw a trabaho iti napalabas a 41 años.