“Dagiti Eksperto”—Saan a Kanayon a Mapagpannurayan Dagiti Balakadda
SAPULEM ti sasao a “parenting” (panangpadakkel) ken “advise” (balakad) iti maysa a nalatak a programa iti Internet, ket dagus nga agparang ti nasurok a 26 a milion a reperensia. No maysa a minuto a sapulem ken basaem ti tunggal maysa kadagita, agkabannuagton ti anakmo ken pumanawton iti podermo sakbay a malpasmo nga aramiden dayta.
Idi awan pay dagiti doktor, sikologo ti ubbing, ken ti Internet, pagpabpabalakadan ngay dagiti nagannak? Kaaduanna a kadagiti kakabagian ken kameng ti pamiliada. Sisasagana dagiti inna, amma, ikit, ken uliteg a mangiwanwan, agtagibi ken mangipaay iti pinansial a tulong. Ngem iti adu a pagilian, dandani interamenten a napukaw ti kasta a nasinged a relasion iti uneg ti pamilia. Ngamin, adu a tattao ti pumanaw kadagiti away tapno agnaeddan iti siudad. Kaaduanna a dagiti laeng inna ken amma ti mangsangsango itan kadagiti karit iti panangpadakkel iti annakda.
Awan duadua a daytoy ti maysa a makagapu a nagbiit unay a dimmakkel ti moderno a negosio mainaig iti panangaywan kadagiti ubbing. Ti sabali pay a makagapu ket ti nasaknap a panamati a ti siensia ket makaipaay iti nainsiriban a balakad. Idi arinunos ti maika-19 a siglo, nangrugin a pinati dagiti umili ti America a kabaelan ti siensia a pasayaaten ti tunggal aspeto ti biag ti tao. Apay ketdi koma a saan a karaman dita ti panangpadakkel iti ubbing? Isu nga idi insennaay ti American National Congress of Mothers iti publiko idi 1899 a “saan a makabael dagiti nagannak,” adu nga “eksperto iti siensia” ti dagus a nangidiaya iti tulongda. Inkarida a tulonganda dagiti inna ken amma a marigrigatan a mangpadakkel kadagiti annakda.
Panagpabalakad Dagiti Nagannak Kadagiti Libro
Ngem ania ti nagapuanan dagitoy nga eksperto? Nalalaing kadi itan dagiti nagannak ken manmano laeng kadin a pakaringgoranda ti panangpadakkelda iti annakda no idilig iti napalabas? Saan, sigun iti nabiit pay a surbey idiay Britania. Impalgak dayta nga agarup 35 a porsiento kadagiti nagannak nga ubbing pay ti annakda ti kaskasdi nga agsapsapul iti balakad a mapagpannurayanda. Para iti dadduma, awan ti pagpilianda no di ti panangaramid iti pagarupenda nga umiso.
Iti librona a Raising America: Experts, Parents, and a Century of Advice About Children, sinukimat ni Ann Hulbert ti insurat dagiti eksperto iti panangpadakkel iti annak. Ni Hulbert, nga addaan mismo iti dua nga annak, kinunana a manmano kadagiti natakuatan dagiti eksperto ti naibasar iti napaypayso a siensia. Imbes ketdi, agparang a ti balakadda ket ad-adda a naibasar iti bukodda a kapadasan iti biag imbes a kadagiti impormasion nga ibatad dagiti aktual a kasasaad. No repasuentayo ti naisurat a balakadda, agparang nga adu kadagita ti ubbaw, agsisimparat, ken karkarna no dadduma.
Gapu iti dayta, ania ti kasasaad ita dagiti nagannak? Kinapudnona, adu ti mariro nangruna ta ad-adu itan dagiti balakad, kapanunotan, ken panagsusupiat ngem idi. Nupay kasta, saan nga amin a nagannak ti makarikna nga awan ti pagpaiwanwananda. Adu a nagannak iti intero a lubong ti mabembenepisiaran iti nabayagen a gubuayan iti sirib a talaga a pagtataudan agingga ita ti mapagpannurayan a balakad, kas ipakita ti sumaganad nga artikulo.