1

Agpabalakadkayo

Apay a nasken dayta? No damo nga ubbaen dagiti nagannak ti kappasngay nga anakda, mabalin nga agduduma ti mariknada. “Napalaus ti ragsak ken siddaawko,” kuna ni Brett, maysa nga ama nga agnanaed idiay Britania. “Ngem nariknak met nga adda kakuyogna dayta a nadagsen a responsibilidad ket kasla saanak a sisasagana iti dayta.” Ni Monica nga agnanaed idiay Argentina, kunana: “Madanaganak amangan ta diak maipaay dagiti kasapulan ti anakko. Pinampanunotko no kabaelak ngata a sanayen isuna tapno inton dumakkel ket agbalinto a responsable.”

Maawatanyo kadi no apay a kasta ti ragsak ken danag a marikrikna dagita a nagannak? Awan duadua a ti panangpadakkel iti anak ket maysa kadagiti karigatan ngem makapnek unay, makapaupay ngem makagunggona nga annongen a mabalin a mapadasan ti siasinoman. Kas kinuna ti maysa nga ama, “dimonton maulit a padakkelen ti anakmo, isu a narigaten no agkamalika.” Gapu ta dakkel ti maitulong dagiti nagannak iti salun-at ken kinaragsak dagiti annakda, nalabit a mariknayo a kasapulanyo unay ti mapagtalkan a balakad no kasano ti agbalin a nasaysayaat a nagannak.

Ti karit: Adu ita ti agduduma a balakad iti panangpadakkel kadagiti annak. Iti naglabas, dagiti agdadamo a nagannak nagpaiwanwanda iti ulidan dagiti dadakkelda wenno iti narelihiosuan a patpatienda. Ngem iti adu a pagilian, kimmapuy ti pundasion ti pamilia ken saanen a maal-alagad dagiti pannursuro ti relihion. Kas resultana, adu a nagannak ti agpabpabalakad kadagiti eksperto iti panangpadakkel iti annak. Ti dadduma a balakad dagitoy nga eksperto ket naibasar kadagiti umiso a prinsipio. Ngem adda dagiti balakadda a di epektibo ket di agbayag, mabalin a saanen a praktikal dagita.

Ti solusion: Agpabalakadkayo iti daydiay Persona a kangrunaan a makaammo no kasano a padakkelen dagiti annak​—daydiay Namarsua iti tao, ni Jehova a Dios. (Aramid 17:26-28) Ti Biblia a Saona ket naglaon saan laeng a kadagiti direkta a balakad no di pay ket kadagiti praktikal a pagarigan a makatulong kadakayo nga agbalin a nasaysayaat a nagannak. Inkarina: “Mangipaayakto iti balakad a ti matak situturong kenka.”​—Salmo 32:8.

Ania ti balakad ti Dios kadagiti nagannak tapno makapatanorda kadagiti naragsak nga annak?

[Blurb iti panid 3]

“Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat.”​—Proverbio 3:5