Sursuruanyo Dagiti Annakyo nga Agkomento

MALAGIP ti Mexicana a ni Perla nga idi isu ket ubing pay, tultulongan ni nanangna a mangisagana kadagiti ababa a komento para iti Panagadal iti Pagwanawanan. Adda anak itan ni Perla a lima ti tawenna. Kasano ti panangtulongna iti anakna? “Umuna, masapul nga agsaganaak. Agbirokak iti parapo a maawatan ti anakko, daydiay kabaelanna nga ilawlawag iti bukodna a sasao. Kalpasanna, usigenmi dayta a parapo nga aw-awaganna kas ‘ti parapok.’ Kiddawek nga ilawlawagna dayta babaen ti panangusarna kadagiti gagangay a pagarigan. Kalpasanna, ensayuenmi ti komento iti sumagmamano a daras. Mangusarkami iti maysa a banag a kadakdakkel ti mikropono tapno ammonanto no kasanona nga iggaman dayta bayat ti panagkomentona. Maragsakanak unay ta awan ti uray maysa a gimong a di nakapagkomento wenno dina naitayag ti imana. Kaaduanna, asitganna ti konduktor sakbay a mangrugi ti gimong ket ibagana no ania a parapo ti kayatna a komentuan.”

Maysa a panglakayen ni Jens ken agserserbi iti maysa a grupo a Hindi ti pagsasaona. Adda dua nga annakna a lallaki nga agtawen iti dua ken uppat. No agsaganada a sangapamiliaan para iti gimong, usarenda ti maysa a metodo a nasursuro ni Jens kadagiti dadakkelna. Kunana: “Ikeddengmi no ania a paset ti material ti maawatan dagiti annakmi. Ikagumaanmi nga isalaysay ti sumario ti mapagadalan wenno no ania ti kababagas ti artikulo, kalpasanna iyimtuodmi kadakuada dagiti saludsod a kayatmi a komentuanda iti gimong. Masansan a masdaawkami iti kinanatural dagiti sungbatda. Iyanninaw ti wagas ti panagkomentoda no ania a talaga ti naawatanda. Kas resultana, pudno a pakaidayawan ni Jehova dagiti sungbatda ken personal a mayebkasda ti pammatida.”