Umukuok ken Agpaut a Liday

ITI nabiit pay, kayat a maammuan ti maysa a managsirarak no ania ti epekto ti panaglabas ti tiempo kadagiti agladladingit gapu iti ipupusay dagiti inay-ayatda. Nangipatulod iti salsaludsod kadagiti adu a nagannak a natayan kadagiti annak sumagmamano a tawen sakbayna. Saan a simmungbat ti amin a napatulodan a nagannak. Sigun ken Vladimir, maysa nga ama a pimmusay ti barona lima a tawen ti napalabasen, dina pay la kayat a pagsaritaan ti anakna.a

Gagangayen ti kasta a napaut a panagladingit kadagiti natayan a nagannak. Sangapulo a tawen ti napalabasen, nalmes ti agtawen iti 18 a baro ni William. Kunana: “Nasaem pay laeng kaniak ti ipapatayna, ket diakto malipatan dayta agingga a sibibiagak.” Lima a tawen ti napalabasen, natay ti baro ni Lucy gapu iti kellaat a panagsakitna, ket insuratna: “Iti umuna a sumagmamano nga aldaw, kanayon a pampanunotek, ‘Saan nga agpayso a natay.’ Impagarupko a kasla dakes laeng a tagtagainep dayta ket mabiiten a mariing. Ngem kalpasan ti sumagmamano a tiempo, nabigbigko nga agpayso gayam a saanen nga agsubli. Lima a tawenen a pimmusay ti anakko, ngem makasangitak pay laeng no malagipko, nangruna no agmaymaysaak.”

Apay nga umukuok ken agpaut ti ladingit dagiti nagminatay a nagannak, a kas kada Vladimir, William, ken Lucy? Usigentayo ti sumagmamano a rason.

Apay a Kasta Unay ti Panagladingit?

No mayanak ti maysa a maladaga iti maysa a pamilia, awan kaaspingna ti ragsak dagiti nagannak. Ti laeng panangubba iti bassit nga anakda, panangbuya kenkuana a matmaturog, wenno pannakakita iti nagpintas nga isemna mangyeg iti kasta unay a ragsakda. Dagiti naayat a nagannak ipatpategda dagiti annakda. Sanayenda ida nga agtignay ken agsao a siuumiso ken agbalin a nadayaw. (1 Tesalonica 2:7, 11) Maragsakan dagiti nagannak bayat a dumakdakkel dagiti annak a mangyaplikar kadagitoy a panangsanay, ket ipagpannakkel ken mangnamnamada kadakuada.

Dagiti manangipateg a nagannak sigagaget nga agtrabahoda tapno maipaayda ti kasapulan dagiti annakda. Mabalin a regular a mangilasinda iti kuarta wenno material a sanikua tapno inton agangay, matulonganda dagiti annakda a mangirugi iti bukodda a pamilia. (2 Corinto 12:14) Ti nagadu a panawen, panangikagumaan, kuarta, ken napalalo a panagayatda ket nalawag a pammaneknek a dagiti nagannak padakkelenda dagiti annakda tapno agbiag, saan a tapno matay. Isu a no matay ti maysa nga anak, saan a naturpos ti panangpadakkelda kenkuana, ket matungday ti namnamada agpaay kenkuana. Agpatingga ti panangipariknada iti nabara nga ayat ken panangipategda iti anakda, a kasla nabangenan iti dakkel a pader, ti ipapatay. Awanen ti ipatpategda nga anakda. Napalalo ti ladingit dagiti nagannak ket saan a kaskarina a maikkat.

Patalgedan ti Biblia a nasaem ken agtultuloy ti ladingit dagiti nagminatay a nagannak. Kastoy ti kuna ti Biblia idi a ti patriarka a ni Jacob nadamagna a natay ti anakna a ni Jose: “Rinay-ab ni Jacob dagiti kagayna ket nangikapet iti tinakpil iti padingpadingna ket nagtultuloy a nagleddaang gapu iti anakna iti adu nga aldaw. Ket amin nga annakna a lallaki ken amin nga annakna a babbai timmaktakderda tapno liwliwaenda, ngem nagkitkitakit a paliwliwa ket kunkunana: ‘Ta bumabaakto a sileleddaang iti anakko idiay Sheol [wenno, iti tanem]!’” Adu a tawen kalpasanna, sangitan pay laeng ni Jacob ti anakna, nga impagarupna a natayen. (Genesis 37:34, 35; 42:36-38) Maysa pay a pagarigan iti Biblia isu ti matalek a babai a ni Noemi, a natayan iti dua nga annak a lallaki. Gapu ta nakasasaem ti panaglidayna, kayatna a ti naganna a Noemi, a kaipapananna “Ti Kaay-ayok,” ket masukatan iti Mara, a kaipapananna “Napait.”​—Ruth 1:3-5, 20, 21.

Nupay kasta, saan laeng a bigbigen ti Biblia ti ladingit a mapasaran dagiti nagannak. Ipamatmatna met no kasano a pabilgen ni Jehova dagidiay malidliday. Iti sumaganad nga artikulo, usigentayo dagiti dadduma a pamay-an no kasano a liwliwaen ti Dios dagidiay agladladingit.

[Footnote]