Pananguray iti Aldaw ni Jehova Buyogen ti Panagibtur

“Inayonyo iti pammatiyo . . . ti panagibtur.”​—2 PEDRO 1:5, 6.

1, 2. Ania ti panagibtur, ken apay a masapul dayta dagiti Kristiano?

NAKAAS-ASIDEGEN ti aldaw ni Jehova. (Joel 1:15; Sofonias 1:14) Kas dagiti Kristiano a determinado nga agtultuloy a natarnaw iti Dios, sigagagar nga ur-urayentayo dayta a tiempo inton maalangon ti kinasoberano ni Jehova. Kabayatanna, maipasangotayo iti pananggura, panangumsi, panangidadanes, ken panangpapatay gapu iti pammatitayo. (Mateo 5:10-12; 10:22; Apocalipsis 2:10) Gapuna, masapul ti panagibtur​—ti abilidad a mangdaer iti rigat. Idagadag kadatayo ni apostol Pedro: “Inayonyo iti pammatiyo . . . ti panagibtur.” (2 Pedro 1:5, 6) Masapul nga agibturtayo ta kinuna ni Jesus: “Ti nakapagibtur agingga iti panungpalan isunto ti maisalakan.”​—Mateo 24:13.

² Agsakittayo met, lumdaang, ken mapasarantayo ti dadduma pay a suot. Anian a ragsak ni Satanas no baybay-antayo a kumapuy ti pammatitayo! (Lucas 22:31, 32) Babaen ti tulong ni Jehova, maibturantayo ti nadumaduma a suot. (1 Pedro 5:6-11) Usigenyo ti sumagmamano a pudno a kapadasan a mangpaneknek a kabaelantayo nga urayen ti aldaw ni Jehova buyogen ti panagibtur ken di maisin a pammati.

Nagtultuloyda Nupay Masakitda

3, 4. Mangtedkayo iti pagarigan a mangipakita a makapagserbitayo a simamatalek ken ni Jehova uray no masakittayo.

³ Saannatayo ita a simimilagro a paimbagen ti Dios, ngem pabilgennatayo tapno maibturantayo ti sakit. (Salmo 41:1-3) “Naidalitakon iti wheelchair sipud pay kinaubingko,” kinuna ni Sharon. “Naipasngayak nga addaan iti cerebral palsy isu a saanko a natagiragsak ti kinaubingko.” Ngem naaddaan ni Sharon iti namnama idi maammuanna ti maipapan kenni Jehova ken kadagiti karina nga ipaaynanto ti perpekto a salun-at. Nupay marigatan nga agsao ken magna, masagsagrapna ti rag-o iti Nakristianuan a ministerio. Agarup 15 a tawen ti napalabasen, kinunana: “Mabalin nga agtultuloy a kumapuy ti salun-atko, ngem agtultuloy a nabiag ti panagtalekko kenni Jehova ken ti relasionko kenkuana. Anian a ragsakko ta pasetnak ti ili ni Jehova ket kanayon a maaw-awatko ti tulongna!”

⁴ Indagadag ni apostol Pablo kadagiti Kristiano idiay Tesalonica nga ‘agsaoda iti makaliwliwa kadagiti malmaldaangan a kararua.’ (1 Tesalonica 5:14) Mabalin a pakaigapuan ti panagleddaang dagiti banag a kas iti nakaro a pannakaupay. Idi 1993, insurat ni Sharon: “Gapu ta mariknak nga awan serserbik, . . . tallo a tawen a nagsagabaak iti nakaro a leddaang. . . . Liniwliwa ken binalakadandak dagiti panglakayen. . . . Babaen Ti Pagwanawanan, sidudungngo a sinuruannak ni Jehova maipapan iti kasasaad dagiti agsagsagaba iti nakaro a leddaang. Wen, talaga a maseknan iti ilina ken maawatanna ti riknatayo.” (1 Pedro 5:6, 7) Agingga ita, ni Sharon ket simamatalek nga agserserbi iti Dios bayat nga ur-urayenna ti dakkel nga aldaw ni Jehova.

5. Ania ti pammaneknek a kabaelan dagiti Kristiano nga ibturan ti pannaka-trauma?

⁵ Adda dagiti Kristiano nga agsagsagaba iti trauma gapu kadagiti kapadasanda iti biag. Naimatangan ni Harley ti kinaranggas ti gubat idi Sangalubongan a Gubat II ket masansan a mabatbatibat gapu iti dayta. No matmaturog, iyikkisna: “Agannadka! Kitaem!” Inton makariing, kasta unayen ti ling-etna. Ngem naitultuloyna ti nadiosan a panagbiagna, ket idi agangay, manmanon ken saan unayen a nakaro ti kasta a panagtagtagainepna.

6. Kasano a dinaeran ti maysa a Kristiano dagiti emosional a parikutna?

⁶ Maysa a Kristiano nga agsagsagaba iti bipolar disorder ti marigatan unay a mangasaba iti binalaybalay. Ngem intultuloyna dayta agsipud ta ammona a biag ti kaipapanan dayta para kenkuana ken para kadagiti mangipangag. (1 Timoteo 4:16) No dadduma, igawid ti riknana nga agtimbre iti ridaw, ngem kinunana: “Idi agangay, kabaelakon a kontrolen ti riknak, mapanak iti sumaganad a ridaw, ket padasek manen. Babaen ti kanayon a pannakipasetko iti panangasaba, nataginayonko ti rasonable a naespirituan a salun-atko.” Marigatan met a makigimong, ngem kombinsido daytoy a kabsat a napateg ti pannakitimpuyogna kadagiti kapammatianna. Gapuna, ikagkagumaanna ti makigimong.​—Hebreo 10:24, 25.

7. Nupay mabuteng ti dadduma nga agsao iti publiko wenno makigimong, kasanoda nga ipakpakita ti panagibturda?

⁷ Dadduma a Kristiano ket addaan kadagiti phobia wenno nakaro a panagbuteng iti dadduma a situasion wenno bambanag. Kas pagarigan, mabalin a mabutengda nga agsao iti publiko wenno uray makigimong. Panunotenyo no kasano karigat para kadakuada ti agkomento kadagiti Nakristianuan a gimong wenno ti mangiparang iti pasetda iti Teokratiko nga Eskuelaan ti Panagministro! Nupay kasta, agib-ibturda, ket maparparegtatayo unay iti kaadda ken pannakipasetda.

8. Ania ti nangnangruna nga epektibo iti panangdaer kadagiti emosional a pakarigatan?

⁸ Tapno maibturanna ti emosional a pakarigatan, mabalin a masapul ti maysa a tao ti napapaut a panaginana ken pannaturog. Mabalin a makatulong ti panagpaagas. Ngem nangnangruna nga epektibo ti panagpannurayna iti Dios babaen ti kararag. “Ipalladawmo ti dadagsenmo ken Jehova a mismo, ket isu saranayennakanto,” kuna ti Salmo 55:22. “Saannanto a pulos ipalubos nga agdiwengdiweng daydiay nalinteg.” Nakapatpateg ngarud ti ‘panagtalek ken Jehova buyogen ti isuamin a puso.’​—Proverbio 3:5, 6.

Panangibtur iti Pannakaulila

9-11. (a) Ania ti makatulong kadatayo a mangibtur iti ladingit no matay ti maysa nga ipatpategtayo? (b) Kasano a ti ulidan ni Anna matulongannatayo nga agibtur no maulilatayo?

⁹ Mabalin nga agladingit iti kasta unay ti maysa a pamilia no matay ti patpatgenda. Nagdung-aw ni Abraham gapu iti ipapatay ti ipatpategna nga asawa a ni Sara. (Genesis 23:2) Uray ti perpekto a tao a ni Jesus ket ‘nagarubos dagiti luana’ idi natay ti gayyemna a ni Lazaro. (Juan 11:35) Isu a natural laeng a maladingitanka no matay ti patpatgem. Ngem ammo dagiti Kristiano nga addanto panagungar. (Aramid 24:15) Gapuna, saanda nga “agladingit a kas met iti dadduma nga awanan namnama.”​—1 Tesalonica 4:13.

¹⁰ Kasanotayo a madaeran ti pannakaulilatayo? Nalabit a makatulong ti maysa nga ilustrasion. Manmano nga agladingittayo iti napaut no agbiahe ti maysa a gayyemtayo yantangay namnamaentayo a makitatayo manen inton agsubli. No kasta ti panangmatmattayo iti ipapatay ti maysa a matalek a Kristiano, saantayo unay nga agleddaang agsipud ta sigurado a mapagungarto.​—Eclesiastes 7:1.

¹¹ No naan-anay nga agpannuraytayo iti “Dios ti amin a liwliwa,” maibturantayo ti ipupusay ti patpatgentayo. (2 Corinto 1:3, 4) Makatulong met kadatayo ti panangutob iti inaramid ti balo a ni Anna idi umuna a siglo. Kalpasan ti pito la a tawen a panagdennada iti asawana, isu ket nabalo. Ngem idi agtawen iti 84, mangipapaay pay laeng ni Anna iti sagrado a panagserbi kenni Jehova iti templo. (Lucas 2:36-38) Awan duadua a nakatulong kenkuana ti kasta a nadiosan a panagbiag tapno madaeranna ti leddaang ken pannakabalona. Ti regular a pannakipasettayo kadagiti Nakristianuan nga aktibidad, agraman iti trabaho a panangikasaba iti Pagarian ti makatulong kadatayo nga agibtur no matay ti patpatgentayo.

Panangsango iti Nadumaduma a Suot

12. Ania a suot ti ib-ibturan ti dadduma a Kristiano mainaig iti biag ti pamilia?

¹² Adda dagiti Kristiano a masapul nga ibturanda dagiti suot a nainaig iti biag ti pamilia. Kas pagarigan, no makikamalala ti maysa nga asawa, anian a makadidigra dagiti epektona! Gapu ta mariribukan ken maldaangan ti asawa a naliputan, mabalin a di makaturturog ken dina makontrol ti panagsangitna. Mabalin a marigatan unay a mangaramid iti simple laeng a trabaho isu a makaaramid kadagiti kamali wenno mabalin a maaksidente. Mabalin a di makapangpangan, kumuttong, ken mabalin a maapektaran ti panunotna. Mabalin a marigatan a makipaset uray kadagiti Nakristianuan nga aktibidad. Kasta met, nakaro ti mabalin nga epekto dayta kadagiti annak!

13, 14. (a) Ania ti makaparegta kadakayo manipud iti kararag ni Solomon idi inagurasion ti templo? (b) Apay nga ikararagtayo ti tulong ti nasantuan nga espiritu?

¹³ No mapasarantayo dagiti kasta a suot, ipaay ni Jehova dagiti kasapulantayo a tulong. (Salmo 94:19) Ti Dios ipangpangagna ti karkararag dagiti adipenna kas ipakita ti kararag ni Ari Solomon idi inagurasion ti templo ni Jehova. Inkararag ni Solomon iti Dios: “Uray ania a kararag, uray ania a panagkiddaw iti parabur ti maaramid iti biang ti asinoman a tao wenno ti intero nga ilim nga Israel, agsipud ta ammoda tunggal maysa ti saplit ti bukodna a puso, ket pudno nga ukradenda dagiti dakulapda a maiturong iti daytoy a balay, no kasta sika denggem koma manipud langlangit, ti naipasdek a disso a pagnanaedam, ket mamakawankanto ket agtignayka ket itdem iti tunggal maysa ti maitunos iti amin a daldalanna, agsipud ta ammom ti pusona (ta sika laeng ti makaammo unay iti puso ti amin nga annak ti sangatauan); iti panggep nga agbutengda koma kenka iti amin nga al-aldaw a sibibiagda iti rabaw ti daga nga intedmo kadagidi ammami.”​—1 Ar-ari 8:38-40.

¹⁴ Mabalin a nangnangruna a masapul nga itultuloytayo nga ikararag ti tulong ti nasantuan nga espiritu. (Mateo 7:7-11) Ti bunga ti espiritu ket iramanna dagiti galad a kas iti rag-o ken talna. (Galacia 5:22, 23) Anian a pannakabang-ar no ti nailangitan nga Amatayo sungbatanna dagiti kararagtayo​—mariknatayo ti rag-o imbes a ladingit ken talna imbes a pannakariribuk!

15. Ania dagiti teksto a makatulong a mangkissay kadagiti pakaringgorantayo?

¹⁵ Natural laeng a maringgorantayo no adda dagiti nakaro a rigat a masapul nga ibturantayo. Ngem maksayan ti dadduma iti dayta a pakaringgorantayo no laglagipentayo daytoy a kinuna ni Jesus: “Isardengyo ti maringgoran maipapan kadagiti kararuayo no ania ti kanenyonto wenno no ania ti inumenyonto, wenno maipapan iti bagbagiyo no ania ti ikawesyonto. ... Itultuloyyo, ngarud, a sapulen nga umuna ti pagarian ken ti kinalinteg [ti Dios], ket amin dagitoy sabali pay a bambanag mainayonto kadakayo.” (Mateo 6:25, 33, 34) Idagdagadag kadatayo ni apostol Pedro nga ‘iyallatiwtayo iti Dios ti isuamin a pakaringgorantayo, agsipud ta isu maseknan kadatayo.’ (1 Pedro 5:6, 7) Rumbeng nga ikagumaantayo a risuten ti maysa a parikut. Ngem no naaramidtayon ti amin a pamuspusan, ti makatulong kadatayo ket ti panangikararag iti dayta saan a ti panagdanag. “Iyadanim ken Jehova ti dalanmo, ket agkammatalekka kenkuana, ket isu agtignayto,” inkanta ti salmista.​—Salmo 37:5.

16, 17. (a) Apay a saantayo a naan-anay a maliklikan dagiti pakaringgoran? (b) Ania ti mapasarantayo no iyaplikartayo ti Filipos 4:6, 7?

¹⁶ Insurat ni Pablo: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” (Filipos 4:6, 7) Siempre, kas imperpekto a kaputotan ni Adan, ditay naan-anay a maliklikan dagiti pakaringgoran. (Roma 5:12) Dagiti Heteo nga assawa ni Esau ket ‘gubuayan ti kinapait ti espiritu’ dagiti managbuteng-Dios a nagannakna a da Isaac ken Rebecca. (Genesis 26:34, 35) Gapu iti sakit, naringgoran la ketdi dagiti Kristiano a kas kada Timoteo ken Trofimo. (1 Timoteo 5:23; 2 Timoteo 4:20) Indandanagan ni Pablo dagiti kapammatianna. (2 Corinto 11:28) Ngem kanayon a nakasagana a tumulong ti “Managdengngeg iti kararag” kadagidiay agay-ayat kenkuana.​—Salmo 65:2.

¹⁷ Bayat nga ur-urayentayo ti aldaw ni Jehova, tulongan ken liwliwaennatayo “ti Dios ti talna.” (Filipos 4:9) Ni Jehova ket “naasi ken managparabur,” ‘naimbag ken sisasagana a mamakawan,’ ken “laglagipenna a tapoktayo.” (Exodo 34:6; Salmo 86:5; 103:13, 14) Gapuna, ‘ipakaammotayo koma dagiti dawattayo kenkuana’ tapno magun-odantayo ti “talna ti Dios”​—ti kinakalma a saan a pulos a matukod ti tao.

18. Kas nakuna iti Job 42:5, kasano a posible a ‘makitatayo’ ti Dios?

¹⁸ No masungbatan dagiti kararagtayo, ammotayo nga adda kadatayo ti Dios. Kalpasan nga inibturan ni Job dagiti suot, kinunana: “Iti alimadamad nangngegko ti maipapan kenka [Jehova], ngem ita ti bukodko a mata makitanaka.” (Job 42:5) Babaen ti mata ti pannakaawat, pammati, ken kinamanagyaman, maawatantayo dagiti pannakilangen ti Dios kadatayo ken nalawlawag ti ‘pannakakitatayo’ kenkuana ngem iti napalabas. Anian a talna iti puso ken panunot ti iyeg ti kasta a kinasinged!

19. Ania ti mapasamak no ‘iyallatiwtayo iti Dios ti isuamin a pakaringgorantayo’?

¹⁹ No ‘iyallatiwtayo iti Dios ti isuamin a pakaringgorantayo,’ maibturantayo dagiti suot buyogen ti natalna a panunot a mangsaluad iti puso ken pannakabalintayo nga agpanunot. Iti kaunggan ti piguratibo a pusotayo, saantayo a madukotan, agbuteng, ken madanagan. Saantayo a mariribukan gapu iti pannakariro wenno pakaringgoran.

20, 21. (a) Ti napasamak kenni Esteban ket mangipaay iti ania a pammaneknek iti kinakalmado no maidadanestayo? (b) Mangdakamat kadagiti moderno nga ehemplo ti kinakalmado iti laksid dagiti suot nga ib-ibturanda.

²⁰ Ti adalan a ni Esteban impakitana ti kinakalmado idi ib-ibturanna ti nakaro a pakasuotan ti pammatina. Sakbay ti naudi a panangsaksina, amin dagidiay kameng ti Sanhedrin “nakitada a ti rupana ket kasla rupa ti maysa nga anghel.” (Aramid 6:15) Kalmado ti langana​—kas iti maysa nga anghel, a mensahero ti Dios. Kalpasan nga imbutaktak ni Esteban ti basolda iti ipapatay ni Jesus, dagiti ukom “nasugatan dagiti pusoda ket rinugianda a ngaretngeten dagiti ngipenda kenkuana.” Ni Esteban a “napnuan iti nasantuan nga espiritu, minatmatanna ti langit ket nakitana ti dayag ti Dios ken ni Jesus nga agtaktakder iti makannawan ti Dios.” Napabileg ni Esteban babaen dayta a sirmata ket nagtalinaed a matalek agingga ken patay. (Aramid 7:52-60) Nupay awanen dagiti makitatayo a sirmata, mabalin a maaddaantayo iti inted-Dios a kinakalmado no maidadanestayo.

²¹ Usigenyo ti kananakem ti dadduma a Kristiano a nagsagaba iti panangidadanes dagiti Nazi bayat ti Sangalubongan a Gubat II. Iti panangisalaysayna iti kapadasanna iti korte, kinuna ti maysa kadakuada: “Nasentensiaanak a matay. Nagimdengak, ket kalpasan a naisaok ti ‘Agmatalekka agingga ken patay’ ken ti sumagmamano pay a sasao ni Apotayo, nalpasen ti amin. . . . Ngem diyo pakadanagan dayta itan. Ngamin, addaanak iti kasta a talna, iti kasta a kinakalmado a nalabit diyo mailadawan iti panunotyo!” Kadagiti dadakkelna, kastoy met ti insurat ti maysa nga agtutubo a Kristiano a naitudingen a mapugotan: “Pasado alas dose iti rabiin. Mabalinko pay a balbaliwan ti panunotko. Ah! makariknaakto pay ngata iti ragsak iti daytoy a lubong no tallikudak ti Apotayo? Sigurado a saanen! Ngem ita ipasiguradok kadakayo a siraragsak ken sitatalna a panawak daytoy a lubong.” Awan duadua a supsuportaran ni Jehova dagiti nasungdo nga adipenna.

Makapagibturkayo!

22, 23. Ania ti masiguradoyo bayat nga ur-urayenyo ti aldaw ni Jehova buyogen ti panagibtur?

²² Mabalin a diyo mapasaran ti dadduma a rigat nga inusigtayo. Ngem umiso ti managbuteng-Dios a ni Job idi kinunana: “Ti tao, a nayanak manipud babai, ababa ti biagna ken namelmelan iti pannakariribuk.” (Job 14:1) Nalabit a maysakayo a nagannak a mangikagkagumaan a mangipaay iti naespirituan a panangiwanwan kadagiti annakyo. Masapul nga ibturanda dagiti suot idiay eskuelaan, ngem anian a ragsakyo no sititibker nga agtalinaedda iti dasig ni Jehova ken kadagiti nalinteg a prinsipiona! Posible a mapaspasaranyo dagiti rigat ken sulisog idiay panggedan. Nupay kasta, kabaelanyo nga ibturan dagita ken ti dadduma pay a kasasaad gapu ta ‘ni Jehova inaldaw a bagkatenna ti awit maipaay kadakayo.’​—Salmo 68:19.

²³ Mabalin nga ipagarupyo nga ordinariokayo laeng a tao, ngem laglagipenyo a dinto pulos lipaten ni Jehova ti aramidyo ken ti ayat nga ipakpakitayo maipaay iti nasantuan a naganna. (Hebreo 6:10) Babaen ti tulongna, kabaelanyo nga ibturan dagiti pakasuotan ti pammatiyo. Isu nga iramanyo kadagiti kararag ken planoyo ti panangaramidyo iti pagayatan ti Dios. Iti kasta, makapagtalekkayo iti pamendision ken tulong ti Dios bayat nga ur-urayenyo ti aldaw ni Jehova buyogen ti panagibtur.

Ania ti Sungbatyo?

• Apay a nasken nga agibtur dagiti Kristiano?

• Ania ti makatulong kadatayo nga agibtur no agsakittayo wenno no matay ti patpatgentayo?

• Kasano a makatulong kadatayo ti kararag tapno maibturantayo dagiti pakasuotan?

• Apay a posible ti pananguray iti aldaw ni Jehova buyogen ti panagibtur?

[Ladawan iti panid 29]

Ti panagpannuray kenni Jehova tulongannatayo nga agibtur no maulilatayo

[Ladawan iti panid 31]

No naimpusuan ti panagkararagtayo, maibturantayo dagiti pakasuotan ti pammatitayo