“Agaluadkayo iti Tunggal Kita ti Kinaagum”

“Uray no addaan kinaruay ti maysa a tao ti biagna saan nga agtaud iti bambanag nga ik-ikutanna.”​—LUCAS 12:15.

1, 2. (a) Ania ti mapaliiwyo maipapan kadagiti interes ken kalat dagiti tattao ita? (b) Kasano a mabalin a maimpluensiaandatayo dagiti kasta a kababalin?

KUARTA, sanikua, dayaw, panggedan a nangato ti sueldo, pamilia​—dagitoy ti sumagmamano kadagiti bambanag a matmatan ti kaaduan a tattao kas pangrukodan iti balligi wenno mangipasigurado iti natalged a masakbayan. Agparang a kadagiti nabaknang ken napanglaw a pagilian, nakasentro ti interes ken kalat ti adu a tattao kadagiti material a panagrang-ay ken balligi. Iti sabali a bangir, napartak ti panagbaaw ti interesda kadagiti naespirituan a bambanag, no adda man.

² Kasta a mismo ti impadto ti Biblia. Kunana: “Kadagiti maudi nga aldaw dumtengto dagiti napeggad a tiempo a narigat a pakilangenan. Ta dagiti tattao managayatdanto iti bagbagida, managayat iti kuarta, . . . managayat iti ragragsak imbes a managayat iti Dios, nga addaanda iti langa ti nadiosan a debosion ngem libakenda ti pannakabalin dayta.” (2 Timoteo 3:1-5) Gapu ta dagiti pudno a Kristiano kalangenda dagitoy a tattao iti aldaw ken rabii, kankanayon a maipasangoda iti impluensia a tumulad iti kasta a panagpampanunot ken estilo ti panagbiag. Ania ti makatulong kadatayo a mangsaranget kadagiti panangikagumaan ti lubong a ‘mangsukog kadatayo’?​—Roma 12:2.

3. Ania a balakad ni Jesus ti usigentayo ita?

³ Kas ti “Kangrunaan nga Ahente ken Manangan-anay iti pammatitayo,” nangipaay ni Jesu-Kristo iti nabileg a leksion iti daytoy a banag. (Hebreo 12:2) Naminsan, idi isarsarita ni Jesus kadagiti bunggoy ti sumagmamano a manglawag a kinapudno, maysa a lalaki ti nangsinga kenkuana babaen iti daytoy a kiddaw: “Mannursuro, ibagam iti kabsatko nga ibingayannak iti tawid.” Kas sungbat, siiinget a binalakadan ni Jesus ti lalaki ken ti amin a dumdumngeg. Sibibileg a namakdaar maibusor iti kinaagum ket impaganetgetna dayta a pakdaar babaen iti maysa a mamagpanunot nga ilustrasion. Rumbeng nga ipangagtayo dagiti sinao ni Jesus iti dayta nga okasion ket kitaentayo no kasano a magunggonaantayo babaen ti panangyaplikar iti dayta.​—Lucas 12:13-21.

Di Maiparbeng a Kiddaw

4. Apay a di maiparbeng ti panangsinga ti lalaki kenni Jesus?

⁴ Sakbay a sininga ti lalaki, isarsarita ni Jesus kadagiti adalanna ken kadagiti sabsabali ti maipapan iti panagannad maibusor iti panaginsisingpet, maipapan iti tured a mangibaga a naikaykaysada iti Anak ti tao, ken maipapan iti panangtulong kadakuada ti nasantuan nga espiritu. (Lucas 12:1-12) Awan duadua a napateg dagita a topiko a masapul nga ipapuso dagiti adalan. Ngem kabayatan dayta a makasukisok-panunot a diskurso, kellaat a bimmallaet ti lalaki ket dinawatna a makibiang ni Jesus iti nalabit maysa a riri ti pamiliada mainaig kadagiti material a sanikua. Adda napateg a leksion a masursurotayo iti daytoy a pasamak.

5. Ania ti imparangarang ti kiddaw ti lalaki maipapan iti katataona?

⁵ Sigun iti maysa a reperensia, “masansan a maammuan ti kababalin ti maysa a tao sigun iti pampanunotenna bayat a dumdumngeg iti maysa a narelihiosuan a palawag.” Bayat nga agpalpalawag ni Jesus maipapan kadagiti napateg a naespirituan a bambanag, nalabit a pampanunoten ti lalaki no ania ti panguartaanna. Saan a nadakamat no nainkalintegan ti reklamona mainaig iti tawid. Nalabit kayatna a gundawayan ti autoridad ken reputasion ni Jesus kas maysa a masirib nga ukom a mangtaming kadagiti natauan a parikut. (Isaias 11:3, 4; Mateo 22:16) Aniaman ti rasonna, ipasimudaag ti saludsodna nga iti kaunggan ti pusona, adda problema​—awan panangapresiarna kadagiti naespirituan a bambanag. Saan aya nga umdas a rason daytoy tapno sukimatentayo met ti pusotayo? Kas pagarigan, kadagiti Nakristianuan a gimong, nakalaklaka nga agtawataw ti isiptayo wenno agplanotayo no ania ti aramidentayo kalpasan ti gimong. Nupay kasta, rumbeng nga imdengantayo ti maipalpalawag ken utobentayo no kasano a mayaplikartayo ti impormasion tapno maparang-aytayo ti relasiontayo kenni Jehova a Dios, ti nailangitan nga Amatayo, ken kadagiti padatayo a Kristiano.​—Salmo 22:22; Marcos 4:24.

6. Apay a di pinatgan ni Jesus ti kiddaw ti lalaki?

⁶ Aniaman ti nangtignay iti lalaki a nagkiddaw, saan a pinatgan dayta ni Jesus. Imbes ketdi, kinuna ni Jesus kenkuana: ‘Lalaki, asino ti nangdutok kaniak nga ukom wenno mangapag-apag maipaay kadakayo?’ (Lucas 12:14) Idi imbagana dayta, tuktukoyen ni Jesus ti maysa a banag a pagaammo dagiti tattao, yantangay sigun iti Mosaiko a Linteg, dagiti ukom iti siudad ti nadutokan a mangdesision kadagita a parikut. (Deuteronomio 16:18-20; 21:15-17; Ruth 4:1, 2) Iti sabali a bangir, maseknan ni Jesus kadagiti napatpateg a banag​—ti panangsaksi iti kinapudno maipapan iti Pagarian ken ti panangisuro kadagiti tattao maipapan iti pagayatan ti Dios. (Juan 18:37) Kas panangtulad iti ulidan ni Jesus, saantayo nga agpasinga kadagiti inaldaw a pakaseknan. Imbes ketdi, usarentayo ti tiempo ken pigsatayo a mangikasaba iti naimbag a damag ken ‘agaramid iti ad-adalan kadagiti tattao iti amin a nasion.’​—Mateo 24:14; 28:19.

Agaluadkayo iti Kinaagum

7. Ania ti makasukisok a kapaliiwan ni Jesus?

⁷ Gapu ta mabasa ni Jesus ti kaunggan a panagem ti puso, ammona nga adda mas serioso a parikut idi kiniddaw dayta a lalaki a makibiang ni Jesus iti personal a problemada. Gapuna, imbes a basta pagkedkedanna dayta a kiddaw, sinukisok ni Jesus ti ramut ti problema ket kinunana: “Pagtalinaedenyo a silulukat dagiti matayo ket agaluadkayo iti tunggal kita ti kinaagum, agsipud ta uray no addaan kinaruay ti maysa a tao ti biagna saan nga agtaud iti bambanag nga ik-ikutanna.”​—Lucas 12:15.

8. Ania ti kinaagum, ken ania ti pagbanaganna?

⁸ Ti kinaagum ket saan a basta panangtarigagay iti kuarta wenno dadduma a bambanag, ta adda met ti umiso nga usar ken panggep dagita. Imbes ketdi, dayta ket nagaramugam a panangtarigagay iti kinabaknang wenno sanikua ti sabali a tao. Ramanenna ti di mapmapnek, nasarabusab a panaggartem kadagiti bambanag, nalabit dagiti ik-ikutan ti sabali a tao, tapno laeng magamgam dayta ti maysa uray dina kasapulan wenno uray masaktanna dagiti sabsabali. Ti naagum a tao ipalubosna a ti tarigagayna ti mangdominar iti pampanunot ken tigtignayna agingga a ti tartarigagayanna ti agbalin a diosna. Laglagipenyo a pinagpada ni apostol Pablo ti naagum a tao ken ti managrukbab iti idolo, maysa a di makipagtawid iti Pagarian ti Dios.​—Efeso 5:5; Colosas 3:5.

9. Kadagiti ania a pamay-an a maiparangarang ti kinaagum? Mangted iti sumagmamano a pagarigan.

⁹ Ngem apay ngata a nangballaag ni Jesus maibusor iti “tunggal kita ti kinaagum”? Ngamin, adu a kita ti kinaagum. Ti maudi kadagiti Sangapulo a Bilin sagudayenna ti dadduma kadagitoy: “Dika tarigagayan ti balay ti padam a tao. Dika tarigagayan ti asawa a babai ti padam a tao, wenno uray ti adipenna a lalaki wenno uray ti adipenna a babai wenno uray ti torona wenno uray ti asnona wenno uray aniaman a banag a kukua ti padam a tao.” (Exodo 20:17) Naglaon ti Biblia iti adu a pagarigan dagiti indibidual a nakaaramid iti nadagsen a basol gapu iti nagduduma a kita ti kinaagum. Ni Satanas ti kaunaan a nangtarigagay iti banag nga ik-ikutan ti sabali​—ti dayag, dayaw, ken autoridad a maipaay laeng kenni Jehova. (Apocalipsis 4:11) Tinarigagayan ni Eva ti kalintegan a mangikeddeng para iti bagina. Ti pannakaallilawna iti dayta a banag ti nangirubo iti sangatauan iti basol ken ipapatay. (Genesis 3:4-7) Dagiti demonio ket anghel idi a di napnek iti “nakaisigudan a kasasaadda no di ket pinanawanda ti bukodda nga umiso a lugar a pagnaedan” gapu ta ginamgamda ti banag a saan a maiparbeng kadakuada. (Judas 6; Genesis 6:2) Utobenyo met da Balaam, Acan, Gehazi, ken Judas. Imbes a mapnekda iti kasasaad ti biagda, ti nalabes a pananggartemda kadagiti material a sanikua ti nangituggod kadakuada a mangabuso iti autoridadda, a nagbanag iti pannakadadaelda.

10. Kasano a ‘mapagtalinaedtayo a silulukat dagiti matatayo,’ kas indagadag ni Jesus?

¹⁰ Anian a maitutop nga inruangan ni Jesus ti ballaagna maibusor iti kinaagum babaen ti sasao a “pagtalinaedenyo a silulukat dagiti matayo”! Apay? Nalakatay ngamin a makita a naagum wenno nagaramugam dagiti sabsabali, ngem ditay makita a kastatay met gayam. Impatuldo ni apostol Pablo a “ti ayat iti kuarta isu ti ramut dagiti amin a kita ti makadangran a bambanag.” (1 Timoteo 6:9, 10) Kinuna ni adalan a Santiago a ti di umiso a tarigagay, “inton nayinawen, mangipasngay iti basol.” (Santiago 1:15) Maitunos iti indagadag ni Jesus, masapul a ‘pagtalinaedentayo a silulukat dagiti matatayo,’ a saantay a panunoten a dagiti sabsabali ti pagaplikaran dayta a pakdaar no di ket usigentayo ti mismo a bagitayo no ania a talaga ti nakaisentruan ti pusotayo, tapno ‘makapagaluadtayo iti tunggal kita ti kinaagum.’

Biag nga Addaan Kinaruay

11, 12. (a) Ania ti imballaag ni Jesus maibusor iti kinaagum? (b) Apay a masapul nga ipangagtayo ti ballaag ni Jesus?

¹¹ Adda sabali pay a rason no apay a masapul a liklikantayo ti kinaagum. Imutektekanyo ti simmaruno a kinuna ni Jesus: “Uray no addaan kinaruay ti maysa a tao ti biagna saan nga agtaud iti bambanag nga ik-ikutanna.” (Lucas 12:15) Rumbeng nga utoben daytoy dagiti tattao iti daytoy materialistiko a panawentayo yantangay matmatanda a sa la naragsak ken naballigi ti maysa no nasaliwanwan ti biagna. Ipakita dagiti sasao ni Jesus a ti pudpudno nga addaan panggep ken makapnek a biag ket saan nga agpannuray kadagiti material a sanikua, uray kasano ti kinaruay dagita.

¹² Ngem nalabit a di umanamong dagiti dadduma. Mabalin nga irasonda a dagiti material a sanikua ti mamagbalin iti biag a nanamnam-ay ken makaay-ayo, iti kasta naragragsak. Gapuna, igamerda ti bagida kadagiti kalat a mangted kadakuada iti oportunidad a manggun-od iti amin a material a sanikua ken alikamen a tartarigagayanda. Ipagarupda a daytoy ti mangted kadakuada iti komportable a biag, ngem dayta ti mangipakita a dida natarusan ti punto ni Jesus.

13. Ania ti natimbeng a panangmatmat iti biag ken sansanikua?

¹³ Saan nga ibagbaga ni Jesus nga umiso wenno di umiso ti maaddaan iti kinaruay. Imbes ketdi, ipagpaganetgetna a ti biag ti tao saan nga agtaud “iti bambanag nga ik-ikutanna,” kayatna a sawen, dagiti agdama a sanikuana. Mainaig iti daytoy, ammotayo a tapno agbiag wenno agtultuloytayo nga agbiag, saan a kasapulan nga adu ti ik-ikutantayo. Umdasen nga adda pagtaraon, pagkawes, ken pagtaengantayo. Dagiti nabaknang aglaplapusananda kadagitoy a bambanag ket dagiti nakurapay marigrigatanda nga agbirok kadagita. Nupay kasta, agparehodanto inton manungpal ti biagda​—inton agngudon ti amin. (Eclesiastes 9:5, 6) Gapuna, tapno maaddaan iti panggep ken pateg ti biag, saan a mabalin ken saan a rumbeng nga agpannuray laeng dayta kadagiti bambanag a magun-od wenno ik-ikutan ti maysa. Matarusantayo daytoy a kinapudno apaman nga usigentayo ti biag a tuktukoyen ni Jesus.

14. Ania ti maadaltayo iti sao a nagtaudan ti termino a “biag” a naaramat iti Biblia?

¹⁴ Mainaig iti kinuna ni Jesus a ‘ti biag saan nga agtaud iti bambanag nga ik-ikutan ti maysa,’ ti sao a nausar iti Ebanghelio ni Lucas (Griego, zo·eʹ) para iti “biag” saanna a tuktukoyen ti wagas wenno estilo ti panagbiag no di ket ti biag a mismo.a Ibagbaga ni Jesus a nabaknang man wenno napanglaw, aglaplapusanan man wenno mamirmiraot, saantay a naan-anay a makontrol ti kapaut ti biagtayo wenno saantay pay ketdi a masigurado no sibibiagtayto pay inton bigat. Kinuna ni Jesus iti Sermonna iti Bantay: “Siasino kadakayo nga iti panagbalinna a maringgoran manayonanna iti maysa a kasiko ti kaatiddog ti biagna?” (Mateo 6:27) Nabatad nga ibaga ti Biblia a ni Jehova laeng “ti ubbog ti biag,” ken isu laeng ti makaiburay kadagiti matalek a tattao iti “pudpudno a biag,” wenno “agnanayon a biag,” idiay langit wenno ditoy daga.​—Salmo 36:9; 1 Timoteo 6:12, 19.

15. Apay nga adu ti agtalek kadagiti material a sanikua?

¹⁵ Ipatuldo dagiti sasao ni Jesus no kasano kalaka a matiritir wenno maballikug ti panangmatmat ti tao iti biag. Nabaknang man wenno napanglaw, imperpekto amin a tattao ket maymaysa ti pagtungpalanda. Kinuna ni Moises idi ugma: “Kadakuada met laeng pitopulo a tawen dagiti aldaw ti tawtawenmi; ket no gapu iti naisangsangayan a kinabileg walopuloda a tawen, kaskasdi a ti panagreggetda agbanag laeng iti riribuk ken makapasakit a bambanag; ta sidadaras a lumabas dayta, ket tumayabkamin.” (Salmo 90:10; Job 14:1, 2; 1 Pedro 1:24) Gapuna, dagidiay awanan iti nasayaat a relasion iti Dios masansan a kunaenda a “mangan ken uminumtayo, ta inton bigat mataytayo,” kas dinakamat ni apostol Pablo. (1 Corinto 15:32) Dagiti met dadduma, gapu ta mariknada a ti biag ket ababa ken pagduaduaan, ikagumaanda ti manggun-od kadagiti material a sanikua tapno natalgedda. Ipagarupda ngamin a no ad-adu ti material a sanikuada, nataltalged ti biagda. Gapuna, awan sardayna nga agurnongda iti adu a kinabaknang ken sansanikua.​—Salmo 49:6, 11, 12.

Natalged a Masakbayan

16. Ania ti saan a pagpannurayan ti pudpudno a kaipapanan ti biag?

¹⁶ Mabalin a ti nangatngato nga estandarte ti panagbiag​—aglaplapusanan a taraon, kawes, pagtaengan, ken dadduma pay a pagnam-ayan​—ti mangyeg iti mas komportable a biag wenno nasaysayaat pay ketdi a pannakaaywan ti salun-at a mangpaatiddog iti biag ti maysa a tao. Ngem talaga kadi a naragragsak ken nataltalged ti kasta a biag? Saan a marukod ti pudpudno a pateg ti biag sigun iti kapaut ti biag ti maysa wenno iti kaadu ti material nga ik-ikutan wenno us-usarenna. Impatuldo ni apostol Pablo ti peggad ti nalabes a panagtalek kadagita a bambanag. Insuratna kenni Timoteo: “Ibilinmo kadagidiay babaknang itoy agdama a sistema ti bambanag a saanda koma a napalangguad, ken isadagda ti namnamada, saan nga iti pagduaduaan [“mapukawto,” Ti Baro a Naimbag a Damag Biblia] a kinabaknang, no di ket iti Dios, a sibabaknang a mangipaay kadatayo iti amin a bambanag a pagragsakantayo.”​—1 Timoteo 6:17.

17, 18. (a) Ania dagiti nasayaat nga ulidan mainaig iti material a sanikua ti rumbeng a tuladentayo? (b) Ania a pangngarig ni Jesus ti usigentayo iti sumaganad nga artikulo?

¹⁷ Kinamaag ti panagpannuray kadagiti kinabaknang gapu ta “mapukawto” dagita. Nabaknang ni patriarka a Job, ngem idi saan a ninamnama nga immapay kenkuana ti didigra, saan a nakatulong ti kinabaknangna; kellaat a napukaw dagita. Ti nalagda a relasionna iti Dios ti nangispal kenkuana bayat a limmasat kadagiti amin a suot ken pakarigatanna. (Job 1:1, 3, 20-22) Saan a ti material a kinabaknang ni Abraham ti nanglapped kenkuana a mangawat iti makakarit nga impaannong ni Jehova, ket nagunggonaan babaen ti panagbalinna kas “ama ti maysa a bunggoy dagiti nasion.” (Genesis 12:1, 4; 17:4-6) Maiparbeng a tuladentayo dagitoy ken ti dadduma pay a pagwadan. Ubbing man wenno nataengan, masapul nga usigentayo ti bagitayo tapno makitatayo no ania ti pudpudno a napateg iti biagtayo ken no ania ti nakaisadagan ti namnamatayo.​—Efeso 5:10; Filipos 1:10.

¹⁸ Pudno a nakapatpateg ken makaisuro ti kinuna ni Jesus maipapan iti kinaagum ken iti umiso a panangmatmat iti biag. Ngem adda pay instruksion a pampanunoten ni Jesus, isu nga insalaysayna ti maysa a mamagpanunot a pangngarig wenno ilustrasion, maipapan iti maysa a di nainkalintegan a baknang. Ania ti aplikasion dayta nga ilustrasion iti biagtayo ita, ken ania ti masursurotayo iti dayta? Sungbatan dayta ti sumaganad nga artikulo.

[Footnote]

Ania ti Sungbatyo?

• Ania ti masursurotayo idi saan a pinatgan ni Jesus ti kiddaw ti lalaki?

• Apay a liklikantayo ti kinaagum, ken kasanotayo a maaramid dayta?

• Apay a saan nga agpannuray ti biag kadagiti material a sanikua?

• Ania ti mamagbalin iti biag a pudpudno a naragsak ken natalged?

[Ladawan iti panid 23]

Apay a di pinatgan ni Jesus ti kiddaw ti lalaki?

[Ladawan iti panid 23]

Ti kinaagum ket mangyeg kadagiti didigra

[Dagiti Ladawan iti panid 25]

Kasano nga imparangarang ni Abraham ti umiso a panangmatmat kadagiti material a sanikua?