Salsaludsod Dagiti Agbasbasa

Ania ti kayat a sawen ni Jesus idi kinunana a “masirib” ti klase matalek nga adipenna?

Inyimtuod ni Jesus: “Siasino a pudpudno ti matalek ken masirib nga adipen a dinutokan ni apona a mangaywan kadagiti katulongna, tapno ipaayna kadakuada ti taraonda iti umiso a tiempo?” (Mateo 24:45) Ti “adipen” a mangipapaay iti naespirituan a ‘taraon’ isu ti kongregasion dagiti Kristiano a napulotan iti espiritu. Apay nga inawagan ida ni Jesus a masirib?a

Maibatay kadagiti mismo a sursurona, matarusantayo a naimbag no ania ti kayat sawen ni Jesus idi inusarna ti sao a “masirib.” Kas pagarigan, idi tinukoyna ti maipapan iti “matalek ken masirib nga adipen,” impaay ni Jesus ti pangngarig mainaig iti sangapulo a birhen a mangur-uray iti idadateng ti nobio. Dagiti birhen ipalagipda kadatayo dagiti napulotan a Kristiano sakbay ti 1914 a sigagagar a mangur-uray iti idadateng ti natan-ok a Nobio, ni Jesu-Kristo. Kadagiti sangapulo a birhen, saan nga umdas ti lana ti lima kadakuada idi dimteng ti nobio isu a dida nadar-ayan ti padaya ti kasar. Ngem napaneknekan a masirib ti sabali pay a lima. Adda umdas a lanada isu a saan a naiddep ti silawda ket nakastrekda iti padaya idi dimteng ti nobio.​—Mateo 25:10-12.

Idi nagturay ni Jesus iti Pagarianna idi 1914, adu a napulotan a Kristiano ti nangnamnama a dagus a makipagturayda kenkuana idiay langit. Ngem adu pay ti trabahoda ditoy daga ket dadduma ti saan a nakasagana iti dayta. Kas kadagiti maag a birhen, saanda a pinabileg a nasaksakbay ti espiritualidadda isu a dida nakasagana a mangisilnag iti lawagda. Nupay kasta, adu ti nagtignay a siaannad​—buyogen ti sirib ken panagsakbay​—ket napabilegda iti naespirituan. Idi naammuanda nga adu pay ti trabaho, maragsakanda a mangiringpas iti dayta. Iti kasta, napaneknekanda a “matalek ken masirib nga adipen.”

Usigentayo met ti panangusar ni Jesus iti sao a “masirib” iti Mateo 7:24. Kinuna ni Jesus: “Tunggal maysa a dumngeg kadagitoy a sasaok ket aramidenna ida mayaspingto iti masirib a lalaki, a binangonna ti balayna iti rabaw ti dakkel a bato.” Ti masirib a lalaki imbangonna ti balayna iti rabaw ti dakkel a bato kas panagsagana iti posible a dumteng a bagyo. Iti kasumbangirna, ti maag a lalaki nagbangon iti kadaratan ket napukawna ti balayna. Gapuna, ti maysa a masirib a pasurot ni Jesus makitana a nasaksakbay ti dakes a pagbanagan ti panangsurot iti sirib ti tao. Gapu ta addaan iti pannakaawat ken nasayaat a pangngeddeng, sititibker nga ibatayna ti pammati, tigtignay, ken pannursurona kadagiti insuro ni Jesus. Kasta met ti panagtignay dagiti “matalek ken masirib nga adipen.”

Imutektekanyo met ti pannakausar ti sao a naipatarus a “masirib” iti adu a bersion ti Hebreo a Kasuratan. Kas pagarigan, ni Faraon dinutokanna ni Jose a mangimaton kadagiti abasto a taraon idiay Egipto. Paset daytoy ti urnos ni Jehova a mangtaraon iti ilina. Apay a ni Jose ti napili? Kinuna kenkuana ni Faraon: “Awan ti asinoman a masirib ken nasaririt a kas kenka.” (Genesis 41:33-39; 45:5) Umasping iti dayta, ti Biblia tinukoyna ni Abigail kas “nasayaat ti sariritna [wenno masirib].” Pinakan ni Abigail ti pinulotan ni Jehova a ni David ken ti buyotna. (1 Samuel 25:3, 11, 18) Maibilang a masirib da Jose ken Abigail gapu ta naawatanda ti pagayatan ti Dios ken nagtignayda buyogen ti panagsakbay ken nasayaat a pangngeddeng.

Gapuna, idi tinukoy ni Jesus dagiti matalek nga adipen kas masirib, impamatmatna a dagiti iladladawan dayta nga adipen ket mangiparparangarang iti pannakaawat, panagsakbay, ken nasayaat a pangngeddeng gapu ta ibatayda ti pammati, tigtignay, ken pannursuroda iti kinapudno a Sao ti Dios.

[Footnote]