Salsaludsod Dagiti Agbasbasa

Umiso kadi ti inaramid ni Jacob a panagpammarangna kas ni Esau, sigun iti Genesis 27:18, 19?

Mabalin a kabesadoyo daytoy a salaysay. Idi lakayen ni Isaac, imbilinna ken Esau a manganup iti ugsa: “Bay-am a manganak, tapno ti kararuak bendisionannaka koma sakbay a matayak.” Idi nangngeg dayta ni Rebecca, nangisagana iti naimas a putahe sa binilinna ni Jacob: “Ipanmonto [ti putahe] ken amam ket kanennanto, tapno bendisionannaka koma sakbay ti ipapatayna.” Kalpasanna, ni Jacob, a nakakawes iti pagan-anay ni Esau ken naarpawan ti tengnged ken imana kadagiti kudil ti urbon a kalding, impanna ken ni amana ti naimas a putahe. Idi insaludsod ni Isaac, “Siasinoka, anakko?” Simmungbat ni Jacob: “Siak ni Esau nga inaunam.” Namati ni Isaac ket binendisionanna.​—Genesis 27:1-29.

Saan a detalyado nga inlawlawag ti Biblia no apay a kasta ti inaramid da Rebecca ken Jacob, ngem ipasimudaagna a saan a napakpakadaan dayta a pasamak. Laglagipentayo a di ikalkalintegan wenno konkondenaren ti Sao ti Dios ti inaramid da Rebecca ken Jacob. Ngarud, saan a mabalin a pagibatayan daytoy iti panagulbod ken panangallilaw. Ngem mangted ti Biblia iti impormasion maipapan iti dayta a pasamak.

Umuna, nalawag nga ipakita ti Biblia a maikari ni Jacob iti pamendision ni amana; banag a saan a pakaikarian ni Esau. Sakbayna, ginatang ni Jacob ti kalintegan ti inauna manipud iti awan panangapresiarna a kasinginna, a nangilako iti dayta kas kasukat ti sangamalukong a lentehas gapu iti bisinna. “Inumsi ni Esau ti kalintegan iti pannakayanak.” (Genesis 25:29-34) Isu nga idi immasideg ken amana, kiniddaw ni Jacob ti pamendision a pakaikarianna.

Maikadua, idi naammuan ni Isaac a ni Jacob ti binendisionanna, saanna nga imbabawi dayta. Nalabit malagipna ti imbaga idi ni Jehova kenni Rebecca sakbay a maipasngay dagiti singin: “Ti laklakay agserbinto iti ub-ubing.” (Genesis 25:23) Makapainteres met ta binendisionanna pay ni Jacob idi agrubbuat a mapan idiay Haran.​—Genesis 28:1-4.

Kamaudiananna, laglagipentayo nga ammo ken maseknan ni Jehova kadagita a mapaspasamak. Dagiti bendision nga inted ni Isaac ket maitunos iti inkari ti Dios kenni Abraham. (Genesis 12:2, 3) Linapdan koma ti Dios ti pannakabendision ni Jacob no saan a maitunos dayta iti pagayatanna. Imbes ketdi, pinasingkedan ni Jehova dayta a banag ken Jacob, idi kinunana: “Babaen ti bin-im amin a pampamilia iti daga pudno unay a bendisionandanto ti bagbagida.”​—Genesis 28:10-15.