Agrag-otayo Gapu iti Panagballigina a Kadua ti Kordero
ITI maysa a suratna idi 1971, dinakamat ni Kabsat Carey W. Barber ti maipapan iti umuna a 50 a tawen ti panagserbina iti pudno a Dios. Kinunana: “Naisangsangayan ti adu a tawen a panagserbik kenni Jehova. Ti pannakaitimpuyogko iti ilina; ti pannakasalaknibko manipud kadagiti managdakdakes iti lubong ni Satanas; ti namnamak nga agballigi a kadua ti Kordero a ni Jesu-Kristo; ken ti pammatalged ti ayat ni Jehova—dagitoy amin ti mangmangted iti nagpaiduma a talna ken pudno a pannakapnek a mangsalsaluad iti pusok ken sigurado a mangipanamnama iti panagballigik kamaudiananna.”
Kalpasan ti innem a tawen, ni Kabsat Barber, a maysa a Kristiano a napulotan iti espiritu, ket nangrugi nga agserbi kas kameng ti Bagi a Manarawidwid dagiti Saksi ni Jehova. Kabayatan dayta nga akemna iti simmaganad a 30 a tawen, intultuloyna nga inuray ti ‘panagballigina a kadua ti Kordero.’ Naragpatna dayta babaen ti panagmatalekna agingga iti ipapatayna idi Domingo, Abril 8, 2007 iti edad a 101.—1 Corinto 15:57.
Naipasngay ni Kabsat Barber idiay England idi 1905 ken nabautisaran idiay Winnipeg, Canada, idi 1921. Dua a tawen kalpasanna, kaduana ti kasinginna a ni Norman nga immakar idiay Brooklyn, New York, tapno tumulongda iti maysa a baro a proyekto. Iti dayta a tiempo, dandani mangrugin ti organisasion ni Jehova nga agaramid kadagiti bukodda a libro a mausar a pangisaknap iti naimbag a damag ti Pagarian “iti intero a mapagnaedan a daga.” (Mateo 24:14) Ti maysa kadagiti damo a naipaannong ken ni Kabsat Barber ket ti panagtrabahona iti bassit a pagimprentaan. Karaman kadagiti nayimprenta ket dagiti ababa nga impormasion para kadagiti darum a naidatag iti Korte Suprema ti Estados Unidos. Idi agangay, nagtrabaho ni Kabsat Barber iti Service Department, a mangas-asikaso kadagiti bambanag a mainaig iti kongregasion ken iti trabaho a panangasaba iti intero a pagilian.
Gapu iti dayta a kapadasanna, nagbalin a kualipikado unay ni Kabsat Barber kas agdaldaliasat a ministro, nga agbisita kadagiti asamblea ken kongregasion iti intero a makinlaud a paset ti Estados Unidos. Sigun kenkuana, pagay-ayatna unay ti mangasaba iti tay-ak. Gapu kadagita nga annongenna, adu a kakabsat ti nakalangenna. Naregta a mangasaba ken alisto nga agpanunot ni Kabsat Barber, ket nagdakkel ti naitulongna dayta kenkuana idi tinabunuanna ti maika-26 a klase ti Watchtower Bible School of Gilead. Bayat ti panageskuelana, naam-ammona ti kaeskuelaanna a ni Sydney Lee Brewer a taga-Canada. Nagkasarda kalpasan a nagraduarda, ket nag-honeymoon-da iti biaheda nga agturong idiay Chicago, Illinois tapno agserbida kadagiti kongregasion sadiay. Ni Sister Barber ket nagbalin a nakapatpateg a katakunaynay ken naynay a gubuayan iti tulong kenni lakayna bayat ti duapulo a tawen a panagkaduada iti trabaho a panagdaliasat.
Dagiti palawag ken nabiag a komento ni Kabsat Barber ket saan la ketdi a malipatan dagidiay makaam-ammo kenkuana ken dagiti nakalkalangenna bayat ti pinulpullo a tawen a panagserbina kas manangaywan iti distrito ken sirkito wenno bayat ti 30 a tawen a panagtrabaho ken panagdaliasatna kas kameng ti Bagi a Manarawidwid. Talaga nga adu ti panggapuantayo nga agrag-o gapu iti ‘panagballigina a kadua ti Kordero.’