Panangmatmat iti Bambanag Sigun iti Panangmatmat ti Dios

IDIAY New York, E.U.A., nabara ken naraniag nga aldaw ti Setiembre 14, 2002. Iti dayta nga aldaw, 6,521 a tattao a naggapu iti nadumaduma a pagilian ti naguummong idiay Patterson Educational Center ken iti dua a sabali pay a pasilidad dagiti Saksi ni Jehova iti rehion. Naguummong dagitoy tapno imatanganda ti panagturpos ti maika-113 a klase ti Watchtower Bible School of Gilead. Naggapu dagiti estudiante iti 14 a pagilian ken nagsaganada iti naglabas a lima a bulan tapno agserbida kas misionero iti 19 a pagilian a nakaibaonanda.

Nagserbi kas tserman ti programa ni Carey Barber, nga agtawen iti 98 ken miembro ti Bagi a Manarawidwid dagiti Saksi ni Jehova. Inturongna ti atension iti nganngani 60 a tawenen a kaadda ti Gilead School, a nangsanay iti rinibribu a nagbalin a misionero. Kinuna ni Kabsat Barber: “Saan a nalabes ti panangibaga a nakasaysayaat unay ti nagbanagan ti kanayonan a pannakasanayda. Literal a ginasgasut a ribu a naemma a tattao iti intero a daga ti nangidedikar iti biagda ken ni Jehova ken nangawat iti pudno a panagdayaw ken mangipapaay iti sagrado a panagserbi gapu iti panangtulong kadakuada dagiti nasanay a misionero.”

Sakbay a nageskuelada iti Gilead, adu kadagiti estudiante ti nangipakita iti interes a mangparang-ay iti ministerioda. Maysa nga agassawa ti makatawen a nagadal iti Mandarin tapno makasabaanda dagiti adu a Tsino iti teritoriada idiay Canada. Adda met agassawa nga inadalda a bukbukod ti pagsasao nga Albaniano ket idi agangay immakarda idiay Albania tapno matulonganda dagiti umad-adu nga interesado iti Biblia. Dagiti dadduma a nagadal iti Gilead ket naggapu idiay Hungary, Guatemala, ken Dominican Republic, pagpagilian nga immakaranda tapno agserbida iti lugar a dakdakkel ti pakasapulan kadagiti mannursuro iti Sao ti Dios.

Ita, sakbay a mapanda kadagiti teritoriada idiay Africa, Makindaya a Europa, Makintengnga ken Makin-abagatan nga America, ken iti Adayo a Daya, naparegta dagiti amin a nagturpos nga estudiante a dida liplipatan ti Dios iti amin nga aramidenda.

Matmatan ti Bambanag Sigun iti Panangmatmat ti Dios

Kalpasan ti panglukat a sasaona, inyam-ammo ni Kabsat Barber ni Maxwell Lloyd, miembro ti Branch Committee ti Estados Unidos. Intampokna ti tema a “Matmatanyo ti Amin a Bambanag Sigun iti Panangmatmat ti Dios.” Dinakamat ni Kabsat Lloyd ti ulidan da David ken ni Jesus nga Anak ti Dios. (1 Samuel 24:6; 26:11; Lucas 22:42) Kalpasan nga impalagipna kadagiti estudiante a ti lima a bulan a panangadalda iti Biblia ti nangsanay kadakuada a mangmatmat iti bambanag sigun iti panangmatmat ti Dios, inyimtuodna: “No iyadalanyo iti Biblia dagiti tattao iti baro a teritoriayo, tulonganyo kadi ida a mangmatmat iti bambanag sigun iti panangmatmat ti Dios?” Ken no maipapan iti panangbalakad iti sabsabali, imbalakadna kadagiti estudiante: “Diyo ibaga, ‘Iti panangmatmatko, panagkunak . . .’ Imbes ketdi, tulonganyo ida a mangtarus iti panangmatmat ti Dios. No kasta ti pamay-anyo, agbalinkayo a pudno a bendision kadagiti makalangenyo iti teritoriayo.”

Simmaruno iti programa ni Gerrit Lösch, miembro ti Bagi a Manarawidwid. Iti panangiparangna iti tema nga “Addaak Kenka,” dinakamatna ti adu a gundaway idi kinuna ni Jehova kadagiti matalek nga adipenna, “Addaak kenka.” (Genesis 26:23, 24; 28:15; Josue 1:5; Jeremias 1:7, 8) Iti kaaldawantayo, maaddaantayo iti kasta a kompiansa ken ni Jehova no agtalinaedtayo a matalek. Impaganetget ni Kabsat Lösch: “Madanagankayo kadi di la ket ta awan ti masarakanyo a mayadalan iti Biblia? Laglagipenyo, kinuna ni Jehova, ‘Addaak kenka.’ Madanagankayo kadi di la ket ta awan ti umdas a material a kasapulanyo? Kinuna ni Jehova: ‘Saankanto a pulos panawan ket saankanto a pulos a baybay-an.’” (Hebreo 13:5) Inngudo ni Kabsat Lösch ti palawagna babaen ti panangipalagipna kadagiti estudiante nga inkari ni Jesus ti kaaddana kadagiti matalek a pasurotna iti trabaho a panagaramid kadagiti adalan.​—Mateo 28:20.

“Masarakanyo Kadi ti Kinatalgedyo Kadagiti Arig-apuy a Pakasuotan?” Dayta ti tema nga impalawag ti instruktor ti Gilead a ni Lawrence Bowen. Kinunana a gapu kadagiti isyu a rimsua idiay Eden, maipasango kadagiti pakarigatan ken, no dadduma, kadagiti arig-apuy a pakasuotan, amin dagidiay agtarigagay a mangipaay iti naipamaysa a debosion ken ni Jehova. Pinaregtana dagiti nagturpos nga estudiante a tuladenda ni Jesus, a nakasarak iti pudno a kinatalged babaen ti naan-anay a panagpannuray ken ni Jehova ken panangsango kadagiti arig-apuy a pakasuotan nga impalubos ni Jehova tapno maan-anay ti panagtulnog ti Anakna. (Hebreo 5:8, 9) Maidilig ni Jehova iti mananggugor iti balitok nga agusar iti umiso laeng a pudot tapno maikkat dagiti rugit. Siempre, dakdakkel a kinatalged ti ipaay ti pammati a nasubok kadagiti arig-apuy a pakasuotan ngem iti napasudi a balitok. Apay? “Agsipud ta ti napasudi a pammati madaeranna ti aniaman a pakarigatan,” kinuna ni Kabsat Bowen, “ken tulongannatayo nga agandur agingga iti ‘panungpalan.’”​—Mateo 24:13.

Sabali pay nga instruktor ti Gilead, ni Mark Noumair, ti nangyimtuod: “Agbalinkayo Kadi a Nakaay-ayat?” Naipamaysa ti temana iti sasao iti 1 Samuel 2:26, a nangdeskribir ken Samuel kas “pagay-ayat agpadpada iti panangmatmat ni Jehova ken panangmatmat dagiti tattao.” Kalpasan ti panangilawlawagna iti ulidan ni Samuel, kinuna ni Kabsat Noumair, a nagserbi kas misionero idiay Africa iti nasurok a maysa a dekada: “Mabalinyo met ti agbalin a nakaay-ayat iti panangmatmat ti Dios babaen ti sisusungdo a panangitultuloyyo iti trabaho nga impabaklay kadakayo ti Dios. Inikkannakayo iti nagpateg nga annongen kas misionero.” Kalpasanna, pinaregta ni Kabsat Noumair ti agturpos a klase a matmatanda kas sagrado dagiti annongen nga intalek ti Dios kadakuada ken tuladenda ti panagpampanunot ti Dios iti panangitungpal kadagiti annongenda.

Bayat ti panageskuelada iti Gilead, adu ti gundaway dagiti estudiante kadagiti ngudo ti lawas a mangiranud kadagiti tattao iti “natan-ok a bambanag ti Dios” a nailanad iti Biblia. (Aramid 2:11) Kinapudnona, naipakaammoda dagitoy a banag iti sangapulo nga agduduma a lenguahe. Ni Wallace Liverance, sabali pay nga instruktor ti Gilead, ininterbiuna ti maysa a grupo dagiti estudiante a nangisalaysay kadagiti kapadasanda mainaig iti tema a “‘Dagiti Natan-ok a Bambanag ti Dios’ Gutugotenna Dagiti Tattao nga Agtignay.” Kinunana: “Ti espiritu tinignayna dagiti tattao nga adda iti makinngato a siled idi Pentecostes nga agsao maipapan ‘kadagiti natan-ok a bambanag ti Dios.’ Dayta met laeng nga espiritu agtigtignay ita kadagiti amin a matalek nga adipen ti Dios.” Nagutugot pay ketdi dagiti dadduma nga agadal kadagiti sabali a lenguahe tapno makasabaanda ti ad-adu pay a tattao.

Praktikal a Balakad Maipapan iti Panangmatmat iti Bambanag Sigun iti Panangmatmat ti Dios

Kalpasan dagiti panglukat a palawag, naginterbiu da Gary Breaux ken William Young, miembro ti sanga nga opisina ti Estados Unidos. Pinagsaludsodanda dagiti kameng ti komite ti nagduduma a sanga nga opisina kadagiti pagilian a pagserserbian ita dagiti misionero agraman ti maysa a pagassawaan nga 41 a tawenen nga agserserbi kas misionero. Adda nagkuna iti kastoy: “Nabaybayag a makapagtalinaed dagidiay di mangpampanunot iti bukodda a pagnam-ayan. Naipamaysa ti panunotda iti rason a naibaonda kas misionero. Ammoda nga immayda tapno ikasaba ti naimbag a damag ken tapno tulongan dagiti tattao a mangammo ken ni Jehova.”

Ni David Splane, maysa pay a miembro ti Bagi a Manarawidwid, inngudona ti programa babaen ti palawag a napauluan “Saankayo a Mapan iti Adayo!” Ania ti kayatna a sawen, idinto ta naibaon itan dagiti 46 a nagturpos kadagiti nadumaduma a pagilian? Inlawlawagna: “Sadinoman ti ayanyo ditoy daga, kanayon nga addakayo iti balay ti Dios no la ket ta matalekkayo.” Wen, sadinoman ti ayanda, agserserbi dagiti amin a matalek a Kristiano iti maysa a paset ti naindaklan a naespirituan a templo, wenno balay, ti Dios a naibangon idi nabautisaran ni Jesus idi umuna a siglo. (Hebreo 9:9) Anian a makaliwliwa a maammuan dagidiay timmabuno nga asideg ni Jehova iti amin a matalek nga adipenna ditoy daga! No kasano nga interesado ni Jehova ken ni Jesus idi adda ditoy daga, interesado met kadatayo amin ken iti panagserbitayo Kenkuana, sadinoman ti ayantayo. Isu a no iti panagdayaw, saantayo a pulos nga adayo iti maysa ken maysa ken kada Jehova ken Jesus.

Kalpasan ti pannakaibasa dagiti kablaaw a naggapu iti nagduduma a pagilian, pannakaipakaammo ti pakaibaonan dagiti nagturpos, ken pannakaibasa ti surat ti klase a nangyebkas iti apresasion iti panagsanayda iti Gilead, inngudo ti tserman ti programa babaen ti panangparegtana kadagiti baro a misionero nga itultuloyda ti nagsayaat a trabahoda ken pagragsakanda ti agserbi ken ni Jehova.​—Filipos 3:1.

[Kahon iti panid 23]

ESTADISTIKA TI KLASE

Bilang dagiti pagilian a nairepresentar: 14

Bilang dagiti pagilian a nakaibaonanda: 19

Bilang dagiti estudiante: 46

Promedio nga edad: 35.0

Promedio a tawen iti kinapudno: 17.2

Promedio a tawen iti amin-tiempo a ministerio: 13.7

[Ladawan iti panid 24]

Ti Maika-113 a Nagturpos a Klase ti Watchtower Bible School of Gilead

Iti listaan ditoy baba, nanumeruan dagiti intar manipud sango nga agpalikud, ken nailista dagiti nagan manipud kannigid nga agpakannawan iti kada intar.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.