Makagunggona Kadi ti Biagmo?
AGTARTRABAHO ni Kenny iti maysa a narang-ay a kompania. Addaan met iti nakanginngina a kotse ken nakapimpintas a pagtaengan iti lugar dagiti babaknang iti maysa a dakkel a siudad. Kas nalaing nga skydiver, kaay-ayona ti tumpuak manipud iti tangatang a rinibu a metro ti kangatona. Nagbalin kadi a makapnek ti biagna gapu kadagita? Sigun iti The Wall Street Journal, kinunana: “Agtawenakon iti 45, ngem ti biagko ket awanan iti makapnek a direksion . . . Awan panggepna ti biagko.”
Inkagumaan ni Elyn ti agbalin a nalaing nga ice skater. Nagbalin a kampeon. Naragpatna ti kinalatak nga inar-arapaapna. Nupay kasta, kastoy ti insennaayna: “Ngem apay a saanak latta a naragsak? Nakalidlidayak. Bumaketakton ket nupay nabaknangak, awan kaes-eskanna ti biag no kastoy laeng ti panggepna.”
Gapu iti kinalaingna nga agpinta, impamaysa ni Hideo ti biagna iti dayta a propesionna. Saanna nga inlako dagiti obrana agsipud ta impagarupna a dayta ti mangipababa kadagiti prinsipio ken pagalagadanna kas maysa a pintor. Idi dandanin matay iti edadna a 98, indonarna iti museo ti kaaduan kadagiti obrana. Impamaysana ti biagna iti kalat a nainaig iti arte. Ngem kaskasdi a saan a naragsak, agsipud ta naamirisna nga asideg idin a matay ngem saanna pay laeng a naperpekto dagiti obrana.
Adda tattao a mangbusbusbos iti nagadu a tiempo ken kuartada iti panangtulongda iti sabsabali. Alaentayo a pagarigan ti maysa nga administrador iti industria ti pelikula idiay Hollywood. Kas maysa a bise presidente ti maysa kadagiti kadakkelan a kompania nga agar-aramid iti pelikula idiay Estados Unidos, kanayon a makalangenna dagiti artista ken agnanaed iti eksklusibo a lugar dagiti babaknang. Idi nagbakasion idiay Cambodia, adda ubing a babai a nagpalimos kenkuana bayat ti pannanganna iti maysa a restawran idiay Phnom Penh. Inikkanna iti maysa a doliar ken soft drink. Naragsakan ti ubing. Ngem iti simmaganad a rabii, adda manen sadiay nga agpalpalimos. Naamiris daytoy nga administrador a dakkel a tulong ti nasken nga ipaayna.
Makatawen kalpasanna, inkeddengna a balbaliwan ti karerana—isardengnan ti trabahona ket tumulong laengen kadagiti nakurapay idiay Cambodia. Nangipasdek iti maysa nga eskuelaan nga addaan iti dormitorio ken panganan. Ngem kaskasdi nga agkakanat ti marikriknana—maragsakan ken mapnek iti maar-aramidanna ngem naliday ken maup-upay gapu iti agtutupatop a parikut a nasken a risutenna.
Impagarup dagitoy uppat a nadakamattayo nga ammoda no ania ti rumbeng a panggep ti biagda. Ngem kaskasdi a nalidayda idi naragpatda ti kalat nga inkagumaanda a tun-oyen. Komustaka ngay met? Ania dagiti kalatmo iti biag? Ania ti kapatgan iti biagmo? Siguradom kadi a dimonto pagbabawyan ti pangus-usaram ita iti biagmo?