Posible ti Makagunggona a Biag!

ADU a tattao ti agbibiag a ti kangrunaan a panggepda ket gumun-od iti kuarta ken kadagiti magatang dayta. Adda met dagidiay agbibiag a ti kalatda ket agbalin a nalatak iti lubong. Ti met dadduma kayatda nga aramiden a perpekto dagiti artistiko a paglainganda. Ken adda met dagidiay agbibiag a ti kangrunaan a panggepda ket tumulong iti sabsabali. Ngem adu ti saan a makaammo no ania ti panggep ti biag wenno ti kaaddada.

Komustaka ngay met? Inut-utobmo kadin no apay a sibibiagka? Apay a dimo usigen ti sumagmamano a raragpaten dagiti tattao tapno maamirismo no talaga met laeng a mangyeg dagita iti kinaragsak ken pannakapnek? Kasanoka a maaddaan iti makagunggona a biag?

Adda met Pateg ti Kuarta ken Panagragragsak

Kuna ti Biblia iti Eclesiastes 7:12: “Ti sirib agpaay a salaknib kas met laeng ti kuarta agpaay a salaknib; ngem ti pagsayaatan ti pannakaammo ket ti met laeng sirib taginayonenna a sibibiag dagiti agik-ikut iti dayta.” Wen, napateg ti kuarta. Kasapulam ti kuarta tapno adda pagbiagmo, nangruna no adda pamiliam a supsuportaram.​—1 Timoteo 5:8.

Ngem adda kadi serserbi ti biagmo no papaidamam ti bagim kadagiti banag a kabaelam met koma a gun-oden? Ni Jesu-Kristo, ti Namunganay iti Kristianidad, kinunana nga awan man la ti pangisaadanna iti ulona. Nupay kasta, adda dagiti gundaway a tinagiragsakna ti naimas a taraon ken nasayaat ti kalidadna nga arak. Kanayonanna, nagisuot met iti nangina a kawes.​—Mateo 8:20; Juan 2:1-11; 19:23, 24.

Kaskasdi, saan nga impangpangruna ni Jesus ti panagragragsak. Nangikeddeng kadagiti nalawag ken umiso a prioridad. Kinunana: “Uray no addaan kinaruay ti maysa a tao ti biagna saan nga agtaud iti bambanag nga ik-ikutanna.” Kalpasanna, nangisalaysay iti pangngarig maipapan iti maysa a nabaknang a tao nga addaan iti nawadwad nga apit. Kinuna dayta a baknang: “Ania ti aramidek, ita ta awanen lugar a pangurnongak kadagiti apitko? . . . Rakrakekto dagiti kamaligko ket mangbangonak iti daddadakkel, ket sadiay urnongekto ti amin a bukbukelko ken ti amin a naimbag a bambanagko; ket kunaekto iti kararuak: ‘Kararua, addaanka iti adu a naimbag a banag a naidulin maipaay iti adu a tawen; agnam-ayka, manganka, uminumka, agragragsakka.’” Ania ti problema iti dayta a kapanunotan ti baknang a lalaki? Kastoy ti tuloy ti pangngarig: “Kinuna kenkuana ti Dios, ‘Maysa a di nainkalintegan, iti daytoy a rabii kalikagumanda kenka ti kararuam. Asino, ngarud, ti agtagikua iti bambanag nga impempenmo?’” Uray no impempenna dagiti apitna, saannanto met laeng a mapagnumaran dagiti naurnongna a kinabaknang inton matay. Kas panangingudo, inted ni Jesus daytoy a leksion kadagiti dumdumngeg kenkuana: “Kasta ti mapasamak iti tao nga agurnong iti gameng maipaay iti bagina ngem saan a nabaknang iti Dios.”​—Lucas 12:13-21.

Wen, talaga a kasapulantayo ti kuarta ken adda met pagsayaatanna ti panagragragsak. Ngem saan a dagita ti kapatgan iti biagtayo. Ti kapatgan a ragpatentayo ket ti panagbalintayo a nabaknang iti imatang ti Dios, kayatna a sawen, ti panagbiagtayo a maitunos iti pagayatanna.

Napateg Kadi ti Agbalin a Natan-ok?

Adu a tattao ti agbibiag tapno makaaramidda iti pakalaglagipan kadakuada. Saan met ketdi a dakes dayta ta kuna ti Biblia: “Ti nagan nasaysayaat ngem iti naimbag a lana, ken ti aldaw ti ipapatay ngem iti aldaw ti pannakayanak ti maysa.”​—Eclesiastes 7:1.

No matay ti maysa a tao, arigna a nalpasen a naisurat ti intero a pakasaritaan ti biagna. No nakaaramid iti agkakaimbag, ti aldaw ti ipapatay dayta a tao ket adayo a nasaysayaat ngem iti aldaw ti pannakaipasngayna a ti rekordna ket interamente a blangko pay laeng.

Ni Ari Solomon ti nangisurat iti Eclesiastes a libro ti Biblia. Ni Absalom, nga in-inauna a kabsat ni Solomon iti ama, tinarigagayanna idi ti agbalin a natan-ok. Nupay kasta, nasapa a natay ti tallo nga annakna a lallaki a mangimet koma iti naganna kadagiti sumaganad a kaputotan. Isu nga ania ngay ti inaramid ni Absalom? Kuna ti Biblia: “Ni Absalom . . . imbangonanna ti bagina iti adigi, nga adda iti Nababa a Tanap ti Ari, ta kinunana: ‘Awananak iti anak a lalaki a mamagtalinaed a malaglagip ti naganko.’ Gapuna pinanagananna ti adigi iti bukodna a nagan.” (2 Samuel 14:27; 18:18) Awanen ti masarakan ita a tedda dayta nga adigi. Para kadagiti agad-adal iti Biblia, ni Absalom ket maysa nga agdinamag a rebelde a nakikumplot tapno maagawna ti kinaari ni David nga amana.

Iti kaaldawantayo, adu a tattao ti mangikagkagumaan a mangaramid iti pakalaglagipan kadakuada babaen kadagiti gapuananda. Sapsapulenda ti pammadayaw dagiti tattao nga agkarabaliw ti kayatda iti panaglabas ti tiempo. Ngem ania ti pagbanagan ti kasta a kinalatak? Iti librona a The Culture of Narcissism, insurat ni Christopher Lasch: “Iti kaaldawantayo a ti balligi ket kangrunaanna nga agpannuray iti kinaagtutubo, makaay-ayo a langa, ken kinanaisangsangayan, ti kinatan-ok ket nabibiit itan nga aglabas. Gapu iti dayta, kanayon a pakadanagan dagidiay nalatak nga amangan no mapukawda dayta.” Kas resultana, adu a natan-ok iti kagimongan ti agdroga ken agbartek, a pakaigapuan ti nasapa nga ipapatayda. No kasta, saan a nainsiriban ti panangikagumaan nga agbalin a natan-ok.

Gapuna, iti imatang ti siasino a kayattayo ti maaddaan iti nasayaat a reputasion? Maipapan kadagidiay mangtungtungpal iti Lintegna, kinuna ni Jehova babaen ken Isaias a mammadtona: “Itedkonto pay kadakuada iti balayko ken iti uneg dagiti paderko ti maysa a monumento ken maysa a nagan. . . . Maysa a nagan agingga iti tiempo a di nakedngan ti itdekto kadakuada, daydiay a saanto a magessat.” (Isaias 56:4, 5) Dagidiay makaay-ayo iti Dios gapu iti kinatulnogda kenkuana, ikkannanto iti “monumento ken maysa a nagan.” Ti naganda ket laglagipento ti Dios “iti tiempo a di nakedngan” tapno saandanto a magessat. Dayta ti kita ti nagan nga iparparegta ti Biblia nga aramidentayo​—maysa a nasayaat a reputasion iti imatang ni Jehova a Namarsua kadatayo.

Impadto ni Isaias ti maipapan iti tiempo a gun-odento dagiti matalek a tattao ti biag nga agnanayon iti Paraiso a daga. Ti “agnanayon a biag” iti dayta a Paraiso ket isu “ti pudpudno a biag”​—ti kita ti biag a pinanggep ti Dios a matagiragsak ti tattao idi pinarsuana ida. (1 Timoteo 6:12, 19) Imbes nga agbiagtayo a temporario ken awanan pannakapnek, saan kadi a rumbeng nga ikagumaantayo a gun-oden ti biag nga awan inggana?

Saan nga Umdas ti Panagbalin nga Artist Wenno Pilantropo

Tarigagayan ti adu nga artist a pasayaaten ti obrada tapno maibilangda nga eksperto iti propesionda. Ngem yantangay ababa ti biag, saanda a maragpat dayta. Idi agtawenen iti nasurok a 90 ni Hideo, ti artist a nadakamat iti immuna nga artikulo, inkagumaanna a pasayaaten dagiti artistiko a paglainganna. Uray no nakalalaingen ti maysa nga artist ken kapkapnekannan unay ti obrana, nalabit a basbassiten ti magapuananna gapu ta lakay wenno baketen. Ngem kasano ngay no isu ket agbiag nga agnanayon? Panunotem ti amin a posible a maaramidna tapno maperpektona ti obrana!

Ania met ngay ti maikunatayo maipapan kadagiti kalat iti biag ti maysa a pilantropo? Makomendaran ti maysa a tao a mangipapaay iti panawenna kadagiti nakurapay ken mangus-usar kadagiti sanikuana a tumulong kadagiti agkasapulan. Kuna ti Biblia: “Ad-adu ti kinaragsak iti panangted ngem iti panangawat.” (Aramid 20:35) Talaga ngarud a makapnek ti panangipakita iti pannakaseknan para iti pagimbagan ti sabsabali. Ngem kasano kaadu ti magapuanan ti maysa a tao, uray no ipamaysana ti biagna iti dayta a panggep? Kas tattao, limitado laeng ti maitulongtayo kadagiti agsagsagaba. Maysa pay, uray ti dakkel a namaterialan a tulong dina mapennek ti maysa a kangrunaan a kasapulan a saan a gunggun-oden ti kaaduan a tattao. Ania dayta?

Nainkasigudan a Kasapulan a Nasken a Pennekentayo

Iti Sermonna iti Bantay, dinakamat ni Jesus ti maysa a nainkasigudan ken napateg a kasapulantayo idi kinunana: “Naragsak dagidiay sipapanunot iti naespirituan a kasapulanda, yantangay kukuada ti pagarian ti langlangit.” (Mateo 5:3) Sigun ngarud iti Biblia, ti pudno a kinaragsak ket saan nga agpannuray iti kinabaknang, kinatan-ok, gapuanan iti tay-ak ti arte, wenno kalat a panangtulong iti sabsabali. Imbes ketdi, agpannuray dayta iti panangpennektayo iti naespirituan a kasapulantayo nga isu ti panagdayawtayo iti Dios.

Ni apostol Pablo pinaregtana dagiti tattao tapno sapulenda ti Namarsua a dida am-ammo. Insuratna: “Manipud iti maysa a tao inaramid [ti Dios] ti tunggal nasion dagiti tattao, tapno agnaedda iti intero a rabaw ti daga, ket inkeddengna dagiti naituding a tiempo ken dagiti naipasdek a pagpatinggaan ti pagnaedan dagiti tattao, tapno sapulenda ti Dios, no isu maarikapda ket pudno a masarakanda, nupay, iti kinapudnona, saan nga adayo iti tunggal maysa kadatayo. Ta babaen kenkuana addaantayo ti biag ken aggunaytayo ken addatayo.”​—Aramid 17:26-28.

Tapno maaddaantayo ita iti biag a talaga a naragsak, kasapulan nga agdayawtayo iti pudno a Dios. No pennekentayo dayta a panagkasapulantayo, karamantayto met kadagidiay makagun-od iti “pudpudno a biag.” Kas pagarigan, usigem ti maipapan ken Teresa, a limmatak iti telebision iti pagilianna idi isu ti nagbalin a kaunaan nga Africano-Americano nga aktres a nagakem kas bida iti maysa nga oras a telenobela. Ngem di nagbayag, tinallikudanna amin dagita. Apay? Kinunana: “Kombinsidoak a ti panangipangag iti balakad ti Sao ti Dios ti kasayaatan a wagas ti panagbiag.” Saan a kayat ni Teresa a dadaelen ti relasionna iti Dios babaen ti panagakemna a kas bida iti telenobela a mangitantandudo iti sekso ken kinaranggas. Insardengna ti kinaartistana ngem rinugianna ti maysa a pudpudno a makagunggona a biag, agsipud ta amin-tiempo nga inkasabana ti naimbag a damag ti Pagarian ti Dios, nga inkagumaanna a tinulongan ti sabsabali a maaddaan iti nasayaat a relasion iti Dios.

Idi insardeng ni Teresa ti kinaartistana, kastoy ti naadaw a kinuna ti maysa a dati a katrabahuanna: “Sayangek ti panangtallikudna iti naballigi a karerana. Ngem nabatad nga adda nasarakanna nga adayo a napatpateg ken nasaysayaat.” Idi agangay, natay ni Teresa. Ngem kalpasan ti ipapatayna, kastoy ti kinuna dayta a katrabahuanna: “Naragsak ni Teresa, ket kasta ti kayattayo a masagrap iti biag. Mano ngata kadatayo ti naragsak a kas kenkuana?” Para kadagidiay nangipangpangruna iti relasionda iti Dios ngem ita ket nataydan, adda nakaskasdaaw a namnama para kadakuada​—ti pannakapagungardanto iti sidong ti turay ti Pagarian.​—Juan 5:28, 29.

Adda panggep ti Namarsua agpaay iti daga ken iti sangatauan. Kayatna a maawatam dayta a panggepna ken matagiragsakmo ti biag nga agnanayon iti Paraiso a daga. (Salmo 37:10, 11, 29) Itan ti tiempo tapno ammuem ti ad-adu pay maipapan ken Jehova, ti Namarsua iti langit ken daga, ken ti maipapan iti panggepna agpaay kenka. Maragsakan dagiti Saksi ni Jehova iti lugarmo a tumulong kenka a maaddaan iti kasta a pannakaammo. Mabalinmo ida a kontaken wenno mabalinmo ti agsurat kadagiti mangipabpablaak iti daytoy a magasin.

[Ladawan iti panid 5]

Iti pangngarig ni Jesus, ania ti di umiso iti kapanunotan ti baknang a tao?

[Ladawan iti panid 7]

Kayatmo kadi ti agbiag nga agnanayon iti Paraiso a daga?