Salsaludsod Dagiti Agbasbasa
Maiparbeng kadi iti maysa a Saksi ni Jehova ti dumar-ay iti kasar ti saan a Saksi a kabagian wenno am-ammona?
Ti kasar ket naragsak nga okasion isu a natural laeng a kayat ti maysa a Kristiano ti dumar-ay iti dayta. Siempre, dagiti menor de edad a naawis a dumar-ay ket rumbeng nga agpakada kadagiti nagannak wenno mangay-aywan kadakuada, ta dagitoy ti addaan kalintegan a mangikeddeng no dumar-ayda wenno saan. (Efeso 6:1-3) Ngem kasano ngay no ti maysa a Saksi ni Jehova ket awisen ti dina kapammatian a lakayna a kumuyog kenkuana iti maysa a kasar a maangay iti simbaan? Nalabit ipalubos ti konsiensiana ti idadar-ayna tapno agpaliiw laeng ngem determinado a saan a makipaset iti aniaman a narelihiosuan nga aramid a nainaig iti dayta nga okasion.
No kasta, kaaduanna a maysa a personal a desision ti idadar-ay wenno saan iti maysa a kasar. Ngem sipapanunot koma ti tunggal Kristiano nga isu ket manungsungbat ken Jehova. Gapuna, rumbeng nga usigenna ti sumagmamano a Nainkasuratan a prinsipio no ikeddengna a dar-ayan wenno saan ti kasar ti maysa a di-Saksi.
Ti koma kapatgan iti maysa a Kristiano ket ti panangtaginayonna iti nasayaat a relasionna iti Dios. Kinuna ni Jesus: “Ti Dios maysa nga Espiritu, ket dagidiay agdaydayaw kenkuana masapul nga agdayawda a buyogen ti espiritu ken kinapudno.” (Juan 4:24) Gapuna, saan a makipaset dagiti Saksi ni Jehova kadagiti narelihiosuan nga aktibidad dagiti dida kapammatian, kas kadagiti panaglualo, ritual, wenno seremonia a maikontra iti kinapudno nga isursuro ti Biblia.—2 Corinto 6:14-17.
Maamiris ti maysa a Kristiano a ti desisionna ket mabalin met a makaapektar iti sabsabali. No ikeddengmo ti dumar-ay, masair kadi dagiti kabagiam no saankanto a naan-anay a makipaset kadagiti aktibidad iti kasar? Rumbeng nga ikabilangam met ti posible nga epekto dayta kadagiti kapammatiam. (Roma 14:13) Uray no saan a dakes kenka wenno iti dadduma a kameng ti pamiliam ti idadar-aymo iti kasar ti saanmo a karelihionan, saanto ngata a pakaitibkolan dayta dagiti kapammatiam? Saanto ngata a maapektaran ti konsiensia ti dadduma?
Ti kasar dagiti saan a Saksi a kakabagian ket mabalin a mangpataud kadagiti narikut a kasasaad. Kasano ngay no kiddawenda nga agbalinka nga abay? Wenno kasano ngay no ti asawam a saanmo a kapammatian ket kayatna a makipasetkayo iti amin nga aktibidad iti kasar? No ti mangasar ket maysa a hues wenno mayor, ti idadar-ay iti dayta ket mabalin a kas iti panangsaksi laeng iti maysa a legal a seremonia.
Iti sabali a bangir, ad-adun ti rumbeng nga ikabilangam no ti kasar ket maangay iti narelihiosuan a pasdek wenno no maysa a padi ti mangasar. Tapno maipangagmo ti sinanay-Biblia a konsiensiam ken saanmo a maikompromiso ti pammatim wenno tapno saanka a makaaramid iti pakaibabainan dagiti agkasar ken agpakasar, mabalin nga ikeddengmo a saanka laengen a dumar-ay. (Proverbio 22:3) Saanka unay a marigatan ken uray ti pamiliam no nasaksakbay nga ilawlawagmo kadakuada ti pammatim a naibasar iti Biblia. Ibagam no ania dagiti saanmo a mabalin a pakipasetan wenno nalabit mangisingasingka iti mabalinmo nga aramiden.
Kalpasan a tiningitingda ti amin a bambanag, mabalin nga ikeddeng ti dadduma a Kristiano a saan a dakes ti dumar-ay iti kasar ti saan a Saksi no dida makipaset iti aniaman a narelihiosuan a seremonia. Ngem no maamiris ti maysa a Kristiano a mabalin a mapilitanto a mangikompromiso kadagiti nadiosan a prinsipiona no dumar-ay, mabalin a panunotenna a nasaysayaat laengen no saan a dumar-ay. No ikeddengna a dina dar-ayan ti seremonia, ngem mapanto iti pakaangayan ti padaya kas maysa a naawis a sangaili, determinadonto koma a ‘mangaramid iti amin a bambanag a maipaay iti dayag ti Dios.’ (1 Corinto 10:31) Iti panangaramid kadagiti kasta a desision, “tunggal maysa awitennanto ti bukodna nga awit” a responsabilidad. (Galacia 6:5) Aniaman ngarud ti desisionmo, laglagipem a ti kapatgan ket ti panangtaginayonmo iti nadalus a konsiensia iti imatang ni Jehova a Dios.