Umadanika iti Dios
Awan Kapadana nga Ama
“AMA.” Manmano ti sao a makatukay iti rikna dagiti tattao. Ti maysa nga ama a pudno a mangay-ayat kadagiti annakna tulonganna ida nga agballigi iti biag. Adda ngarud naimbag a rason a ti Biblia tukoyenna ni Jehova a Dios kas ‘Ama.’ (Mateo 6:9) Ania a kita nga Ama ni Jehova? Tapno masungbatan dayta, usigentayo dagiti kinuna ni Jehova kenni Jesus idi panawen ti pannakabautisarna. Maiparangarang ngamin no ania a kita nga ama ti maysa babaen ti pamay-an ti pannakisaritana kadagiti annakna.
Idi agarup Oktubre 29 K.P., napan ni Jesus idiay Karayan Jordan tapno agpabautisar. Isalaysay ti Biblia no ania ti napasamak: “Kalpasan a nabautisaran dagus a simmang-at ni Jesus manipud iti danum; ket adtoy! naluktan ti langlangit, ket nakitana ti espiritu ti Dios a bumabbaba a kasla kalapati nga um-umay kenkuana. Adtoy! Kasta met, adda timek manipud iti langlangit a nagkuna: ‘Daytoy ti Anakko, ti dungdungnguen, nga inanamongak.’”a (Mateo 3:16, 17) Dagita a nadungngo a sasao ipakitana no ania a kita nga Ama ni Jehova. Kitaenyo ti tallo a banag nga inyebkas ni Jehova iti Anakna.
Umuna, babaen kadagiti sasao a “daytoy ti Anakko,” kasla ibagbaga ni Jehova a, ‘Pakaidayawak ti agbalin nga Amam.’ Ti mannakaawat nga ama bigbigenna ken ipaayna ti atension a kasapulan ti anakna. Masapul a maiparikna kadagiti annak a maipatpategda kas miembro ti pamilia. Panunotenyo laengen ti nagsayaat nga epekto dayta ken Jesus—uray pay kas maysa nga adulto—idi isu ket binigbig ti Amana a kas anakna!
Maikadua, babaen ti panangtukoyna iti Anakna kas “dungdungnguen,” sipapanayag nga inyebkas ni Jehova ti panagayatna ken Jesus. Kayariganna a kunkuna ti Amana, ‘Dungdungnguenka.’ Ti maysa a naimbag nga ama ibagana kadagiti annakna a dungdungnguenna ida. Dagita a sasao—a mabuyogan iti panangipateg—ti makatulong kadagiti annak a dumakkel a nasalun-at. Naragsakan la ketdi ni Jesus a makangngeg iti timek ni Amana a nangyebkas iti panagayatna kenkuana!
Maikatlo, babaen kadagiti sasao nga ‘inanamonganka,’ inyebkas ni Jehova ti anamongna iti Anakna. Kasla ibagbaga ni Jehova, ‘Anak, naay-ayoak iti inaramidmo.’ Ti maysa a naayat nga ama sapulenna dagiti gundaway a mangibaga kadagiti annakna a maay-ayo kadagiti nasayaat a sasao wenno ar-aramidda. Mapabileg ken agbalin a natured dagiti annak no apresiaren ida dagiti nagannakda. Naparegta la ketdi ni Jesus idi nangngegna ti pananganamong ni Amana!
Talaga nga awan kapada ni Jehova kas Ama. Tartarigagayanyo kadi ti kasta nga ama? No kasta, maliwliwakayo a makaammo a mabalin a maaddaankayo iti relasion ken Jehova. Umadani met kadakayo no am-ammuenyo a naimbag ken sipapasnek nga ikagumaanyo nga aramiden ti pagayatanna. Kuna ti Biblia: “Umadanikayo iti Dios, ket isu umadaninto kadakayo.” (Santiago 4:8) Adda pay kadi sabali a mangted kadakayo iti kinatalged ngem ti panagbalinyo a nasinged ken Jehova a Dios, ti kasayaatan nga Ama?
[Footnote]
a Sigun iti kapadana a salaysay iti Ebanghelio ni Lucas, inusar ni Jehova ti nadungdungngo a sao a “sika,” a kunkunana: “Sika ti Anakko, ti dungdungnguen; inanamonganka.”—Lucas 3:22.