Saludsod Dagiti Agbasbasa

Pannusa Kadi ti Dios Dagiti Natural a Didigra?

Saan nga agusar ti Dios kadagiti natural a didigra tapno dusaenna dagiti inosente a tattao. Sipud idi agingga ita, saanna a pulos nga aramiden ti kasta. Apay? Agsipud ta ti “Dios ket ayat,” kuna ti Biblia iti 1 Juan 4:8.

Amin a tignay ti Dios ket naibatay iti ayat. Ti ayat saanna a dangran dagiti inosente, ta kuna ti Biblia a ti “ayat di agaramid iti dakes iti padana a tao.” (Roma 13:10) Iti Job 34:12, kuna ti Biblia: “Iti kinapudnona, ti met laeng Dios saan nga agtignay a sidadangkes.”

Agpayso nga impadto ti Biblia a mapasamak dagiti didigra iti kaaldawantayo, kas kadagiti “dadakkel a ginggined.” (Lucas 21:11) Ngem no kasano a ti paraanunsio iti paniempo saanna a basol ti panangdadael nga iyeg ti bagyo nga impakpakaunana, saan met a basol ni Jehova dagiti panangdadael nga itden dagitoy a didigra. No ngarud saan a ti Dios ti makinggapuanan iti panagsagaba ti tao nga iyeg dagiti natural a didigra, ania ngarud ti makagapu iti panagsagaba?

Kuna ti Biblia: “Ti intero a lubong adda iti pannakabalin daydiay nadangkes,” ni Satanas a Diablo. (1 Juan 5:19) Isu ket mammapatay sipud pay idi immalsa ti tao idi punganay agingga iti kaaldawantayo. (Juan 8:44) Ibilang ni Satanas nga awan serserbi ti biag ti tao. Gapu ta bagina laeng ti pampanunotenna, saan a nakaskasdaaw a pinarnuayna ti maysa a sistema ti lubong nga agraraira ti kinamanagimbubukodan. Ti sistema ti lubong ita pampanuynoyanna ti pananggundaway kadagiti tattao isu nga adu nga awan gawayda a tattao ti agnaed kadagiti napeggad a lugar a mabalin a dalapusen dagiti natural wenno aramid ti tao a didigra. (Efeso 2:2; 1 Juan 2:16) Isu a sungsungbatan dagiti naagum a tattao ti dadduma a kalamidad a mapaspasaran dagiti biktima. (Eclesiastes 8:9) Apay?

Nakaad-adu dagiti didigra a maigapu iti aramid ti tao. Usigem, kas pagarigan, ti rigat dagiti agindeg iti nabagyo ken nalayus a siudad iti New Orleans, E.U.A., wenno dagiti balbalay a nagaburan iti nargaay a pitak iti kabambantayan iti igid ti baybay ti Venezuela. Kadagitoy ken iti dadduma pay a pasamak, nagbalin a didigra ti gagangay a panagangin ken panagtudo, gapu iti kinakurang ti pannakaammo ti tao iti kasasaad ti aglawlaw, di natalged a patakder, di nasayaat a plano, di panangipangag kadagiti pakdaar, ken biddut dagiti agtuturay.

Usigem ti maysa a didigra idi panawen ti Biblia. Idi kaaldawan ni Jesus, kellaat a narba ti maysa a torre a nakatayan ti 18 a tao. (Lucas 13:4) Daytoy a didigra ket mabalin a maigapu iti biddut ti tao, “di mapakpakadaan a pasamak,” wenno dagitoy a dua​—ngem sigurado a saan a maigapu dayta iti panangukom ti Dios.​—Eclesiastes 9:11.

Adda kadi aniaman a didigra a gapuanan ti Dios? Adda, ngem naiduma dagitoy kadagiti natural wenno gapuanan ti tao a didigra gapu ta napili ti dadaelenda, adda panggepda, ken manmanoda a mapasamak. Ti sangalubongan a Layus idi kaaldawan ni patriarka a Noe ken ti pannakadadael dagiti siudad ti Sodoma ken Gomorra idi kaaldawan ni Lot ti dua a pagarigan. (Genesis 6:7-9, 13; 18:20-32; 19:24) Dagidiay a panangukom ti Dios pinukawna dagiti napeklan a nadangkes ngem intalimengna a sibibiag dagiti nalinteg iti imatang ti Dios.

Kinapudnona, kabaelan, tarigagayan, ken adda pannakabalin ni Jehova a Dios a mangipatingga iti amin a panagsagaba tapno bang-aranna ti epekto dagiti natural a didigra. Impadto ti Salmo 72:12 maipapan iti dinutokan ti Dios nga Ari, ni Jesu-Kristo: “Ispalennanto daydiay napanglaw nga agpatpatulong, kasta met daydiay naparigatan ken siasinoman nga awanan katulongan.”