Lulua iti Botelia a Lalat

MAYSA a pugante daytoy nga agtutubo a lalaki. Gapu ta madanagan ken marigatan, agsangsangit nga immararaw ken Jehova a Dios maipaay iti asi ket kiniddawna: ‘Ikabilmo dagiti luak iti boteliam a lalat.’ (Salmo 56:8) Isu ni David, ti nagbalin nga ari iti Israel idi agangay. Ngem ania ti tuktukoyenna a botelia a lalat, ken kasano nga ikabil ti Dios dagiti luatayo iti botelia a lalat?

Pagaammo unay ni David ti botelia a lalat. Dayta ti pagkargaan iti danum, lana, arak, wenno uray pay mantekilia. Dagiti tattao nga agakar-akar iti Sahara, kas kadagiti Tuareg, agus-usarda pay laeng kadagiti botelia a lalat, a naaramid iti lalat ti maysa a kalding wenno karnero. Makalaon dagita a botelia iti adu a danum, depende iti kadakkel ti lalat ti animal. Pagaammo unay a dagiti botelia a lalat pagtalinaedenda a nalamiis ti danum, uray pay iti nakapudpudot nga aldaw iti desierto. Idi, maibiahe dagitoy babaen kadagiti asno wenno kamelio. Ita, maikarga dagitoy kadagiti lugan nga agdaliasat iti lasonglasong a dalan!

Mabalin nga adda met pategna kadatayo dagiti makatukay a sasao ni David maipapan iti botelia a lalat. Kasano? Ilawlawag ti Biblia a ni Satanas ti mangiturturay iti daytoy a lubong ken addaan iti “dakkel nga unget” iti kaaldawantayo. Kas resultana, mapaspasaran ti lubong dagiti nakaro a rigat. (Apocalipsis 12:12) Gapuna, adu ti kas ken David a maipaspasango iti emosional, mental, wenno pisikal a rigat​—nangruna kadagidiay mangikagkagumaan a manggun-od iti anamong ti Dios. Kasta kadi ti kasasaadyo? Uray ‘agsangsangitda,’ dagita a matalek a tattao ti situtured nga agtultuloy a mangiparparangarang iti kinatarnaw. (Salmo 126:6) Agtalekda a ti nailangitan nga Amada saanna laeng a makita dagiti rigatda no di ket uray ti epektona kadakuada. Pudno a maawatanna ti rigat a sagsagabaen dagiti adipenna, ket siaasi a lagipenna dagiti lua ken panagsagabada. Iti piguratibo a pamay-an, urnongenna dagitoy iti boteliana a lalat.