Umadanika iti Dios
“Ammok Unay Dagiti Rigat a Sagsagabaenda”
“SANTO, santo, santo ni Jehova.” (Isaias 6:3) Dagita a naipaltiing a sasao ipamatmatda nga awan ti pumada iti kinadalus ken kinasin-aw ni Jehova a Dios. Ngem mabalin nga iyimtuodmo: ‘Nakayakay wenno narigat kadi a maasitgan ti Dios gapu iti kinasantona? Talaga kadi a ti kasta a nasantuan a Dios ket maseknan kaniak—maysa a managbasol ken imperpekto a tao?’ Usigentayo dagiti mangpatalged a sasao ti Dios kenni Moises, a nailanad iti Exodo 3:1-10.
Naminsan bayat nga ipaspastor ni Moises dagiti karnero, adda karkarna a nakitana—gumilgil-ayab ti maysa a siitan a bassit a kayo ngem “saan a napuoran.”(Bersikulo 2) Gapu ta masdaaw, inasitganna tapno sukimatenna. Babaen ti maysa nga anghel, nakisarita ni Jehova kenni Moises manipud iti tengnga ti apuy: “Dika umasideg ditoy. Uksotem dagiti pallokam kadagita sakam, agsipud ta ti lugar a pagtaktakderam ket nasantuan a daga.” (Bersikulo 5) Panunotem—maibilang a nasantuan dayta a lugar gapu ta ti gumilgil-ayab a kayo iladawanna ti presensia ti Dios!
Adda panggep ti nasantuan a Dios a nakisarita ken Moises. Kinuna ti Dios: “Di mapagduaduaan a nakitak ti pannakaparigat ti ilik nga adda idiay Egipto, ket nangngegko ti ikkisda kas imbunga dagidiay mangdagdagdag kadakuada nga agtrabaho; agsipud ta ammok unay dagiti rigat a sagsagabaenda.” (Bersikulo 7) Saan a bulsek ti Dios tapno dina makita ti rigat a sagsagabaen ti ilina; saan met a tuleng tapno dina mangngeg dagiti pakaasida. Imbes ketdi, nariknana ti tuokda. Imutektekam ta kinuna ti Dios: “Ammok unay dagiti rigat a sagsagabaenda.” No maipapan iti sasao nga “ammok unay,” kastoy ti komento ti maysa a reperensia: “Dagita a sasao ipasimudaagda ti personal a rikna, dungngo, ken asi.” Ngarud, dagiti sasao ni Jehova kenni Moises ipalgakna ti nauneg a pannakaseknan ken panangaywan ti Dios.
Ania ti inaramid ti Dios? Saanna laeng a kinita wenno dinengngeg ida buyogen ti asi. Isu ket natukay nga agtignay. Inkeddengna nga ispalen ti ilina manipud Egipto ken ipan ida “iti maysa a daga a pagay-ayusan ti gatas ken diro.” (Bersikulo 8) Gapuna, binilinna ni Moises: “Iruarmo ti ilik . . . manipud Egipto.” (Bersikulo 10) Kas panagtungpal iti dayta a bilin, inruar ni Moises dagiti Israelita manipud Egipto idi 1513 K.K.P.
Saan a nagbalbaliw ni Jehova. Masigurado dagiti agdaydayaw kenkuana a makitana dagiti pakarigatanda ken mangngegna dagiti ararawda. Pagaammona dagiti pakarigatanda. Saan laeng a maasian kadagiti matalek nga adipenna. Matignay pay ti nadungngo a Dios a tumulong kadakuada ‘agsipud ta isu ket maseknan.’ —1 Pedro 5:7.
Mangted kadatayo iti namnama ti kinamanangngaasi ti Dios. Babaen iti tulongna, kas imperpekto a tattao mabalintayo ti agbiag a maitunos iti nalinteg a pagalagadan ti Dios ken agbalin a makaay-ayo kenkuana. (1 Pedro 1:15, 16) Naliwliwa ti maysa a Kristiano a babai a nangdaer iti depresion ken pannakaupay gapu iti kapadasan ni Moises iti siitan a bassit a kayo. Kunana: “No ibilang ni Jehova a nasantuan uray ti narugit a lugar, adda met ngarud bassit a namnamak. Nagdakkel ti naitulong dayta kaniak.”
Kayatmo kadi a maammuan ti ad-adu pay maipapan iti nasantuan a Dios a ni Jehova? Posible ti maaddaan iti nasinged a relasion ken Jehova yantangay “pagaammona unay ti pannakapormatayo, a laglagipenna a tapoktayo.”—Salmo 103:14.